MAREK 6:19-41

¹⁹Vašoda e Herodijada chalas choľi pro Jan a kamelas les te murdarel, ale našťi.

²⁰Bo o Herodes pes daralas le Janostar, bo džanelas, hoj hino čačipnaskero the sentno murš a chraňinelas les. Rado les šunelas, ale na džanelas, so peske pal oda te gondoľinel.

²¹Ale jekh džives oj šaj kerďa vareso: Sas le Herodesiske o berša a ov kerďa e hoscina prekal peskere generala a veľiťeľa the prekal o anglune manuša andral e Galileja.

²²Sar avľa andre e čhaj la Herodijakeri a khelelas, sas ada pre dzeka le Herodesiske the olenge, save leha sas pre hoscina. O kraľis phenďa la čhake: “Mang mandar, so ča kames, a dava tuke!”

²³A diňa la lav: “Lav vera, hoj so mangeha, dava tut, dži jepaš mire kraľišagostar.”

²⁴Oj geľa avri pal peskeri daj a phučľa latar: “So mange lestar te mangav?” E daj lake odphenďa: “Le Janoskero Krsťiťeľiskero šero.”

²⁵Paľis e čhaj takoj siďarelas ko kraľis a mangľa lestar: “Kamav, hoj mange takoj akana te anes pre tacka o šero le Janoskero Krsťiťeľiskero.”

²⁶O kraľis ačhiľa smutno, ale vaš odi vera, so la diňa, anglo manuša, save sas pre hoscina, na kamľa lake te odphenel.

²⁷Avke o kraľis takoj bičhaďa le katos a prikazinďa, hoj te anel le Janoskero šero. O katos geľa, odčhinďa leske o šero andre bertena

²⁸a anďa o šero pre tacka la čhake. A e čhaj diňa peskera dake.

²⁹Sar oda šunde le Janoskere učeňika, avle, ile leskero ťelos a thode les andro hrobos.

³⁰O apoštola pes pale zgele le Ježišoha a vakerenas leske savoro, so kerenas the sikavenas.

³¹Phenďa lenge: “Aven, džas korkore pre varesavo omuklo than, hoj tumenge sikra te odpočovinen.” Bo furt ajci manuša ke lende avenas a oddžanas, hoj len na sas aňi kana te chal.

³²Avke gele la loďkaha varekaj pre omuklo than, hoj te aven korkore.

³³Ale but nipi len dikhle, hoj džan het a avle pre oda, kaj džan. Vašoda but džene andral savore gavora odarik gele pro pindre a doavle pre dujto sera angle lende.

³⁴Avke, sar avľa o Ježiš avri andral e loďka, dikhľa ode but nipen a sas leske pharo pre lende, bo sas sar o bakrore bi o pasťjeris. A chudľa len te sikavel but veci.

³⁵Sar imar sas but ori, avle ke leste leskere učeňika a phende leske: “Pre kada than nane ňič a imar hin but ori.

³⁶Rozmuk len, hoj te džan andro gava the andro fori peske te cinel vareso te chal.”

³⁷Ale ov lenge odphenďa: “Tumen len den te chal!” Phende leske: “Kames, hoj te džas a te cinas maro vaš o duj šel (200) denara a te das len te chal?”

³⁸Ov lendar phučľa: “Keci tumen hin mare? Džan te dikhel!” Sar pes dodžanle, phende leske: “Pandž mare the duj ribi.”

³⁹Paľis lenge phenďa, hoj peske te bešen pre zeleno čar andro partiji.

⁴⁰Avke bešle peske andro partiji po šel (100) the po penda (50).

⁴¹Paľis iľa ola pandž mare the duj ribi, dikhľa pro ňebos, požehňinďa, phagerelas o mare a delas le učeňikenge, hoj te poden le manušenge. The ola duj ribi rozulaďa savorenge.