San Marcos 6:19-41

¹⁹Junni ya sonari Juanca pa jotonan, totesa carichi tinatonan, catotesa carino podeica itominue.

²⁰Heróderi Juanca Diosichi sen tsachi jonunca miraminue. Junto duque jelerato totesa carica itominue. Junni Juan micarinaminca meráto, Herodes layan entendeitunue. Tsan jotonan son tito meraniquimin jominue.

²¹Junni Heródechi wata tula ma fenan, ya sonari Juanca totesa carino podeinue. Jun mate yari tenientelaca, capitanlaca, junsi Galilea to oco tsachilaca jera meracarito, fiesta ano fimiyanaminue.

²²Junnasa Herodíachi namari jun tamochi wito teraquinue yape Heródela quiralaquisa. Junni Heródebe yabe pechuminlaberi duque se joe tito quiralaquinue. Junni miyari ya nalalan sonaberi itsantinue: —Nu tica panhanatiya, cuwaniqueyanae tinue.

²³Junni Diosi mirasa juraquito pánayoe tito itsantinue: —Tica panhanatiya cuwaniqueyanae tinue la tanunca quitsa fecáritiya.

²⁴Junni ya nalalan sonari urachi manloto yachi ayanbe panhato itsantinue: —¿Tica panhano joinhin? tinue. Junni yachi ayan mantimini Mumunmin Juanchi misuca cuwasa tide! tinue.

²⁵Junni ya nalalan sonari wewe tamochi manwito, miyabe itsantinue: —Amananan Mumunmin Juanchi misuca wa nidabi cuwade! tinue.

²⁶Junni ya miyari duque laquiinue. Juntonan juraquito paca joto, junsi junte pechuminlanan meracala jonan, nene patuchique cuwaniquinue.

²⁷Jun óratenan miyari soldadoca Juanchi misuca tanjasa mantato erenue. Junni soldadori Juan doranunca jito Juanchi misuca porecato,

²⁸wa nidabi pocato tanjato, ya nalalan sonachi cuwanue. Junsi ya sona yachi ayanchi cuwanue.

²⁹Junni Juanbe penenamin jominlari junca meráto, Juan puyacaca mancato menalaquinue.

³⁰Junni aman Jesús mantato ereca junlari yachica manjato, yabe cuenta jera manquilaquinue titiya jera quinunca junsi jera micarinunca.

³¹Junni junteri duque tsachilari jan, weyanni manjin, ilainanan, yalari ano finotiya jola itominlanue. Junnan Jesuri yalabe itsantinue: Monantiya chutunun postoca nasi jasaibi jilaisa! tinue.

³²Junni Jesube yabe penenaminlaberi wa canoabi wito, tsachilaca purato, niyanlanantiya chutunun postoca jilainue.

³³Juntonan duque tsachilari Jesuca junchi jinaminca quirato miito, yalanan jerale pueblobi nechi bene jilainue. Nedechi jinato, Jesúlaca caquenan felainue.

³⁴Junni Jesuri canoabi nechi loto quiranari, duque tsachila méraminlanue. Junto yalaca quirato duque laqui tinue cuidaimin iton opisa cuwenta jolajoe tito. Junto yalabe duque sen cosalaca micarinue.

³⁵Junni wari duque quebi inasa, Jesube penenaminlari yachica jato itsantilatinue: —Inte niyanlanantiya chutunun posto joe latinue. Duque quebi inae.

³⁶Junni tsachilaca jera manherede! tilatinue yape quelote puebloca jito, ano cato filaquisa.

³⁷Junni Jesuri itsantinue: —Nulari yalachi ano cufilaquede! tinue. Junni yalari manpato, chiquilari duque animali bibu canola joichunae latinue yala jeralelachi michi suwachun.

³⁸Junni Jesuri itsantinue: —¿Nulari niyanca bibu talarayun? tinue. Jera quiralaquechin! tinue. Junni yalari jera quiratobi, itsantilatinue: —Manteca bibu, junsi watsa palucari talarayoe tilatinue.

³⁹Junni aman Jesuri yachi tsachilabe itsantinue: —Ya tsachilaca lapabi chutelaquede! Bolonto, lapabi jeralelaca chutelaquede! tinue.

⁴⁰Junni aman tsachilari tsanque patsa tsansi, o mante chunca tsansi bolonhito jera chudilainue.

⁴¹Junnasa Jesuri ya manteca bibuca, junsi paluca watsaca cato, jamochi quirato, Diosibe acradeseinue. Junsi aman Diosibe acradeseitobi, watsabe bibubeca pisuleto, yabe penenaminlachi cuwanue yape junte chumin tsachilachi cuwalaquisa.