1Kũ Yesu yã birenↄ ò à làka, à bò Galili, à gɛ̀ɛ Yudea bùsu kpado Yoda bara.
2Pari tɛ́i, akũ à ń gyãnↄ wèrekↄ̃aḿma gwe.
3Farisi kenↄ sù ò a yↄ̃ ò gwa, akũ ò a là ò pì: Gↄ̃gbɛ̃ zɛ́ vĩ à yìgi dɛ yã sĩnda pínki yãin yá?
4À wèḿma à pì: Kũ Luda ń kɛ́ gↄ̃gbɛ̃ kũ nↄgbɛ̃o ũ zaa káaku, ádi a kyó kɛ a màroo?
5Luda pì, abire yãin gↄ̃gbɛ̃ ni a de kũ a dao tó, ò nakↄ̃a kũ a nanↄo, ń gbɛ̃nↄn pla ni gↄ̃ mɛ̀ do ũ.
6Ò kun pla doro, sé do. Abire yãi gbɛ̃ kũ Luda ń nákↄ̃anↄ, bisãsiri sún ń kɛ̃kↄ̃aro.
7Akũ Farisinↄ a là ò pì: Bↄ́yãi Musa dìtɛ gↄ̃gbɛ̃ yìgidɛtakada kpá a nanↄa à a gbarɛoo?
8Yesu wèḿma à pì: Á sãgbãna yãin Musa á gbá zɛ́ à á nↄnↄ gbarɛ, ama à de lɛ zaa káakuro.
9Matɛn oárɛ, gbɛ̃ kũ à yìgii dɛ̀ kũ a nanↄo, tó adi kɛ à gↄ̃pose kɛ̀nlo, tó à nↄ pãnde sɛ̀, ade zina kɛ̀n gwe.
10Akũ a ìbanↄ pìnɛ: Tó lɛn gↄ̃gbɛ̃ yã de lɛ kũ a nanↄo, à mana ò nↄ sɛ́ro.
11Akũ Yesu pìńnɛ: Adi kɛ gↄ̃gbɛ̃ sĩnda pínki mɛ́ ani yã pì fↄ̃ro, sé gbɛ̃ kũ Luda ń gbá a zɛ́nↄ.
12Zaakũ gbɛ̃kenↄ dì nↄ sɛ́ro, kũ ò ń í lɛ yãi, gbɛ̃kenↄ dìgↄ̃ kun lɛ kũ ò ń fɛ̀rɛɛ kɛ̀ yãi, gbɛ̃kenↄ ń zĩda kũ̀ lɛ kpata kũ à bò Luda kĩnaa yãi. Gbɛ̃ kũ ani yã pì fↄ̃ à fↄ̃.
13Òdi su Yesunɛ kũ nɛ́nↄ de à ↄ naḿma à adua kɛńnɛ, akũ a ìbanↄ gìńnɛ.
14Akũ Yesu pì: À tó nɛ́nↄ mↄ́ ma kĩnaa. Àsun gíńnɛro, zaakũ ń takanↄ pↄ́mɛ kpata kũ à bò Luda kĩnaa ũ.
15Kũ à ↄ nànaḿma, akũ à bò gwe.
16Akũ gↄ̃gbɛ̃ ke sù Yesu kĩnaa, à a là à pì: Dannɛri, bↄ́ manan mani kɛ mà wɛ̃̀ndi kũ àdi lákaro lee?
17À wèa à pì: À kɛ̀ dera ntɛni ma la manakɛna yãii? Luda ado mɛ́ à mana. Tó ń ye ǹ gɛ̃ wɛ̃̀ndii pìi gũn, ǹgↄ̃ a yãditɛnanↄ kũna.
18Akũ à a là à pì: A kpatemɛɛ? Akũ Yesu pì: Ǹsun gbɛ̃ dɛro, ǹsun zina kɛro, ǹsun kpãni oro, ǹsun yã di n gbɛ̃dakearo,
19ǹgↄ̃ bɛ̀ɛrɛ lí n de kũ n daoonɛ, ǹgↄ̃ ye n gbɛ̃dakei lán n zĩda wɛ̃̀ndii bà.
20Kɛfɛnna pìi pìnɛ: Má yã birenↄ kũna pínki. A kpate mɛ́ à gↄ̃̀mɛnɛ dↄↄ?
21Yesu pìnɛ: Tó ń ye ǹgↄ̃ papana, ǹ gɛ́ ǹ n pↄ́nↄ yía pínki, ǹ a ↄgↄ kpá takasidenↄa, ǹ mↄ́ ǹ tɛ́mai, ĩnigↄ̃ aruzɛkɛ vĩ ludambɛ.
22Kũ kɛfɛnna pì yã pìi mà, à tà kũ pↄsirao, kũ à aruzɛkɛnↄ vĩ dasi yãi.
23Akũ Yesu pì a ìbanↄnɛ: Yãpuran matɛn oárɛ, à zĩ'ũ aruzɛkɛdenɛ à gɛ̃ kpata kũ à bò Luda kĩnaa gũn.
24Matɛn oárɛ dↄ, lakumi gɛ̃na pↄrↄwɛɛn araga de aruzɛkɛde gɛ̃na kpata kũ à bò Luda kĩnaa gũnla.
25Kũ a ìbanↄ yã pìi mà, akũ à bò ń sarɛ manamana ò pì: Tó lɛmɛ, dí mɛ́ ani fↄ̃ à surabana lee?
26Akũ Yesu ń gwá tíii, à pìńnɛ: Bisãsiri ni fↄ̃ro. Luda kĩnaa bee pↄ́ sĩnda pínki dì sí kɛ.
27Akũ Pita wèa à pì: O pↄ́ sĩnda pínki tò o tɛnyĩ. Bↄ́ mɛ́ ani gↄ̃wɛrɛ sàa?
28Yesu pìńnɛ: Yãpuran matɛn oárɛ: Tó Bisãsiri Nɛ́ vùtɛ a kíblegba gakuridea andunia dufu gũn, ákↄ̃nↄ kũ á tɛ́mainↄ áni vutɛ kíblegba mɛ̀n kuri awɛɛplanↄa, àgↄ̃ yã gↄ̃gↄ̃ Isaraila buri mɛ̀n kuri awɛɛplanↄnɛ.
29Gbɛ̃ kũ à a bɛ ke a vĩ̀ninↄ tò ke a dakũnanↄ ke a de ke a da ke a nɛ́nↄ ke a buranↄ ma yãi, ade ni ɛra à abire taka le lɛu basↄↄro, akũsↄ̃ ani wɛ̃̀ndi kũ àdi lákaro le.
30Ama gbɛ̃ káakunↄ nigↄ̃ gbɛ̃ kpɛdenↄ ũ dasi, gbɛ̃ kpɛdenↄ nigↄ̃ gbɛ̃ káakunↄ ũ dasi.
