Maliki 6:5-38

⁵Yesu ng'adahile bae kutenda pfinu pfa kukangawatsa ako, ila kawekila ghamoko iwatamu chidogho, kawahonetsa.

⁶Yesu tsakakangawala ng'ani kwa ukulema kwawo kutoghola.

⁷Kuya Yesu kanga mne ipfijiji apfila kuwalangulitsa iwanu. Kawakema hamwe iwanang'ina wake kumi na weli, kawatuma weliweli na kaweng'a ukulu wa kuwalapfa ipfinyamkela.

⁸Kuya kawalongela, “Mleke kusola ichinu chochose kwaajili ya ghumwanza, ila ing'weku iliyeka. Mleke kusola pfighate, imikoba ya ghamaghwanda wala sendi.

⁹Mpfale imikwabatsa, mleke kughala lighwanda lingi.

¹⁰Ing'anda yoyose yamtsakwingila, mkale baho mbaka hamtsakuka.

¹¹Na hanu hohose iwanu hawolema kuwabokela au kuwategheletsa, mlawe hanu aho na mkung'use litimbwisi mmaghulu mwenu ka ukalangama kuna wawo.”

¹²Apfo tsawoka na kuwapetela iwanu watsileke nzambi tsawo.

¹³Tsawalapfa ipfinyamkela wengi na kuwabaka ghamafuta iwatamu wengi, wawahonetsa.

¹⁴Imndewa Herodi kahulika mbuli atso, kwaapfila taghwa lya Yesu tsalimanyika chila hanu. Iwanu wangi walonga, “Yohane Mbatitsa katsilihuka. Ndo mana kana ngupfu tsa ukutenda ipfinu pfa kukangawatsa.”

¹⁵Lekeni wangi walonga, “Ayuno Eliya.” Na wangi walonga, “Ayuno nabii ka wala manabii wa ghumwande.”

¹⁶Herodi hayahulike apfo, kalonga, “Yohane iyanimghanile litwi katsilihuka!”

¹⁷Kwaapfila Herodi imwenyegho tsakalaghitsa Yohane yaghoghighwe, yekighwe mne chifungo. Tsakatenda apfo kwaajili ya Herodiya mwehe wake, ipinga ayo tsakakala mwehe wa ndughu yake Filipi.

¹⁸Yohane Mbatitsa tsakaghendelela kumlongela Herodi, “Ng'apfinoghile bae ghweghwe kumkwela mwehe wa ndughu yako.”

¹⁹Naye Herodiya tsakamhila Yohane na kabama amkome. Lekeni ng'adahile bae kwaajili ya Herodi.

²⁰Herodi tsakampfuka Yohane kwaapfila kamanya Yohane kakala imunu yanoghile na yenzeluke, apfo yang'ali yomlolesa. Tsayang'ali yonoghela kumhulikitsa, hata ka tsayang'ali yoghanzika ng'ani hayomalitsa kumhulikitsa.

²¹Litsuwa limwe, Herodiya tsakapata nafasi mne ichihungo cha kwelekighwa kwa Herodi. Herodi tsakawatendela ichihungo iwatawala, iwakulu we asikali na ipfilongotsi we isi ya Galilaya.

²²Neghe Herodiya hayengile tsakapfina, kamdeng'elesa Herodi ne iwahenza wake. Apfo imndewa kamlongela imwana ayo, “Unilombe ichinu chochose chaubama, nitsokwing'a.”

²³Kelaha, “Nitsokwing'a chochose chaubama, hata ka inusu ya undewa wangu!”

²⁴Kuya imwana ayo kaghenda kumghutsa mai wake, “Nilombe choni?” Naye kamwidika, “Lomba litwi lya Yohane Mbatitsa.”

²⁵Imwana ayo katsuma mbaka kwa imndewa kamlomba, “Nobama ungaye litwi lya Yohane Mbatitsa mne lungo!”

²⁶Imndewa kona usungu ng'ani, lekeni ng'adahile bae kulema, kwaapfila tsakelaha hambele he iwahenza wake.

²⁷Bahala imndewa kamlaghitsa asikali, kamlongela aghale litwi lya Yohane. Asikali kaghenda mne chifungo, kamghana litwi Yohane.

²⁸Kuya kaghala litwi alyo mne lungo, kamwing'a imwana ayo. Naye kamwing'a mai wake.

²⁹Iwanang'ina wa Yohane hawahulike apfi, waghenda kulusola lukuli lwake, walutsika.

³⁰Iwatumighwa woya na wetingana kwa Yesu, wamlongela aghala ghose ghawatendile na kulangulitsa.

³¹Yesu kawalongela, “Leka tughende tuliyeka hanu halihela imunu tukabwihile.” Kalonga apfo kwaapfila tsakukala ne iwanu wengi iwang'ali wakutsa na ukuka, mbaka Yesu ne iwanang'ina wake ng'awadahile bae kupata nafasi ya ukuja ichijo.

³²Apfo woka waliyeka mne mnumbwi, waghenda hanu halihela imunu.

³³Lekeni iwanu iwawonile hawang'ali wakuka, tsawamanya. Apfo watsuma kwa mghulu kulawa mne imiji yose, kuya walongola kupfika.

³⁴Yesu hayalawile mne mnumbwi, kona mtingano mkulu ghwe iwanu, kawonela libatsi kwaapfila tsawoneka ka iwang'olo iwalihela mdimi. Apfo kandusa kuwalangulitsa ipfinu pfingi.

³⁵Mihe haipfikile, iwanang'ina wake wamghendela wamlongela, “Hanu hano hana nyika iliyeka, na litsua liswa.

³⁶Waleke woke kune imighunda ne ipfijiji, ili wakeghulile ichijo iwenyegho.”

³⁷Lekeni kawedika, “Mwemwe muweng'e ichijo waje.” Wamghutsa, “Apfi kwotubama tughende tukawaghulile pfighate pfa sendi miya mbili tuweng'e waje?”

³⁸Kawaghutsa, “Mna pfighate pfingapi? Mghende mkalole.” Hawamanyile, wamlongela “Kuna pfighate pfitano ne iwasomba weli.”