1Ŋac taŋ gê lamu Lôlôc Ŋataugeŋ ma gêŋgôŋ Ŋaniniŋ Ŋatau nê ajuŋlabu naŋ,
2oc êsôm êndêŋ Apômtau gebe “O ŋoc lamu to ŋoc laimôkê. O ŋoc Anôtô, taŋ taêc kêka aôm naŋ.”
3Gebe eŋ taugeŋ oc êjaŋgo aôm su aŋga ŋac-gêdib-mocwaga nê lakô ma ênam aôm sa êndêŋ gêmac sec.
4Eŋ oc êŋgandê aôm auc ŋa nê magê ma aôm oc ôŋgôŋ ênê magêlabu ŋajamgeŋ. Ênê biŋ ŋaŋêŋ kêtu lautuc to maluku.
5Aôm oc ôtêc gêŋsêga gêbêcŋa atom ma ôtêc sôb, taŋ gêlôb gêdêŋ ocsalôŋa naŋ, atom amboac tonaŋgeŋ.
6Aôm oc ôtêc gêmac sec, taŋ kêmoasac tokesecgeŋ ma ônaŋ geseŋ lau gêdêŋ ocsalô naŋ, êtap aôm sa atom amboac tonaŋgeŋ.
7Lau tausen, taŋ sêwiŋ aôm naŋ, embe sênaŋa, ma tausen to tausen, taŋ sêmoa kêsi lêmam anôŋaŋa naŋ, embe sênaŋa naŋ, mago oc êjac aôm sa.
8Aôm taôm matamanô êpi lau kesowaga ma ôlic ŋagêjô, taŋ oc êtap êsêac sa naŋ.
9Apômtau kêtu aômnêm lamu. Aôm kôjaliŋ Lôlôc Ŋatau sa gebe êtu nêm laimôkê,
10tec oc ôndac gêŋwapac atom ma gêŋ sec teŋ oc êsa nêm bec ŋagala atom.
11Gebe eŋ oc êsakiŋ nê aŋela êtu aômŋa gebe sejop aôm aŋga nêm lêŋ samob.
12Êsêac oc sêsip aôm sa ŋa lemeŋ gebe amkaiŋ êndiŋ êpi poc atom.
13Aôm oc ôsêlêŋ ôŋgêli lewe to moac. Aôm oc ôka lewe to moactêna popoc.
14Anôtô kêsôm gebe “Aê oc janam lau, taŋ sêsap aê tôŋ totêntac gêwiŋgeŋ naŋ sa ma japiŋ êsêac, taŋ sêjala ŋoc ŋaê naŋ auc.
15Êndêŋ taŋ aweŋ ênac aê, oc jakêŋ taŋoc êsêac. Êndêŋ taŋ sêŋgôŋ naeo, oc jamoa jawiŋ êsêac ma janam êsêac kêsi to jatoc êsêac sa.
16Aê oc jakêŋ êsêac sêmoa mateŋ jali ŋêŋgeŋ ma jatôc ŋoc moasiŋ êndêŋ êsêac sêlic.”
