1Zĩ kũ̀a Yesu ìbanↄ sù ò a là ò pì: Dí mɛ́ à deńla kpata kũ à bò Luda kĩnaa gbɛ̃nↄ tɛ́ɛ?
2Akũ Yesu nɛ́ fíti ke sìsi à a zɛ̀ ń arɛ
3à pì: Yãpuran matɛn oárɛ, tó ádi nɛ̀sɛ litɛ a gↄ̃ lán nɛ́ fíti bàro, áni gɛ̃ kpata kũ à bò Luda kĩnaa gũnlo.
4Gbɛ̃ kũ à a zĩda bùsa à gↄ̃̀ lán nɛ́ fíti díkĩna bà, ade mɛ́ à deńla kpata kũ à bò Luda kĩnaa gbɛ̃nↄ gũn.
5Gbɛ̃ kũ à nɛ́ bire taka sì ma ìbakɛ yãi, makũmɛ à ma si.
6Tó gbɛ̃ tò nɛ́ kũ à ma náani vĩ díkĩnanↄ do sã̀tɛ, anigↄ̃ sã̀na adenɛ ò wísilↄgbɛ gbɛ̃̀ntɛ̃ dↄ a wakalɛ ò a zu sɛ̀bɛ lòkoton.
7Waiyoo andunia, kũ yã kũ àdi tó ò sãtɛ kú a gũn yãi. Séde yã kũ àdi tó ò sãtɛ gↄ̃ kun, ama waiyoo gbɛ̃ kũ sãtɛna yã pìi bò a kĩnaa.
8Tó n ↄ ke n gbá mɛ́ àdi tó ǹ sãtɛ, ǹ zↄ̃ ǹ zukũna. À sã̀nannɛ ǹ gɛ̃ wɛ̃̀ndii gũn kũ ↄ kusuo ke ɛrɛ ũ de n gↄ̃ ↄ mɛ̀n pla ke gbá mɛ̀n pla vĩla ò n zu tɛ́ kũ àdi garo gũn.
9Tó n wɛ́ mɛ́ àdi tó ǹ sãtɛ, ǹ bo ǹ zukũna. À sã̀nannɛ ǹ gɛ̃ wɛ̃̀ndii gũn kũ wɛ́ doo de n gↄ̃ wɛ́ mɛ̀n pla vĩla ò n zu tɛ́ gũn gyãwãnn.
10À laakari kɛ dↄkɛna kũ nɛ́ díkĩnanↄ dooi, zaakũ matɛn oárɛ, ń malaikanↄn kú musu, ò kú kↄ̃ wɛ́n kũ ma De kũ à kú gweo baala'i.
12Átɛn da deramɛɛ? Tó gbɛ̃ sã vĩ mɛ̀n basↄↄro, tó a do sã̀tɛ, ani a mɛ̀n basↄↄro donsari tó sĩ̀sĩgɛrɛɛi gwe, à gɛ́ à a sã kũ à sã̀tɛ pì wɛtɛroo?
13Yãpuran matɛn oárɛ, tó à bòa, a pↄ nigↄ̃ nnaa de a mɛ̀n basↄↄro donsari kũ odi sãtɛronↄla.
14Lɛn á De kũ à kú musu ye nɛ́ dínↄ doke sãtɛ sↄ̃ro lɛ.
15Tó n gbɛ̃dake taari kɛ̀, ǹ gɛ́ ǹ a le ndo, ǹ yã pì bonɛ gupuraa. Tó à n yã mà, n n gbɛ̃ pìi milɛ blè.
16Tó adi n yã ma sↄ̃ro, ǹ gbɛ̃ mɛ̀n doke gbɛ̃nↄn pla sɛ́ ǹ namma, de à yã pì sí sèedade gbɛ̃nↄn pla ke aakↄ̃ musu.
17Tó à gì ń yã mai, ǹ yã pì o sↄsi gbɛ̃nↄnɛ. Tó à gì à sↄsi gbɛ̃ pìnↄ yã mai dↄ, ǹ a ditɛ kifiri ke gbɛ̃ zĩ̀tↄ ũ.
18Yãpuran matɛn oárɛ, pↄ́ kũ a yĩ̀ zĩtɛ yĩna musu, pↄ́ kũ a pòro zĩtɛ porona musu.
19Matɛn oárɛ dↄ, tó á gbɛ̃nↄn planↄ lɛ́ kɛ̀ dokↄ̃nↄ zĩtɛ la, yã kũ a a wɛ́ kɛ̀ ma De kũ à kú musua pínki, ani kɛárɛ.
20Zaakũ gu kũ gbɛ̃nↄn pla ke gbɛ̃nↄn aakↄ̃nↄ kↄ̃ kàkaran kũ ma tↄ́o, má kú ń tɛ́.
21Abire gbɛra Pita sù à Yesu là à pì: Dikiri, gɛ̃̀n ũgban mà sùru kɛ kũ ma gbɛ̃ kũ àdigↄ̃ taari kɛmɛnɛoo? Gɛ̃̀n supplan yá?
22Yesu wèa à pì: Matɛn onnɛ, adi kɛ gɛ̃̀n supplanlo, gɛ̃̀n suppla lɛu baaakↄ̃ akurimɛ.
23Abire yãi kpata kũ à bò Luda kĩnaa de lán dí bà. Kína ke mɛ́ à ye à a ↄgↄ yã gↄ̃gↄ̃ kũ a ìbanↄ.
24Kũ à nà ↄgↄ pì yãa, akũ ò sùnɛ kũ gbɛ̃ kũ à a fĩna sɛna miliↄ̃ wàa kuriio.
25Kũ à ↄgↄ vĩ à fĩnaa pì boro, akũ a dikiri pì ò a yía kũ a nanↄo kũ a nɛ́nↄ kũ pↄ́ kũ à vĩnↄ pínki gbasa ò a kɛ̃.
26Akũ ìbaa pìi wùtɛ a dikiri arɛ, à kútɛ kɛ̀nɛ à pì: Ǹ mɛna kɛ kũmao, mani n fĩna bonnɛ pínki.
27Akũ a dikiri a wɛ̃nda gwà a a gbàrɛ, à fĩnaa pìi tònɛ.
28Kũ ìbaa pìi bò dé, à dàkarɛ kũ a ìba dake kũ a fĩna dↄa andurufu ↄgↄ mɛ̀n basↄↄroo. Akũ à a kũ̀, àtɛn ↄ tↄ̃ a kòtooa à pì: Ǹ ma fĩna bomɛnɛ.
29A gbɛ̃dake pìi wùtɛ a arɛ, à kútɛ kɛ̀nɛ à pì: Ǹ mɛnamɛnɛ, mani n fĩna bonnɛ.
30Ama adi wero. À tò ò a dà kpɛ́siran ari à a fĩna bonɛ.
31Kũ a ìba kparanↄ è lɛ, ń pↄ yàka manamana, akũ ò gɛ̀ɛ ò yã kũ à kɛ̀ɛ pìi gbã̀ ń dikiriinɛ pínki.
32Akũ dikiri pì a sìsi à pì: Ìba pãsĩ! Ma n fĩnaa tònnɛ pínki, kũ n kútɛ kɛ̀mɛnɛ yãi.
33Lákũ ma sùruu kɛ̀ kũnwo nà, de n sùru kɛ̀ kũ n gbɛ̃dakeo lɛ se.
34A dikirii pì pↄ fɛ̃̀, à tò ò a dà kpɛ́siran, ògↄ̃ wɛ́ tãa ari à gɛ́ à fĩnaa pì boo pínki.
35Akũ Yesu ɛ̀ra à pì: Tó á baadi dì sùru kɛ kũ a gbɛ̃dakeo kũ nɛ̀sɛɛo mɛ̀n doro, lɛn ma De kũ à kú musu ni kɛárɛ lɛ se.
