San Marcos 6:5-38

⁵Ndoicatui mbahe oporomondɨi vahe apo ãgua ava vɨroyaẽhɨsa pɨpe, sese movɨro tẽi imbaheasɨ vahe harɨve omondo opo imbogüera ãgua.

⁶Ndoyembovɨhai ava vɨroyaẽhɨsa rese. Ipare Jesús oso, oguata tecua-tecuami namombrɨi vahe rupi oporombohe oico.

⁷Evocoiyase, “Perio” ehi güemimbohe doce vahe upe. Ipare oyocuai ñuvɨrío-río, iyavei omondo güeco pĩratasa caruguar mboyepepɨ ãgua chupe.

⁸—Ndaperasoi chira rumo mbahe peguatasa rupi, pe pococa güeraño ité perasora —ehi—. Ndiyai avei peraso mbahe rɨru, pan, guarepochi avei.

⁹Iyavei pemondera pɨtaqui güeraño. Ndapemondugüei chiaveira pe camisa seraso.

¹⁰—Que pesosave peiquese oɨ pɨpe, pepɨtaño ipɨpe, ichuive tuprɨño ité pesẽra pecua.

¹¹Acoi ambuae tecua pendar ndape pɨsɨ potaise, ndosendu potaise avei pe ñehe yuvɨreco, peyepepɨñora ichui. Peipɨpeteño aveira pe pɨ ɨvɨ rãtachigüer sui. Ẽgüe pe hesa omboyecuara cañɨsa apɨrẽhɨ yuvɨreco chupe —ehi.

¹²Evocoiyase semimbohe eta yuvɨraso, “Pemboasɨ pe angaipa, peyevɨ Tũpa upe” ohe ãgua yuvɨreco.

¹³Iyavei setá omboyepepɨ caruguar ava sui, setá avei omondo mbahe quɨra ava imbaheasɨ vahe rese imbogüera ãgua yuvɨreco.

¹⁴Mborerecuar guasu Herodes oyandu ñehesa Jesús resendar, iyavei opacatu rupi oicua yuvɨreco. Sese Herodes aipo ehi: —Juan Oporoãpiramo vahe revo ocuerayevɨ. Sese oyapo poromondɨisa ipĩrata vahe —ehi.

¹⁵Ambuae rumo, —Tũpa ñehe mombehusar Elías mo evocoi —ehi yuvɨreco. Ambuae evocoiyase, —Tũpa ñehe mombehusar aracahendar mo evocoi —ehi yuvɨreco.

¹⁶Osenduse Herodes co nungar ñehesa, aipo ehi: —Juan ité niha evocoi che añaca asɨa uca vahecuer, ahe cũritei ocuerayevɨ —ehi.

¹⁷Herodías recocuer sui tẽi niha Herodes Juan oñapɨchi uca carena pɨpe soquenda. Esepia, co cuña Herodías yɨpɨndar Felipe rembireco, co Felipe Herodes rɨvrɨ viña. Herodes rumo omendaño vɨvrɨ rembireco rese.

¹⁸Juan aipo ehi Herodes upe: “Ndiyai eté nde ererecora nde rɨvrɨ rembireco” ehi.

¹⁹Herodías evocoiyase oyuca pota Juan yamotarẽhɨsave; ndoicatui rumo yuca.

²⁰Esepia, Herodes osɨquɨyeño ichui oicuase co mbɨa reco tuprɨ aisa iyavei seco maranehɨse. Sese osepɨ ité; yepe ndoyembohe catui osenduse iñehe viña, ahe rumo osendu pota raiño ité.

²¹Coiye rumo osupitɨ arɨ Herodías remimbotar apo ãgua, ahese Herodes oharagüer pɨpe oyapo carusa guasu mborerecuareta rese, ava Galilea pendar icuaprɨ ɨvate catu yuvɨrecoi vahe rese avei.

²²Herodías membrɨ cuñatai oique carusave. Aheve opɨvoi ava rovaque. Ipɨvoisa avɨye ai Herodes upe, ambuae ava ocaru vahe upe avei. Ichui aipo ehi cuñatai upe: —Eporandu mbahe nde remimbotar rese cheu, che evocoiyase amondora ndeu —ehi.

²³Ipare aipo ehi iri opacatu ava rovaque chupe: “Amondora nde remimbotar ndeu, anise, che mbahe eta amboyahora ndeu” ehi.

²⁴Ahe cuñatai osẽ oso, osɨ upe oporandu: —¿Mbahe rese pĩha aporandura chupe? —ehi. Ichɨ aipo ehi chupe: —Eporandu Juan Oporoãpiramo vahe ãca rese —ehi chupe.

²⁵Ipare cuñatai oña, oique oso mborerecuar guapɨsave, aipo ehi chupe: —Che aipota co pɨpeve voi eremboura Juan Oporoãpiramo vahe ãca poratu pɨpe cheu —ehi.

²⁶Mborerecuar rumo ndoyembovɨhai tẽi. Esepia, ava ichohoprɨ rovaque ité yɨpɨndar oñehe. Sese ndoicatui, “Aní” ohe ãgua.

²⁷Evocoiyase ipare voi mborerecuar oyocuai sundao Juan ãca reru ãgua.

²⁸Sundao oso soquendasave, oyasɨa Juan ãca, seru poratu pɨpe. Mborerecuar omondo co cuñatai upe, evocoiyase cuñatai omondo osɨ upe.

²⁹Oyanduse Juan remimbohe, yuvɨraso setecuer reca. Ipare vɨraso yuvɨreco tuvɨpave yapocatu.

³⁰Co pare, apóstol oñemonuha Jesús pɨri yuvɨreco. Ipare omombehu mbahe güembiapogüer, oporombohe agüer avei yuvɨreco chupe.

³¹Ahese aipo ehi oapóstol upe: —Perio cohave, yaso, yapɨtuhumi rane co cotɨ —ehi. Esepia, oyepɨndecuaño ité ava yugüeru chupe, sese ndiyai icaru ãgua yuvɨreco.

³²Evocoiyase ahe güeraño apóstol reseve yuvɨraso carite pɨpe co cotɨ ava sui.

³³Setá rumo ava osepia ichose. Ichui opacatu ava tecua rupindar osaquɨcue moñaño; ahe ranengatu oyepotapa yuvɨreco ichui.

³⁴Ogüeyɨse rumo carite pɨpe sui, osepia ava rehɨi, ahese iparaɨsu ava eta chupe, inungar ovesa ndovɨrecoi vahe guãrosar. Ipare ombohe opacatu mbahe rese.

³⁵Caharuse rumo, semimbohe oyemboya yuvɨreco sese, aipo ehi yuvɨreco chupe: —Caharu eteprɨ moco, iyavei ndipoi oɨ co rupivemi vahe.

³⁶¿Ndiyai vo eremondopa ava tecua-tecuami cõi vahesa rupi? Aheve tovɨrocua ocaru ãgua yuvɨreco —ehi yuvɨreco chupe.

³⁷Ahe rumo omboyevɨ: —Pe pemondora mbahe semihura —ehi. Semimbohe aipo ehi yuvɨreco chupe: —¿Iyacatura pĩha oreu dosciento denario pan repɨrã ava mbocaru ãgua? —ehi.

³⁸Jesús aipo ehi: —¿Mbovɨ vo pereco pan? Peso, tapesepia —ehi. Sepia pare, omombehu: —Poyandepo pan, ñuvɨrío pira —ehi yuvɨreco chupe.