Maliku 6:5-38

⁵Yesu kawesha ha kugola mihilu yoyosi pala, kavavikila vatami vadokwa hela mawoku, kavalowola.

⁶Kajinga nendu kwanongwa vandu vavahela ujumilwa. Pambeli Yesu kafityangila fijiji fya pabehi, pavawula vandu.

⁷Kavakema vala vanachuli lilongu na vavili, kakanda kuvalayisha vavili vavili. Kavagayila uwesu wa kuvawusha finyamkela.

⁸Pambeli kavawombela, “Mkotoo kutola chindu chochosi mumwanja, ila lukweku weka hela. Mkotoo kutola filivi, wala muhaku, wala mbiya muchiwunu.

⁹Mfwali filatu, lakini mukotoo kutola yingwa yimonga.

¹⁰Nyumba yoyosi yivavalibushila, mwikali mula mbaka pamuwuka mbwani ayi.

¹¹Na mahali poposi vandu pavalema kuvalibushila ama kuvapikanisha, muwuki mupundi lifu mumawulu venu. Ayi dayivi utovileli kwa veni.”

¹²Topi vayenda na kuvalandulila vandu vapomeli.

¹³Vavafumisha finyamkela vatangalili na kuvashaya mafuta vatami vatangalili na kuvalowola.

¹⁴Mutwa Helodi papikanishili filongu afi fyosi, kwanongwa litawa lya Yesu lipikanika mahali posi. Vandu vamonga vadetili, “Yohani mbatisha kashukuka! Ndi nongwa yaveli na liwovi lya kugola mihilu ayi.”

¹⁵Lakini vamonga vadetili, “Ayu Eliya.” Vamonga vadetili, “Ayu mbuyi, kucha vala vambuyi va dahili.”

¹⁶Helodi papikanishili filongu afi, kadeta, “Yohani mbatisha yindimdumulili mutwi kashukuka!”

¹⁷Kwa nongwa dahili Helodi mweni alayishili kucha Yohani mbatisha akamuliwi na awopiwi muchijaka. Agolili naha kwanongwa amuhetili Helodiya, mdala wa Filipu na Filipu avelili mfwata mundu Helodi

¹⁸Yohani mbatisha amuwombilili Helodi, “Malawu vakulema yuwi kumtola mwehi wa mlongu waku!”

¹⁹Naha Helodiya kamkalalila nendu Yohani mbatisha, kadayila kumuwulagha, lakini kawesha ha nongwa ya Helodi.

²⁰Helodi amtilili Yohani mbatisha kwanongwa amanyili aveli mundu mnofu yang'alili, topi aveli akumlolela. Adayilaya kumpikanisha Yohani mbatisha, mani hela pamupikanishili kala, ajingili nendu.

²¹Lijuva limu Helodiya apatili fwasi mulihungu lya kuwoneka kwa Helodi. Helodi avagolilili lihungu vatavala, vakulu va machonda na filongosi wa mlima wa Galilaya.

²²Muhinja wa Helodiya payingilili kufina, afinili finofu, Helodi na vahenja vaki vasekilili. Topi mutwa kamuwombela muhinja yula, “Luvi chindu chochosi chiwudayila, nenga dangugayili.”

²³Kandi kayilapa, “Dangugayili chochosi chiwudayila, hata nusu ya wutwa wangu!”

²⁴Bahala pala muhinja yula kayenda kumudasha mau waki, “Nuvi liki?” Na mweni kamyangula, “Luvi mutwi wa Yohani mbatisha.”

²⁵Bahala pala mhinja yula katuva kwa mutwa kumluva, “Ngudayila ugayili ponopa mutwi wa Yohani mbatisha muluselu!”

²⁶Mutwa kang'onguteka nendu, lakini kawesha ha kulema, kwanongwa ayilapili paulongolu ya vahenja vaki.

²⁷Bahala pala mutwa kamulayisha machonda akayeghi mutwi wa Yohani mbatisha. Machonda kayenda muchijaka kamdumula Yohani mutwi waki.

²⁸Pambeli kauyegha mutwi wula muluselu kamgayila muhinja, mweni kamgayila mau waki.

²⁹Vanachuli va Yohani mbatisha pavapikanishili afi, vayenda kuutola mvili waki na kuusika.

³⁰Vandundami vawuyili vatangana kwa Yesu, vamuwombela fyosi fila fyavagolili na kuwula.

³¹Yesu kavawombela, “Tuyendi weka yetu mahali pangajila vandu, mkapumulili padokwa.” Adetili ndambu ayi kwanongwa kwavelili na vandu vatangalili vavelili vakwisa na kuwuka, mbaka vapata ha fwasi ya kulya filivi.

³²Topi vawuka weka yawu muwatu, vayenda mahali pangajila mundu.

³³Lakini vandu vavawonili pavaveghi vakuwuka, vavamanyili. Topi, vatuva kwa mawulu kufuma mbwani shosi na vatalili kufika.

³⁴Yesu pafumili muwatu, aliwonili lipinga likomi lya vandu. Kavawonela lusungu kwanongwa vaveli kucha vameni vangajila mdima. Topi kakanda kuvawula findu fitangalili.

³⁵Lumihi palufikili, vanachuli va Yesu vamyendela na kumuwombela, “Mahali apa pangajila vandu na lijuva lihonga.

³⁶Uvaleki vandu vayendi kufitava na mufijiji fya pabehi vakayihemeleli filivi.”

³⁷Lakini Yesu kavayangula, “Yumwi muvapi filivi valyi.” Vamdasha, “Ponopa tuyendi tukahemeli mibumunda ya mbiya sha ijala ya myesi minani.”

³⁸Kavadasha, “Muva na mibumunda miningi? Muyendi mkaloli.” Pavalolili kala, vamuwombela, “Tuva na mibumunda muhanu na vasomba vavili hela.”