Mareko 6:5-38

⁵Iŋuc jumbiŋte jaŋerao mâsi baocte quŋkewec. E mâc ŋic huchec moc moc sawa mezi bâuac‐jopahuc ɋiɋicne bacjopawec.

⁶Ehuc maŋjeŋic boc sakarembiŋte secke‐jarewec. Eme hae râreckerâ ŋerawec ira ra juhuc miti jaza qazuc ewec.

⁷Eku motecfâcne 12 hefârec‐joparâ jajahec jajahec sasawa miti muniŋte fuŋkerâ sorec‐jopawec. Ehuc demoŋ jâpe‐jareniŋte tâpiri râe‐jarerâ ʒiŋuc jazawec.

⁸“Ŋoŋe wiac moc mi baranʒepieŋ, gunu sawa, nânâ aricne, he aricne, moneŋ aricne.

⁹Kikehuhu ine rojunʒepieŋ, erâ ŋaqi maŋne sahacne misac, mocjaha hepie huzejec.”

¹⁰Iŋuc murâ ʒiŋuc jazawec: “Hae mocko fisirâ fic feniŋmu ijaha ŋec foc eku waha ranʒepieŋ.

¹¹Hae moc ira fisipie âgo mi eŋarehuc dâŋŋeŋic qikiŋnepie râpec‐joparâ kike‐ŋeŋickonec gâc wândoc‐jeŋic âteickepie wahame jaŋe fuŋne‐jeŋic mananʒepieŋ.”

¹²Iŋuc mume jaŋe rarâ ŋic maŋjeŋic bârisieniŋte miti jazambiŋ.

¹³Ehuc demoŋ bocjaha jâpe‐jarembiŋ â huchec bocjaha wâc wokemaŋ rua‐jarehuc ɋiɋicne bacjopambiŋ.

¹⁴Jesure biŋedâŋ haŋ baraku ŋicwofuŋ Heroderao fisime manawec. Manarâ muwec, “Johane Miti Opâ fufuŋke e hâmockonec ɋâreweczi tâpiri sâkohec jukac hâcne.”

¹⁵Ŋic gâcne jaŋe ine Jesure ʒiŋuc mumbiŋ: “E Elia.” Gâcnezi mumbiŋ. “E porofete moc, porofete mimiŋne jaŋe iŋucne.”

¹⁶Herodezi ine manarâ muwec, “Aricne, Johane upene qâtâcnepo e hâcne ɋârewec jukac.”

¹⁷Herode e mârâcko momori ejareme Johane rorâ kâpâcwâru bambiŋ. Qanaŋ juwicnao Herodezi ɋaticne Filipo ere ŋonâŋ ʒâŋene Herodia jâoc rowec, ŋokac ere erâ Johane iŋuc ecnewec.

¹⁸Ine Johanezi Herode ʒiŋuc âzâcnewecte: “Go ɋagere ŋonâŋ bameŋ i sâcmutâc qaqa ekac.”

¹⁹Iŋuc mume Herodia e Johane aaric manacnehuc qaocte maŋne kâcɋene domawec, erâ ine hata basawec.

²⁰Herode eki ine Johanere ŋic tiŋne â mitihec muhuc araŋ bacnehuc ŋezickewec. Â micticnaonec dâŋ manarâ maŋgu qâŋguru ewec. Erâ sifu dâŋticne mana aŋac ewec.

²¹Eme juku wiac kecʒiŋuc fuawec: Herode e fufua dameŋ‐ticne maickeme kia sâkofâcne â momori soŋaŋ kâcɋene â Galilaia mâreŋkonec ŋic fekicne hetumaŋ‐jopa‐fârerâ tiwâ ʒepec ejarewec.

²²Eme jaŋe tumaŋnerâ ŋehapie Herodia otâ‐ticne jaŋerao ferâ mai‐jeŋicko gae wowec. Gae wome Herode â ŋicfâc‐ticne jaŋe honerâ aŋac‐jopawec. Eme Herodezi naru ʒiŋuc âzâcnewec: “Go wiac irec me irec egareme mutec garepemu.”

²³Murâ Femicnere maio musanaŋkerâ muwec, “Wiac kosare mutec garepemu â mâreŋ‐nanere mutec i wâc bâtâc barâ ŋifecne qikiŋne‐garepemu.”

²⁴Eme naru e rarâ neŋgoc‐ticne wiocnerâ muwec, “No wemo wiacte mupe?” Mume eki âzâcnewec, “Johane Miti Opâ fufuŋke qizec‐ticnere muc.”

²⁵Eme naru e biac gasackerâ ŋicwofuŋtao rarâ muwec, “Go Johane Miti Opâ fufuŋke ere qizec ʒiŋuczia râqâcko râerâ narec.”

²⁶Mume ŋicwofuŋ e bune bocjaha sâqorewec. Erâ Femicnere maio mupaŋkewecte â ŋic ŋembiŋ jaŋerao dâŋticne wahazacte manacnewec.

²⁷Ehuc biac jaha momori moc ra Johane qizec‐ticne bareocte sorewec. Eme eki kâpâcwâru ficko rarâ Johane upene qâtâcnerâ

²⁸qizecne râqâcko râeme hume bafisi naru râcnewec. Râcneme naruzi neŋgoc‐ticnerao barawec.

²⁹Eme Johane motecfâcne biŋe manarâ ra qâŋɋâŋ‐ticne rorâ duckembiŋ.

³⁰Aposolo jaŋe hae mâreŋ jufârerâ risierâ Jesurao tumaŋnehuc wiac embiŋ bambiŋ â miti mumbiŋ irec binaŋ sasawa bacnembiŋ.

³¹Bacne‐fârepie ʒiŋuc jazawec: “Warepie tuhuo ranaŋ, ira piticne juhuc âke mâteŋ‐ŋopaoc.” Ŋic wemo afecne ʒuʒuhuczi ʒuʒuhuc fisihuc ra, fisihuc ra, iŋuc ehuc domapie wemocko ŋemanahuc nânâ opâ nanʒapiŋ.

³²Eme jaŋe bucjeŋic wokeo ferâ tuhuo rambiŋ.

³³Rahapie bocjahazi hone tarac‐joparâ haene haene qaja fuserâ tiŋko biac gasackerâ bâbâni ra fisimbiŋ.

³⁴Eme Jesuzi wokeonec waharâ ŋic ŋokac guru sâko honec‐joparâ, lama soŋaŋ tâmiric tinac jumbiŋte busâqoc mana‐jarewec. Iŋuc honec‐joparâ izia fuŋkerâ mitire dâŋ bocjaha jazawec.

³⁵Ehame qâqâtâc âkesue rame honerâ motecfâcne jaŋe erao rarâ mumbiŋ, “Ʒi tuhuo juhapene qâqâtâc biac âkesue rakacte

³⁶ŋic râec‐jopatec hae ŋerakac ira rarâ nânâ furine ba nâc enʒepieŋ.”

³⁷Mupie ʒiŋuc jazawec: “Ŋoŋe ŋaŋac moc gumec‐jopaniŋ me.” Jazame mumbiŋ, “Nâŋe rarâ 20 kina nânâ furine barâ ware gumec‐jopanaŋte mukomec me?”

³⁸Eme eki jazawec, “Ŋaŋacne nânâ wezimuc fokac, ra honeniŋ.” Mume jaŋe ra honerâ âzâcnembiŋ, “Poroŋ memoc â opâ qowi jajahec.”