1Gↄrↄ kũ̀a bùsuu pì kína Hɛrↄdu Yesu baaruu mà.
2Akũ à pì a ìbanↄnɛ: Gbɛ̃ pì bi Yahaya Da'itɛkɛriimɛ. À vù bona gan. Abire yãin à gbãna lè àtɛn daboyãnↄ kɛ.
3Zaakũ Hɛrↄdu Yahaya kũ̀ yã, à mↄ̀ↄ kàa, à a dà kpɛ́siran a vĩ̀ni Filipi nanↄ Hɛrↄdia yãi.
4Zaakũ Yahaya dìgↄ̃ pinɛ: N Hɛrↄdia kũna nↄ ũ zɛ́ vĩro.
5Hɛrↄdu ye à a dɛ, ama àtɛn vĩna kɛ gbɛ̃nↄnɛ, zaakũ ò a annabikɛ sì.
6Hɛrↄdu igↄrↄ làa kↄ̃kↄ̃ zĩ Hɛrↄdia nɛ́nↄkpare ũ wã̀ gbɛ̃ kũ ò sù gwenↄnɛ, akũ à kɛ̀ Hɛrↄdunɛ nna manamana.
7Akũ à lɛ́ sɛ̀ à pì: Ma la dà kũ mani n gba pↄ́ kũ n a wɛ́ kɛ̀ma pínki.
8Akũ a da yã kàkanɛ à pi: Ǹ ma gba Yahaya Da'itɛkɛrii mì dana tiree gũn la tera.
9Akũ kína pↄ yàka, ama kũ à la dà nibↄnↄ wára yãin à pì ò kpáa.
10Akũ à gbɛ̃ zĩ̀ ò Yahaya mìi zↄ̃̀ kpɛ́siran.
11Kũ ò sù kũ a mìio dana tiree gũn, ò kpà nɛ́ pìia, akũ à gɛ̀ɛo a danɛ.
12Akũ Yahaya ìbanↄ sù ò a gɛ̀ɛ sɛ̀ ò vĩ̀, akũ ò gɛ̀ɛ ò ò Yesunɛ.
13Kũ Yesu yã pìi mà, akũ a gɛ̃̀ gó'itɛ gũn, àtɛn gɛ́ gusarɛ de àgↄ̃ kú ado. Kũ gbɛ̃nↄ mà, ò bò wɛ̃tɛ kũ wɛ̃tɛo dasi ò pɛ̀tɛi gɛ̀sɛ.
14Kũ Yesu bò gó gũn, à gbɛ̃nↄ è dasidasi, akũ ò kɛ̀nɛ wɛ̃nda, akũ à ń gyãrenↄ gbà aafia.
15Kũ ↄkↄsi kɛ̀, a ìbanↄ nài ò pì: Gu díkĩna bi sɛ̃̀ntɛpↄrↄtumɛ, akũsↄ̃ gu tɛn si. Ǹ gbɛ̃nↄ gbarɛ ò tá lakutunↄ gũn, ò pↄ́ble wɛtɛ ò lú.
16Akũ Yesu wèḿma à pì: Adi kɛ tilasi ò táro. À pↄ́ kpáḿma ò ble.
17Akũ ò pìnɛ: Burodi mɛ̀n sↄↄro kũ kpↄ̀ mɛ̀n plaon ó vĩ la.
18Yesu pìńnɛ: À mↄ́omɛnɛ la.
19À ò gbɛ̃ pìnↄnɛ ò vutɛ sɛ̃̀ɛa, akũ à burodi mɛ̀n sↄↄro kũ kpↄ̀ mɛ̀n pla pìio sɛ̀, à a wɛ́ sɛ̀ musu, à arubarikaa dàn. Akũ à burodii pìi lìlikↄ̃rɛ à kpà a ìbanↄa, ò kpàatɛtɛ gbɛ̃nↄnɛ.
20Ò pↄ́ blè ò kã̀ ń pínki. Akũ ò a kpara kũ ò gↄ̃̀nↄ sɛ̀tɛ tãnko mɛ̀n kuri awɛɛpla pà.
21Gↄ̃gbɛ̃ kũ ò pↄ́ blènↄ kà gbɛ̃nↄn dúbu sↄↄro taka, nↄgbɛ̃nↄ kũ nɛ́nↄ baasi.
22Yesu gã nà a ìbanↄa gↄ̃̀nↄ ò gɛ̃ gó'itɛn, ò donɛ arɛ gɛna sɛ̀bɛɛ bara dire ari àgↄ̃ pari gbarɛ.
23Ń gbarɛnaa gbɛra, à dìdi sĩ̀sĩi musu à adua kɛ ado. Gu tɛn si, à kú gwe ado.
24Gó'itɛ pìi kà zã̀ kũ í lɛ́ao, akũ í tɛni góro pì yĩpayĩpa kũ zàga'ĩa kàkańyĩ yãi.
25Gudↄo Yesu gɛ̀ɛ ń kĩnaa, àtɛn táa o íla.
26Kũ ò a è àtɛn táa o íla, akũ swɛ̃̀ɛ kɛ̃̀ńgu ò pì: Gyãwãndemɛ! Ò wiki lɛ̀ kũ vĩnao,
27akũ Yesu pìńnɛ gↄ̃̀nↄ: À á laakari kpátɛ, makũmɛ! Àsun tó vĩna á kũro.
28Akũ Pita pìnɛ: Dikiri, tó mↄkↄ̃mmɛ, ǹ tó mà táa o íla mà su n kĩnaa.
29Akũ Yesu pì: Ǹ mↄ́! Akũ Pita bò gó gũn, àtɛn táa o íla, àtɛn gɛ́ a kĩnaa.
30Kũ à è ĩa tɛn káka, akũ vĩna a kũ̀. Àtɛn vlɛ̃, akũ à wiki lɛ̀ à pì: Dikiri, ǹ ma sura ba.
31Gwe gↄ̃̀nↄ Yesu ↄ bò à a kũ̀, akũ à pìnɛ: Ludanaanikĩanade! Bↄ́yãi n sikaa kɛ̀ɛ?
32Kũ ò gɛ̃̀ gó gũn, ĩa zɛ̀.
33Akũ gbɛ̃ kũ ò kú gó gũnnↄ donyĩ kɛ̀nɛ ò pì: Luda Nɛ́mɛ n ũ yãpura.
34Kũ ò bikũ̀ bara, ò kà Gɛnɛsarɛti bùsun.
35Gwedenↄ Yesu dↄ̃̀, akũ ò a baaruu dàgula bùsuu pìn gu sĩnda pínki, akũ ò mↄ̀nɛ kũ gyãrenↄ ń pínki.
36Ò wɛ́ kɛ̀a de ò ↄ na bee a uta lɛ́a. Akũ gbɛ̃ kũ ò ↄ nàanↄ wèrekↄ̃a ń pínki.
