Mareko 6:19-41

¹⁹Arinai Herodia ia i ouyalayalaei, ia unuina i henua; nige ana mata paana.

²⁰Heroda Ioane i matausiei, i italobai ia tau laulaududurai, eo ia hetabu tauna, ia Ioane i itawataikomakomani; ia ena riba i ataiei, nuana i tuditudi, nuana hinage i lolo.

²¹Ena nuatu i nuatui, e, huiana ie lage Heroda ena huia labasi, ia mataasi i mataasiei maena guiau wasawasadi, eo Galilaia babadadi,

²²Herodia natuna, siu, ia abo ie lau isi matadi eai ie saga, Heroda ma ana matagabanu nuadi se lolo, se kode ariri, arinai wasawasa ie ribalau siu ne arinai, i ene, “Oa em gadosisi aisana u awanorima, abo ea leawa.”

²³Ia ie riba, abo i aigora, i ene, “Ena arigu eai ginauri u gadosisiei, u ribaei, abo ea leawa enam, ena u henua egu basileia teina tehana esau enagu, tehana esau enam.”

²⁴Siu ne abo ie lau sinana arinai i hesiolau, i ene, “Saha abo ea awanorini wa?” Ia i ene, “Ioane Bapatiso uruuruna.”

²⁵Ia abo i uioma heuheula guiauna ne arinai, i awanorilau, i ene, “Eau egu gadosisi ede teina, Ioane Bapatiso uruuruna abo u usaiama gaeba alona eai.”

²⁶Wasawasa wa nuana i baaea ariri; na paana ana matagabanu ena aigora se ataieyao, arinai ede ia nige i talaoriori.

²⁷Wasawasa tauaiaiunu esau ie heribalaei, i ene, “Ioane uruuruna u abiyama.” Ia abo ie lau numa tutugudu eai, ia gadona ie tomutusi.

²⁸Ia uruuruna i baheiama gaeba alona eai, i moselaei siuna ne arinai, siu ne i laei sinana arinai.

²⁹Ioane ena heaheatayao abo se ataiei, abo se laoma, eaibarabarana se bahei, bousa eai se tore.

³⁰Apostolo tataodi se tupagogoesegaidima Iesu arinai, wasa gamagari ia se heriba, isi adi wawari, eo edi lauheata se wasaduaiei ia arinai.

³¹Ia ie ribalau isi aridi eai, i ene, “Omibom au lausuarama, ta lau malatupama eai, ta aiyawasi sora.” Tatao gamagari se laoma na, se lau, se hemodedi nige edi huia bena se aiyawasi.

³²Isi waga eai se geru mahimahihi, se lau malatupama eai.

³³Isi edi aba lau ne tatao se ita, gamagaridi se nuatuiyao, eanua gamagamagari eai isi abo se aitautau, se lage bagunao, abo se tupagogoma ia arinai.

³⁴Iesu abo ie dunasae moutuana lailai i itadi, eo i nuatoatoaidi, paana isi doha mamoe nige taumiataunidi; ia i hetubu ginauri gamagaridi i heatadi.

³⁵Mahana ie tarueo, ena heaheatayao se laoma ia arinai, si ene, “Malatupama ina mahana hede i duio ta.

³⁶U hetamaridi se lau eanua gougou eai, eo eanua hanahanau eai, aiai adi se uneune; isi aiai adi nige’e.”

³⁷Ia i heuio, ie ribalau aridi eai, i ene, “Aiai adi omi au mosedi.” Isi abo se ribalau ia arinai, si ene, “Denari tataosaudoudoi‐se‐mate taba ai abidi adi aiai ai uneune wa, abo ai mosedi se ai?”

³⁸Ia ie ribalau isi aridi eai, i ene, “Ami falawa wa hisa? Au lau au hasiridi.” Isi se hasiridi, abo si ene, “Haligigi, eo eama labui.”

³⁹Ia ie ribalau isi aridi eai, i ene, “Gamagaridi au hebawaporuporudi lei potana eai.”

⁴⁰Isi abo se bawabigabiga, hari poru tatao haligigi se mate, hari poru tatao‐labui‐se‐mate‐saudoudoi.

⁴¹Ia falawa haligigi i abidi, eo eama labui, i itaitasae galewa eai, i aihelahui; falawa abo i ihidi, abo i mosedi ena heaheatayao aridi eai, isi abo se peiauri moutuana lailai wa nuanuadi eai, eo eama labui hinage i soiedi isi gamagaridi adi.