1Ò Yesu ì Bɛtilihamu Yudea bùsun kína Hɛrↄdu gↄrↄa. Akũ susunɛyãdↄ̃rinↄ bò ifãboki kpa, ò sù Yurusalɛmu,
2ò gbɛ̃nↄ là ò pì: Nɛ́ kũ ò ì Yudanↄ kína ũ kú máa? O a susunɛ è ifãboki kpa, akũ o su kútɛnɛ.
3Kũ kína Hɛrↄdu yã pìi mà, à bídi kɛ̀ kũ Yurusalɛmudenↄ ń pínki.
4À Yuda sa'orikinↄ kũ ludayãdannɛrinↄ kàkara ń pínki, akũ à ń lá gu kũ oni Arumasihu in.
5Ò wèa ò pì: Bɛtilihamumɛ zaa Yudea bùsun. Zaakũ lákũ annabii kɛ̃̀ nàn dí:
6Bɛtilihamu kũ à kú Yudanↄ bùsun, ń kĩana Yuda wɛ̃tɛnↄiro fá. Zaakũ n gũnn kína ni bon, kũ ani do ma gbɛ̃ Isarailanↄnɛ arɛ.
7Akũ Hɛrↄdu susunɛyãdↄ̃rinↄ sìsi asiri gũn, à susunɛ pì bogↄrↄ sãnsãn gbɛ̀kaḿma.
8Akũ à ń gbarɛ Bɛtilihamu à pì: À gɛ́ à nɛ́ pì baaru gbɛkagbɛka kũ laakariio. Tó a a è, à su à omɛnɛ, makũ se, mani gɛ́ kútɛnɛ.
9Kũ ò kína yã mà, akũ ò dà zɛ́n. Akũ susunɛ kũ ò è ifãboki kpa yã pìi dòńnɛ arɛ dↄ ari à gɛ̀ɛ à zɛ̀ nɛ́ pì kúkila.
10Kũ ò susunɛ pìi è, ń pↄ kɛ̀ nna manamana.
11Ò gɛ̃̀ kpɛ́n, ò nɛ́ pìi è kũ a da Mariamao, akũ ò kùtɛ ò donyĩ kɛ̀nɛ. Akũ ò ń aruzɛkɛ àkpatinↄ wɛ̃̀wɛ̃, ò a gbà wura kũ turaretitio kũ lí'ↄ gbĩ nnannao.
12Luda òńnɛ nana gũn kũ òsun bↄtɛ Hɛrↄdu kĩnaaro, akũ ò tà ń bùsun kũ zɛ́ pãndeo.
13Ń tanaa gbɛra Dikiri malaikaa bò à sù Yusufua nana gũn à pì: Ǹ futɛ ǹ nɛ́ pì sɛ́ kũ a dao, ǹ bàa lɛ́ ǹ gɛ́ kũńwo Misila, ĩnigↄ̃ kú gwe ari mà su mà yã onnɛ dↄ, zaakũ Hɛrↄdu ni nɛ́ pì wɛtɛ à dɛmɛ.
14Akũ Yusufu fùtɛ gwãani, à nɛ́ pìi sɛ̀ kũ a dao, à gɛ̀ɛ kũńwo Misila.
15À kú gwe ari Hɛrↄdu gɛ̀ɛ à gào. Abirekũ kɛ̀, de yã kũ Dikirii ò annabii gãi kɛ yãimɛ, à pì: Ma a nɛ́ gbɛ̀sɛ Misila.
16Kũ Hɛrↄdu è susunɛyãdↄ̃rinↄ ↄ̃ndↄ̃ kɛ̀arɛ, akũ a pↄ fɛ̃̀ manamana. À susunɛ bogↄrↄ taka dↄ̃ yã kũ à gbɛ̀ka susunɛyãdↄ̃rii pìnↄa yãi, akũ à gbɛ̃nↄ zĩ̀ ò nɛ́gↄ̃gbɛ̃ kũ ò kà wɛ̃̀ pla ke kũ ò kĩ̀ainↄ dɛ̀dɛ Bɛtilihamu kũ a buranↄ pínki.
17Yã kũ annabi Ilimia òo kɛ̀ sà, à pì:
18Ò wiki gbãna mà Rama, òtɛn ↄ́ↄ dↄ, òtɛn wiki pɛ́. Rahila tɛni a nɛ́nↄ ↄ́ↄ dↄ, à gì ò a nɛ̀sɛ kpátɛi, zaakũ ò kun doro.
19Kũ Hɛrↄdu gà, akũ Dikiri malaika bò à sù Yusufua Misila nana gũn
20à pì: Ǹ futɛ ǹ nɛ́ pì sɛ́ kũ a dao, ǹ tá kũńwo Isarailanↄ bùsun, zaakũ gbɛ̃ kũ òtɛn wɛtɛ ò nɛ́ pì dɛnↄ gàga.
21Akũ à fùtɛ à nɛ́ pìi sɛ̀ kũ a dao, à tà kũńwo Isarailanↄ bùsun.
22Kũ à mà Akɛlau mɛ́ àtɛn kí ble Yudea a de Hɛrↄdu gɛ̃nɛ ũ, vutɛna gwe vĩna a kũ̀. Luda yã ònɛ nana gũn, akũ à tà Galili bùsun,
23à gɛ̀ɛ à vùtɛ wɛ̃tɛ kũ òdi pi Nazɛra gũn. Lɛn yã kũ annabinↄ òo pàpa, kũ ò pì: Oni a sísi Nazɛra gbɛ̃.
