MAAKU 6:19-41

¹⁹Hɛrↄdia sↄ̃ↄ Yaaya pɛ̃tɛ̃ kũna à yezi à à dɛ, mↄde èe zɛ́ ero,

²⁰zaakɛ Hɛrↄdu dↄ̃̀ kɛ̀ Yaaya nɛ́ Luda gbɛ̃ súusumɛ, ben è vĩa kɛnɛ è tó wà ĩa daaro. Tó à gàa à à yã ma, laasuu è gɛ̃mmɛ. Baa kↄ̃n beeeo ègↄ̃ ye à fàadibonazi.

²¹Hɛrↄdia zɛ́ è Hɛrↄdu igurↄ làa kↄ̃kↄ̃ zĩ. Hɛrↄdu gbãadeenↄ kↄ̃n soza gbɛ̃nsinↄ kↄ̃n Galili gbɛ̃ gírimadeenↄ kàkↄ̃a pↄ́blekiia.

²²Ben Hɛrↄdia nɛ́nↄkparɛ gɛ̃̀ à ↄ̃ wã̀. À kɛ̀ Hɛrↄdunɛ nna kↄ̃n a nibↄnↄ ń píngi, ben kína bè nɛ́ pìnɛ: Pↄ́ kɛ̀ ń yezi ǹ à wɛ́ɛ kɛma, mɛ́ n gba.

²³Ben à ɛ̀ara à bènɛ: Ma la dànnɛ pↄ́ kɛ̀ n à wɛ́ɛ kɛ̀ma píngi, mɛ́ n gbamɛ, baa ma kpata kpaatɛ.

²⁴Ben nɛ́nↄkparɛ pì bↄ̀ à gàa à a da gbèka à bè: Bↄ́n mɛ́ wɛ́ɛ kɛa? Ben à da bènɛ, Yaaya Batisikɛri mì.

²⁵Gwe gↄ̃ↄ à lìara à sù kpakpaa à gàa à ò kínanɛ: Má yezi ǹ ma gba Yaaya Batisikɛri mì dana pɛrɛnti guu kɛ̀ tia.

²⁶Ben kína pↄↄ yàka maamaa, mↄde kɛ̀ à la dà nibↄnↄ wáa yãnzin èe fↄ̃ à gì dↄro.

²⁷Ben kína pì a dogari ke zĩ̀ gↄ̃ↄ, à bènɛ à gá à à mì zↄ̃ à mↄ́o. Ben à gàa à à mì zↄ̃̀ kpɛ́siaan

²⁸à dà pɛrɛnti guu à mↄ̀ à kpà nɛ́ pìa, ben à kpà a daa.

²⁹Kɛ̀ Yaaya ìbanↄ yã pì mà, ben aↄ̃ mↄ̀ wà à gɛ̀ sɛ̀ wà vĩ̀i.

³⁰Yesu zĩ̀ri pìnↄ sù à kiia, ben aↄ̃ yã kɛ̀ aↄ̃ↄ kɛ̀nↄ kↄ̃n yã kɛ̀ aↄ̃ↄ dàńnɛnↄ ònɛ píngi.

³¹Wèe gaa wèe suu, ben Yesu kↄ̃n a zĩ̀rinↄↄ e zɛ́ e aↄ̃ pↄ́ blè sero parii yãnzi. Ben à bèńnɛ: À mↄ́ wà gá gusaɛ watɛ̃ɛ wà kámma bo féte.

³²Ben aↄ̃ dà zɛ́n góro'itɛ guu aↄ̃ↄe gaa gusaɛ ńtɛ̃ɛ.

³³Kɛ̀ gbɛ̃nↄ ń gana è, aↄ̃ ń dↄ̃, ben aↄ̃ bↄ̀ wɛ́tɛ kↄ̃n wɛ́tɛo pari wà bàa lɛ̀ kɛ̀sɛ wà kà gwe ń ã.

³⁴Kɛ̀ Yesu bↄ̀ góro guu, à gbɛ̃nↄ è paripari, ben aↄ̃ kɛ̀nɛ wɛ̃nda, zaakɛ aↄ̃ↄ dɛ lán sãa kɛ̀ aↄ̃ↄ dã̀ri vĩroonↄ bàmɛ. Ben èe yã daańnɛ maamaa.

³⁵Kɛ̀ ↄfãntɛ̃ bùsa, ben à ìbanↄ sↄ̃̀zi aↄ̃ bè: Gura kɛ̀kii nɛ́ sɛ̃̀tɛ pↄ̀rↄtumɛ, bensↄ̃ guu e sii.

³⁶Ǹ gbɛ̃nↄ gbarɛ aↄ̃ tá bura kↄ̃n lakutu kɛ̀ kú kĩinↄa, aↄ̃ pↄ́ wɛtɛ wà lú wà ble.

³⁷Ben Yesu wèńla à bè: À pↄ́ kpáḿma aↄ̃ ble. Ben aↄ̃ bènɛ: Ń yezi wà gá burɛdi lú kondogi ↄↄ wàa do wà kpáḿma aↄ̃ blen yↄ́?

³⁸Ben Yesu ń lá à bè: Burɛdi mɛ̀n ũgban á vĩi? À gá gwa. Kɛ̀ aↄ̃ kà, aↄ̃ bè: Burɛdi kuu mɛ̀n sↄↄro kↄ̃n kpↄ̀o mɛ̀n plaa.

³⁹Ben à bèńnɛ: À gbɛ̃nↄ vɛ̃ɛvɛ̃ɛ sɛ̃̀la bↄ̀rↄa gãliagãlia.

⁴⁰Ben aↄ̃ vɛ̃̀ɛvɛ̃ɛ gãli kↄ̃n gãlio, gãli kenↄ gↄ̃ↄn basↄↄro, gãli kenↄ gↄ̃ↄn baplaa akuri.

⁴¹Ben Yesu burɛdi mɛ̀n sↄↄro kↄ̃n kpↄ̀o mɛ̀n plaaa pìo sɛ̀ à wɛ́ɛ sɛ̀ musu à aubarika dàn. Ben à burɛdi pì lìlikↄ̃rɛ à kpà a ìbanↄa, aↄ̃ↄ kpàatɛtɛ gbɛ̃nↄnɛ. Ben à kpↄ̀ mɛ̀n plaaa pìnↄ kpàatɛtɛńnɛ ń píngi.