Mark 7:24-35

²⁴Jesus ra apmer Tyre-warl alhek, warl ingwer-kenhel aney-alhek. Jesus-el renh-rnem ilek, “Ingwer-rnem iley-angenh, rernem ayenh arlkarewerl-anekerr. Ayeng artenyel aneyel, atha kwertengerl atyenh-rnemantarl akaltyilem.”

²⁵Arelh apmer Phoenicia-areny ra awek, Jesus-arl aney-alhek warl ingwer-kenhel. Arelh alethang anyent Greek, angka ingwer angkenh, Jew-kenh angkeweny. Ra Jesus-warl alhek, kwenirrey-alhemel, ampwethel alernelhemel. Kwey ikwerenh arrenty apmwakertarl anenh. Amikwel Jesus renh ayernek, “Ampa atyenh-kety, ntwa arrenty irrenta!”

²⁷Jesus angkek, “Nthakenh atha ingwer-rnem arntarnt-arey-angenh. Anwantherr ampernem-tangkwel wantey. Atha atyenh-rnemantarl, Jew-rnem arntarnt-areyel. Rernem ampernem-apeny atyenh. Arengk-rneman ampel-rnem arlkwenty-penhant wantey. Atha atyenh-rnem, Jew-rnem-tangkwel arntarnt-areyel. Atha arrenty-rnem Jew-rnem-kety irrentem.”

²⁸Arelh anyent angkek ikwer, “Arengkel-rnem arlkwetyek arrpemarl, arengk-kenh amernan rernem iweyek arrpemarl. Jew-rnem rernem ingkerrenh atyenh-rnem-kety arlkarirreyel. Atyenh-rneman arengk-apenyarl aneyel, Jew-rnem-angkwarr. Jew-rnemel renh-rnem arntarnt-arey-angenh. Atha ngenh iterl-areyel, ntwa ingkerrenh arntarnt-arey-angker. Ayenh-then arntarnt-ara!”

²⁹Jesus-el arelh ilek, “Nga arraty atyeng-warl angkek. Kel arrenty tyerrelhemel alpek kwey ngkwenh-they.”

³⁰Arelh apmer ikwerenh-warl alpek. Ra arek, arrenty kel tyerrelhemel alpenty kwey ikwerenh-they.

³¹Jesus alpek apmer Tyre-ampeny-they, apmer Sidon-angkwarr, Galilee kwaty ilkwewarl. Ra apmer Decapolis-angkwarr alhek.

³²Artwa ingwer-rnemel artwa anyent atnwenhek Jesus-warl. Ra angkey-angenh, iylpa arwengk awey-angenh akerter. Rernem Jesus renh ayernek, ra renh mwerriletyek, iylpa altyweriletyek, mwerr-anem ra angketyek.

³³Jesus-el artwa anyent renh tawen-they akwerr-warl atnwenhek. Jesus-el itep-atherrel iylpatherr-warl arrernek, artwa arwengk ikwer-warl. Jesus-el itep ikwerenh-warl apelh arrernek. Ra aleny artwa arwengk renh itepel arnep-arnek, ra mwerr angketyek, awetyek.

³⁴Jesus-el irrwerl alker itnywenek, angkemel, “Iylpatherr irrpelthel altywerila!”

³⁵Ikwer-penh artwa ra mwerr-anem aweyel-anem, mwerr-anem angkeyel-anem.