1Gↄrↄ birea kpata kũ à bò Luda kĩnaa nigↄ̃ de lán nↄkpare gbɛ̃nↄn kuri kũ ò ń fitilanↄ sɛ̀ ò bòo, òtɛn gɛ́ da nↄsɛrilɛ bàmɛ.
2Ń gbɛ̃nↄn sↄↄronↄ bi yↄ̃nkↄnↄmɛ. Ń gbɛ̃nↄn sↄↄronↄ sↄ̃ laakaridenↄmɛ.
3A yↄ̃nkↄnↄ ń fitilanↄ sɛ̀ nísi zànaa sari,
4a laakaridenↄ sↄ̃ ò ń fitilanↄ sɛ̀ kũ nísi zànaao.
5Nↄsɛri dí su likalikaro, akũ i ń sɛ́ ń pínki, òtɛn i o.
6Lizãndo ò wiki lɛ̀: Nↄsɛri tɛn su! À futɛ à gɛ́ daalɛ.
7Akũ nↄkpare pìnↄ vù ń pínki, ò ń fitilanↄ kɛ̀kɛ.
8Akũ yↄ̃nkↄnↄ pì laakaridenↄnɛ: À ó gba nísi fíti sàee! Ó fitila tɛn ga bi!
9Akũ laakaride pìnↄ wèḿma ò pì: Ani mↄ́wá kãáo pínkiro. À gɛ́ à á pↄ́ lú a yìarinↄ kĩnaa.
10Kũ ò gɛ̀ɛ lú, akũ nↄsɛrii kà. Gbɛ̃ kũ ń soru kɛ̀nↄ gɛ̃̀ kãao nↄsɛ gũn, akũ ò gbàa tàta.
11Kũ à kɛ̀ saa nↄkpare kpara pìnↄ sù, òtɛn lɛ́ zu: Dikiri, Dikiri! Ǹ zɛ wɛ̃wɛrɛ!
12Akũ à wèḿma à pì: Yãpuran matɛn oárɛ, má á dↄ̃ro.
13Abire yãi á wɛ́ gↄ̃ dↄ, zaakũ á a gↄrↄ ke a gↄrↄ zaka dↄ̃ro.
14Kpata kũ à bò Luda kĩnaa de lán gbɛ̃ kũ àtɛn gɛ́ wɛ̃tɛaa bà, akũ à a zĩkɛrinↄ sìsi, à a aruzɛkɛ nàńnɛ ń ↄĩ.
15À ↄgↄda kɛ̀ ń gbɛ̃ donɛ sↄ̃̀nↄ sↄↄro, gbɛ̃ plade sↄ̃̀nↄ pla, gbɛ̃ aakↄ̃de sↄ̃̀nↄ do, ń baadi gbãna lɛ́n, akũ à gɛ̀ɛ wɛ̃tɛa.
16Sↄ̃̀nↄsↄↄrode gɛ̀ɛ à laga tà kũ ↄgↄ pìio gↄ̃̀nↄ, akũ à àree lè sↄ̃̀nↄ sↄↄro.
17Sↄ̃̀nↄplade kɛ̀ lɛ dↄ, akũ à àree lè sↄ̃̀nↄ pla.
18Sↄ̃̀nↄdode sↄ̃ à gɛ̀ɛ à wɛ̀ɛ yↄ̃̀, akũ à a dikiri ↄgↄ pìi ùtɛn.
19Gↄrↄ pla gbɛra zĩkɛrii pìnↄ dikirii sù, akũ àtɛni a ↄgↄ yã gↄ̃gↄ̃ kũńwo.
20Sↄ̃̀nↄsↄↄrode sù kũ sↄ̃̀nↄ sↄↄro pãnde kũ à lèeo à pì: Dikiri, ǹ sↄ̃̀nↄ sↄↄro kũ n kpàma gwa, à àree kàramɛnɛ sↄ̃̀nↄ sↄↄro dↄ.
21Akũ a dikirii pìnɛ: N kɛ̀ zĩkɛri mana náanide! Lákũ ń náani vĩ kũ a fítio nà, mani a zↄ̃kↄ̃ nannɛ n ↄĩ sà. Ǹ gɛ̃ ma pↄnnakɛnaa gũn.
22Sↄ̃̀nↄplade sù dↄ à pì: Dikiri, ǹ sↄ̃̀nↄ pla kũ n kpàma gwa, à àree kàramɛnɛ sↄ̃̀nↄ pla dↄ.
23Akũ a dikirii pìnɛ: N kɛ̀ zĩkɛri mana náanide! Lákũ ń náani vĩ kũ a fítio nà, mani a zↄ̃kↄ̃ nannɛ n ↄĩ sà. Ǹ gɛ̃ ma pↄnnakɛnaa gũn.
24Akũ sↄ̃̀nↄdode sù sà à pì: Dikiri, má dↄ̃ kũ n yãnↄn zĩ'ũ. Ndì pↄ́ kɛ̃ gu kũ ńdi tↄ̃nlo. Ndì pↄ́ kakara gu kũ ńdi gbɛ̃nlo.
25Akũ vĩna ma kũ, ma gɛ ma n ↄgↄ ùtɛ wɛ̀ɛn. N pↄ́n dí.
26Akũ a dikirii pìnɛ: Zĩkɛri vãni ma'ãde! Ń dↄ̃ kũ madì pↄ́ kɛ̃ gu kũ mádi tↄ̃nlo, madì pↄ́ kakara gu kũ mádi gbɛ̃nloo?
27À mana yã n ↄgↄda kɛ̀o gbɛ̃kenɛ, de tó ma su, mà a pↄ́ sí kũ a ío.
28À sↄ̃̀nↄ do pì sía à kpá sↄ̃̀nↄsↄↄrodea.
29Zaakũ gbɛ̃ kũ à pↄ́ vĩn Luda ni karanɛ ari àgↄ̃ din. Gbɛ̃ kũ à vĩro sↄ̃, bee pↄ́ kũ à vĩ Luda ni síamɛ.
30Zĩkɛri pã dí sↄ̃, à a zu bàai gusiran. Gwen oni ↄ́ↄ dↄn ò ↄ di ń mìia.
31Tó Bisãsiri Nɛ́ sù a gakuri gũn kũ a malaikanↄ ń pínki, ani vutɛ a kíblegba gakuridea.
32Andunia burinↄ ni kakara a arɛ ń pínki, ani ń kɛ̃kↄ̃a, lákũ pↄ́dãrii dì sãnↄ kɛ̃kↄ̃a kũ blènↄ nà.
33Ani sãnↄ kpá a ↄplai, blènↄ sↄ̃ ↄzɛi.
34Abire gbɛra Kína pì ni pi gbɛ̃ kũ ò kú a ↄplainↄnɛ: Ákↄ̃nↄ kũ ma De arubarikaa dàágunↄ, à mↄ́ à kpata kũ à a soru kɛ̀árɛ zaa anduniakatɛna gↄrↄ ble.
35Zaakũ kũ nà tɛni ma dɛ, a pↄ́ble kpàma. Kũ ími tɛni ma dɛ, a í kpàma. Kũ má kun nibↄ ũ, a ma si.
36Kũ má kun punsi, a asiri tàmɛnɛ. Kũ matɛn gyã kɛ, a ma gwa. Kũ ò ma da kpɛ́siran, a su wɛ́ kpàtɛmai.
37Gbɛ̃ mananↄ ni pinɛ: Dikiri, bↄrɛn o è nà tɛni n dɛ o pↄ́ble kpàmma ke ími tɛni n dɛ, o í kpàmmaa?
38Bↄrɛn o n e nibↄ ũ o n si, ke ń kun punsi o asiri tànnɛɛ?
39Bↄrɛn o n e ntɛn gyã kɛ, ke ò n da kpɛ́siran o gɛ wɛ́ kpàtɛnyĩi?
40Kína pì ni weḿma à pi: Yãpuran matɛn oárɛ, yã kũ a kɛ̀ gbɛ̃ kĩanaanɛ ma gbɛ̃ dínↄ tɛ́, makũmɛ a kɛ̀mɛnɛ.
41Abire gbɛra ani pi gbɛ̃ kũ ò kú a ↄzɛinↄnɛ: À gomɛnɛ gwe ákↄ̃nↄ kũ Luda lɛ́ kɛ̀árɛnↄ! À tá tɛ́ kũ àdi garo kũ Luda kɛ̀kɛ Ibilisinɛ kũ a ìbanↄ gũn.
42Zaakũ nà tɛni ma dɛ, ádi pↄ́ble kpámaro. Ími tɛni ma dɛ, ádi í kpámaro.
43Má de nibↄↄ ũ, ádi ma síro. Má kun punsi, ádi asiri támɛnɛro. Matɛn gyã kɛ ke ò ma da kpɛ́siran, ádi su à wɛ́ kpátɛmairo.
44Oni gbasa ò a la ò pi: Dikiri, bↄrɛn o n e kũ nàao ke ímio ke nibↄ ũ ke punsi ke gyãre ke purusuna ũ, akũ ódi kpányĩroo?
45Kína ni weḿma à pi: Yãpuran matɛn oárɛ, lákũ ádi kɛ gbɛ̃ kũ à kĩanaanɛ gbɛ̃ dínↄ tɛ́ro nà, makũmɛ ádi kɛmɛnɛro.
46Gbɛ̃ birenↄ ni tá wɛ́tãmma kũ àdi lákaro gũmmɛ, gbɛ̃ mananↄ sↄ̃ wɛ̃̀ndi kũ àdi lákaro gũn.
