MUKÉTÍMÙ 13:24-31

²⁴Kɛ̀ bɛ̀ɛ yú dɛborɛ̀ kɛ dɔ̀ Ɛsikɔɔdi biriku, dɛ̀ɛ̀ tu siyuu biriku, bɛ̀ dɛ̀ kɔ̃ũ mɛ̀ɛ̀ kpɛ́í yɛtebɛ kó siyuu.

²⁵Yɛwe sipísìnɑ̀ɑ̀ kó difɔ̃nkúò bɛ̀ɛ̀ do kɔ̀tɛ dihɛì pɑɑtímù kɛ̀ bɛ̀ɛ konní,

²⁶kɛ́kɔtɛ kɛ́yɑ̀ Mɔyiisi nɛ̀ Anɔɔ nɛ̀ Isidɑyɛɛribɛ sɔmbɛ Pɑdɑnni kó dikpɑ́ɑ̀ Kɑdɛɛsi kó kutempɛ̃ mmiɛkɛ kɛ́ bɛ̀ nɑ̀kɛ́ bɛ̀ yɑ̀ní tìì kó dimɑ̀ɑ̀, kɛ́ bɛ̀ bɛnkɛnɛ̀ yɛtebɛ bɛ̀ tɔní yɛ̀ dɛ kó kɛtenkɛ̀.

²⁷Kɛ̀ bɛ̀ɛ bɛ̀ nɑ̀kɛ́ kɛ dɔ̀: Ti kɔ̀tɛmu dihɛì ɑ ti tɔ̃ ndì tenkɛ̀ miɛkɛ. Mɔ́mmuɔ nwe mɛnɑɑmiɛ̀ nnɛ̀ mɛcekùɔ̀ ndɛ̀ pũɔ̃̀mmu. Ntɛ ti tɔní yɛ̀ɛ̀ tebɛ.

²⁸Bɛnìtìbɛ̀ bɛ̀ɛ̀ bo dɛ kó dihɛì miɛkɛ bɛɛ̀ nɛ́ kpeńnì kɛ̀ iduotí fitɛ́ bɛ ɛkɛ̀, kɛ̀ ti yɑ̀ yɛ miɛkɛ Anɑkii yɑɑ̀bí tidɑdiɛtì.

²⁹Amɑdesiibɛ bɛɛ̀ bo kubɑkù cɑ̃̀nku bíɛ́kɛ̀ kó kutempɛ̃, kɛ̀ Itiibɛ nɛ̀ Sebusiibɛ nɛ̀ Amɔriibɛ kɛ̀ bɛ̀ bo yɛtɑ̃rɛ̀ ĩ́nkɛ̀, kɛ̀ Kɑnnɑhɑ̃ɑ̃ kɔbɛ bo dɑ̀mɛ́ɛ̀rì nɛ̀ Suditɛ̃ɛ̃ dɛ pɛɛ́mmɛ̀.

³⁰Dɛ mɔ̀nnì kɛ̀ Kɑdɛbuu duɔ́ nkɛ̀ bɛnìtìbɛ̀ bɛ̀ɛ̀ kpɑ̀nnɛ̀ Mɔyiisi kɛ̀ bɛ̀ dɔ̀ yúóó. Kòò dɔ̀: Tí kɔtɛnɛ̀ ti yóó bɛ̀ nɑmu kɛ́fietɛ bɛ tenkɛ̀.

³¹Bɛnìtìbɛ̀ ò do nɛinɛ̀ bɛ̀ kɛ̀ bɛmbɛ dɔ̀: Ti bɑ́ɑ́ nɑ kɛ́dokɛ́nɛ̀ dɛ kó bɛnìtìbɛ̀, bɛ̀ kpeńnìmu kɛ ti pɛ̃ɛ̃tɛ́.