Text copied!
CopyCompare
Pohnpeian Bible with Apocrypha - Melkahka Kan

Melkahka Kan 91

Help us?
Click on verse(s) to share them!
1Mehmen me kin diar eh wasahn ruk rehn KAUN-O, mehmen me kin mihmi pahn silepen Wasa Lapalapo,
2iei ih me kak patohwanohng Koht, “Komwi me soundoarepei oh silepei. Komwi me ei Koht; me I kin likih.”
3E pahn ketin doareiukasang me keper rir koaros, oh sang soangen soumwahu koaros me kin kemehla aramas.
4E pahn ketin koaduhpwalkinuhkedi lime kan; ke sohte pahn perki mehkot pahn epwelpen nin lime; sapwellime loalopwoat pahn sinsileiuk oh doareiukala.
5Ke sohla pahn masak mehkot me keper nipwong, de mahwen karuaru ong uhk ni rahn,
6de soumwahu lusulus kan me kin wawaiseli nan rotorot, de soangen suwed teikan me kin kemehla aramas nin rahn.
7Aramas kid kak pwupwudi mehla limwahmw, de aramas nen pil pahn kak kapiluhkpene, ahpw sohte me pahn kauweiukala.
8Ke pahn pein kilangki mesomwen, oh kadehde duwen me suwed akan ar pahn ale kalokolok.
9Pwehki omw wiahkihla KAUN-O doarepomw, oh wiahkihla Wasa Lapalahpie silepomw,
10iei me sohte me suwed kot pahn lelohng uhk, sohte kalokolok ehu pahn kerendohng imwomw.
11Koht pahn ketin kesilehkinuhk sapwellime tohnleng kan, pwe re en apwahpwalihiuk wasa koaros me ke pahn kohla ie.
12Re pahn kolkinuhkada pehrail kan, pwe ke dehr dipekelekel nin takai kan.
13Ke pahn sok pohn laion oh sineik kan, pohn laion kommwad oh sineik me pwoisin kan.
14Koht ketin mahsanih, “I pahn komourala irail kan me kin poakohng ie oh I pahn sinsile irail kan me ese me ngehi iei KAUN-O.
15Ni ar pahn likwerih ie, I pahn sapeng irail; ni ar pahn lelohng nan apwal, I pahn ieiang irail. I pahn kapitirailla oh kawauwihirailla.
16I pahn katingihkin irail mour werei; oh I pahn komourirailla.”