Mark 6:5-38

⁵Ioar ih johpwa wiahda manman oau nehn ah wijahu, a min johmwehu pwi ma ih kihda poah puwoa, kemwehuwihla.

⁶Ih ken pwuriamweikihla ahr joah pwojon. Jesus aluhjili nehn koujapw kan, padpadahk oang armaj kan.

⁷Mwerin, ih panginpene eijek roahmenno, kadarpijoang wad roahmen. Ih kioang arai manman in kajroahjang ngen jaus kan.

⁸Ih pwehng arai en johpwa wa mehkij nehn arai jeiloak oauwe, ioarroar jokonpas; arai en johpwa wijik mwinge ke pehk in jeiloak, ke mwani nehn ahr pwoaloj kan.

⁹Arai kak sandel, a arai en joah wahda joakid riahu mihn ngalngal.

¹⁰Ih pel pwehng arai “Nehn amwai pirin lel ekij wija, kamwai minminehr ipen arai ma kajamwo kamwai nehn umwaraihok, oaroh kamwai injang wijahu.

¹¹A wijahkij ma arai johpwa nimen kajamwo kamwai ke nimen rong kamwai, kamwai diljang wijahu jiped jang pwirejpar in pwoalkoamwai mihn kapoahm oau me oang arai.”

¹²Min eijek roahmenno ken aluhpijoang kapahrak oang armaj ohroj arai en koaluhla apel wiliakapwla.

¹³Arai kahuj jang ngen jaus dir ipen armaj kan apel salipki le min johmwehu dir kemwehuwihla arai.

¹⁴Nahmwarki Herod rongda mehpwiai ohroj, pwa Jesus wadwadla wija ohroj. Epwi pwahpwahpwa pwa ma John Johnpoapdaij ioar ne pwuroahng mourda, Ioar kahrehda ih kak wia joangoan manman pwiak.

¹⁵Epwi pwa ih Elijah. Epwi pwahpwahpwa pwa johkohp men ih, doahroar epwi johkohp in mehjjok.

¹⁶Nehn en Herod rongda me, ih pwa, “Ioar John Johnpoapdaij me, ma ngoahi poaloahjang moange, ih ne pwuroahng mourda.”

¹⁷Pwa ih kadarla John en joaldi, ih pwa en peidek oang nehn kalpwuhj pwa Herodias, pahien riahu Philip ioar Herod wud painkihla.

¹⁸John Johnpoapdaij johkin uhdihjang koapwung oang Herod ah japwunngo, ih pwa, “Johpwa pwung koawoa painkihla pahien rioammwo.”

¹⁹Ioar kahrehda Herodias lioasoangkihda John, nimen kojukdi; a johkak;

²⁰pwa Herod kin mijik John, pwa ih kidal pwa John woal pwung apel joarwi men. Ioar mehwa ih ken kin jiloahjang me nauna apel kin perenki rong ah sikesik kan, mihndahr ma nehn kapehdin kin soausoaula anjoau ohroj nehn ah kin rong.

²¹Doari Herodias kidalda anjoau mwehu rehnin en Herod noaisikdiho. Pwa rehnno Herod wiahda kamdipw oau oang nah joumaj kan, oang koaunin nah karejjok, apel oang armaj laplapin wein Galilee.

²²Doari nihn Herodias jerpeinno pwokdo kahkahlek in kamdippwo; Herod apel sohn kamdippwo inenin perenkihda. Ioar Herod pwehngkihoang jerpeinno, “Mine mehkij koawoa anahne? Poaki ipoai, pwa ngoahi pirin kioang koawoa.”

²³Ih ken kahula apel inoaukihdi pwa, “Ngoahi pirin kihwe mehkij joah lipilpil, mihnda ma pel oaloap in oai wei.”

²⁴Jerpeinno dilla idoak ipen ah nohnohu, pwa, “Nohno, da ngoahi en poaki?” A ah nohnohu japoang pwa, pwa, “Moangoan John Johnpoapdaij.”

²⁵Jerpeinno pwurlahng ipen nahmwarkiho, pwehng ih, “Noah nimen koawoa kihdoahng ngoahi apkas moangoan John Johnpoapdaij nehn oau pleis en!”

²⁶Me ken kainjinjuwedihla nehn kapehdin nahmwarkiho; ih ken johpwa nimen kainjinjuwedihla jerpeinno pwa ih inoau mwohn sohn kamdippwo ohroj.

²⁷Doahr ih ken pispis kadarla nah johnpei, pwehng pwa moangoan John Johnpoapdaij en wijikdo. Johnpeiho inlahr nehn kalpwuhjjo, poaloa jang moangoan John Johnpoapdaij.

²⁸Ih pwurdo wa moangehu nehn pleis oau, ih ken kioang jerpeinno; jerpeinno ken wud kioang ah nohnohu.

²⁹Nehn nihn John sohnpadahkkok rongda me, arai pwurla oaloa palwoaroa wahla jaripdi nehn joaujoau oau.

³⁰Mwerin woaroakkok ahr pwurpene, arai pokonpene ipen Jesus pwa arai en kajalehioang me ohroj ma irai ne wiahda apel padahk ohroj ma arai kawoahwoahda.

³¹Armaj dir kin pwurpwuroa Jesus apel nah sohnpadahkkok kahrehda johla anjoau in arai mwinge. Ioar Jesus pwehngkihoang sohnpadahkkok, “Kisai inla kalahpwukla mijkoalkoal nehn japwsoahnno, wijahu ma kamwai kak koammoal.”

³²Arai ken doauda pohn pohs oau pwa arai en inlahng kalahpwukla wija kij.

³³A armaj dir kapang arai mwoakid doahr ken kidal da. Arai ken kijoulahng wijahu jang nehn kahnihmmwok, arai lelo mwohrai.

³⁴Nehn en Jesus doaudihjang pohn pohsso, ih kapangda pokon koalik oau, ih ken ipwilkihda irai. Pwa arai doahroar polohn jihpw oau ma ne joh jileperai. Doari, ih ken sapda kawoahwoahng arai joang dir.

³⁵Injoausik pene, nah sohnpadahkkok indoa ipoa, pwehng ih, “Maing, ne pwong a japwsoahn oau me.

³⁶Ken kadarpijoang pokon oauwe, pwa irai en alwe nehn kahnihmw siksik kan apel koujapw koaroan kan pwa irai en pein dupukda kanrai mwinge.”

³⁷A Jesus japoang irai pwa, “Kamwai kapwa kamwinge irai.” A irai pwehng ih, “Doari, koawoa mwehuki kamai en inla dupukda mwinge woahroar mwani silper riepwiki kamwingehki irai?”

³⁸Jesus idoak, “Lopwonin pilahwa doapoa mine ipamwai? Kamwai kapang apel wadek.” Nehn ahr ne wadekda irai pwehng ih, “Lopwonin pilahwa limoau apel mwumw roahmen.”