Text copied!
CopyCompare
Pohnpeian Bible with Apocrypha - Melkahka Kan

Melkahka Kan 71

Help us?
Click on verse(s) to share them!
1Maing KAUN, I patohdo pahn kupwuromwi pwe komwi en ketin sinsile ie; Komw dehr ketin mweidohng I en lohdi!
2Pwehki omwi pwung, komw ketin sewese ie oh kapitiehla. komw ketin karonge ie oh doareiehla!
3Komw ketin wiahla ei paipalap kehlail ei wasahn silasil mwahu me pahn kapitiehla ahnsou koaros; pwe komwi me ei wasahn ruk oh doarepei.
4Maing ei Koht, komw ketin kapitiesang aramas suwed kan, sang ni manaman en me lemei oh suwed kan.
5Maing KAUN, Wasa Lapalap, komwihte me ei koapworopwor; komwihte me I kin likih sang ni ei tikitik.
6I likihkomwiher nan ei mour unsek; komw ketin sinsileieier sang ni ei ipwidi; I pahn kapinga komwi ahnsou koaros!
7Mouri wialahr mehn kalamangi ong me ngeder, pwehki komwi me soundoarepei kehlail.
8I kin kapikapinga komwi sang nimenseng lel nipwong oh kalohki sapwellimomwi lingan.
9Komw dehr ketin likidmelieiehla ni ei likeilapalahr, komw pil dehr ketin keseiehla ni ei luwetalahr.
10Ei imwintihti kan men kemeielahr; re ndindapene oh koasoakoasone ar pahn pelian ie.
11Re ndinda, “Koht ketin likidmelielahr aramaso; kitail pwakih oh koledi, pwe sohte me pahn kapitala.”
12Maing Koht, komw dehr kin ketin dohweisang ie; Maing ei Koht, komw ketin sewese ie ahnsou wet!
13Irail akan me men mahweniong ie en lohdi oh mwomwla. Irail akan me men kauweiehla en namenekla oh paisuwedla.
14Ahnsou koaros I pahn kin koapworopworkin komwi; I pahn kalaudehla ei kaping ong komwi kohkohlahte.
15I pahn lohkiseli sapwellimomwi kupwur mwahu; I pahn koasoia duwen sapwellimomwi manaman en komour sang nimenseng lel nipwong, mehnda ma I sohte kin dehdehki duwe.
16I pahn weweidwei nan roson en KAUN-O ei Koht; I pahn kalohki sapwellimomwi kupwur mwahu, pwe komwihte me sapwellimaniki.
17Komw ketin padahkieier sang ni ei tikitik, oh lel met I pil lohlohkiseli sapwellimomwi wiewia kapwuriamwei kan.
18A met ni ei mahlahr oh moangepwetalahr, Maing Koht, komw dehr ketin likidmelieiehla! Komw ketin ieiang ie nindokon ei pahn kalohki sapwellimomwi roson oh manaman ong dih en mwuhr kan.

19Maing Koht, sapwellimomwi pwung me ileilehie. Komw ketin wiahda doadoahk kesempwahlie; sohte emen me rasehng komwi.
20Komw ketikihongieier apwal oh lokolok, ahpw komwi pahn pwurehng ketin kakehlaiehda; komw pahn ketin nekidiehla sang mehla.
21Komw pahn ketin kaileiehda kohkohlahte; komw pahn ketin pwurehng kansenamwahwihiehla.
22I uhdahn pahn kapingahkin komwi ngilen nei keseng arp; Maing ei Koht, I pahn kapinga sapwellimomwi loalopwoat. I pahn kesengki nei arp oh koulkihong komwi koulen kaping, ong komwi Me Sarawien Israel.
23I pahn kin weriwerki ei peren nindokon ei pahn kesengiong komwi; paliwereiet oh ngeni unsek pahn iang koul pwehki omwi ketin doareielahr.
24I pahn kalohkiseli sapwellimomwi pwung sang nimenseng lel nipwong, pwehki irail kan me men kauweiehla re lohdier oh nameneklahr.