Text copied!
CopyCompare
Pohnpeian Bible with Apocrypha - Melkahka Kan

Melkahka Kan 64

Help us?
Click on verse(s) to share them!
1Maing Koht, I patohwan milahr nan apwal—komw ketin karonge ei kapakap! I patohwan masakadahr ei imwintihti kan—komw ketin komouriehla!
2Komw ketin sileiesang koasoandien aramas suwed kan, sang mwekid suwed en aramas mwersuwed kan.
3Re kin edehda lowarail kan oh keng rasehng kedlahs kei oh kin kadar lokaia samin rasehng arep.
4Re inenen pitipitiong kaparaseli ar tiahk kanamenek kan en lokaia likamw; re kin kamwomwki aramas mwahu kan arail karaunlikamw.
5Re kin ehukipene ar koasoandi suwed kan; re kin koasoiapene duwen wasa kan me re pahn koasoanehdi ie ar lidip kan. Re kin nda, “Sohte me pahn kilangada.”
6Re kin wiahda koasoandi suwed kan oh nda, “Kitail wiadahr koasoandi kaselel ehu en dihp koasukloal.” Audepen mohngiong oh kapehd en aramas mehkot rir.
7Ahpw Koht kin ketin kadar sapwellime arep pohn aramas akan oh re kin mwadang soahn.
8E pahn ketin kamwomwirailla pwehki lokaia pwuko; koaros me pahn udiahl irail pahn itikala moangarail kan.
9Irail koaros pahn masepwehkada; re pahn medemedewe dahme Koht ketin wiadahr oh koasoakoasoia wiepen nin lime kan.
10Aramas pwung kan koaros ahpw pahn perenda pwehki wiepen nin limen KAUN-O. Re pahn diar reh arail wasahn ruk oh meleilei; aramas mwahu kan koaros pahn kapikapinga.