Maleko 6:19-41

¹⁹Helodiya ya manabala Diyon lisina yai be bena ya wunui, in moho hige gonowana.

²⁰Kin wa Diyon ya ꞌwasabuwen be ya bobodiyen. Ya sibai mate in doga dudulaina yo fatabu dogana. Diyon ena liba ya fanuha wananahaidi. In moho nuwana ya faiꞌabi paꞌana ponoli haꞌa ya ginauli.

²¹Fuya hesa lahuna Helodiya ena solasola ya lobahi mate Heloda ena fuya tubu nawalahina yai. Yo fede anꞌangogo ya ginauli be gabeman laꞌilaꞌidi, hiyala babaꞌisadi yo Galili tefadi babadadi ya yoga gogoidima.

²²Helodiya natuna waihin ya laoma edi ya leꞌi, be Heloda yo ana taumana nuwadi sa amna. Yo fede baꞌisa wa tineꞌeu ya faliba iyen, Somo wa fanuha haba E felem.

²³Ya liba dudulai tineꞌeu lisina yai iyen, E angwala mate yena em fanuha somo wa libaen haba E felem. Yena uwen, em nuꞌu tefana u daili be u felegu, mate gonowana!

²⁴Yo fede tineꞌeu wa ya lau tinana ya fatiꞌoi iyen, Tinagu somo haba E anꞌetai? Tinana alinana ya bui iyen, Diyon Babasito kuluna u anꞌetai.

²⁵Tineꞌeu wa ya fabelele ya fuyo baꞌisa lisina be iyen, E fanuha bena aho te, Diyon Babasito kuluna ai gaeba wa felegu!

²⁶Kin nuwana ya heyaya, in moho hige gonowana ena nuwatuhu i ꞌwaiyoꞌoꞌen paꞌana ena angwala haꞌa ya ginaulidi ana taumana matadi yai.

²⁷Yo fede gati hesa ya fatamali ya lau deli yai be Diyon gadona ya ibo motu,

²⁸habahim gaeba yai kuluna ya abiyama be tineꞌeu ya felen. Na ya lawen be tinana ya felen.

²⁹Wasana sa atahiyen be ana hewahewali sa lau silanna sa abi be sa boꞌusai.

³⁰Tau faꞌona wasawasa sa fuyoma be maꞌedi Yesu sa faꞌoigogo be somo sa ginaulidi yo edi lau faꞌata wasadi ena sa liba.

³¹Yesu maꞌana hewahewali hige edi solasola haba ti kalahe paꞌana dodoga boludi sa lau yo sa laoma. Yo fede iyebom, Ta lau nuꞌu laulau gesa yai, be ainiya au anyawasi.

³²Yo fede waga yai sa awa modigafu na sa lau atiꞌatipu hesa yai.

³³In moho dodoga boludi sa ita lobahidi be taon mahudoꞌidi yai sa tafo bwaꞌibwaꞌi be sa mahano bwaꞌi.

³⁴Waga ya mahano Yesu ya tulubeꞌu yo fede baiwa ya itadi be ya nuwatohatohaedi. Paꞌana itaꞌitadi doha sipi hige tau ita watanidi na sa laulau koko. Logena ginauli boludi ya fatubu ya fatalahadi.

³⁵Ya maimailafi yo fede tau famuli watanina sa laoma lisina be tiyen, Ita itete balabala gaibu yai.

³⁶Dodoga te u duidi ti lau nuꞌu mulimulina yai kalahe adi ti unedi.

³⁷Na Yesu alinadi ya bui iyebom, Umi kalahe au feledi. Tiyen, Wa fanuha bena siluba handele luwaga ꞌe abidi be fwalawa ꞌe unedi na ꞌe fakalahedi?

³⁸Yo fede Yesu ya fatiꞌoidi iyen, Fwalawa fisa? Haga au lau au yoꞌo. Sa yoꞌo be sa fuyoma tiyen, Fwalawa faligigi yo hama luwaga.

³⁹Yesu ya libalau tau famuli watanina lisidi iyen Dodoga au falibadi, be ti taꞌai pwalupwaluidi ai hawahawa.

⁴⁰Yo fede haisa oulidi 100 sa taꞌai, na haisa oulidi 50.

⁴¹Habahim Yesu fwalawa faligigi yo hama luwaga ya abidi na ya itaꞌita hasa galewa na ya faloholohodi. Fwalawa ya ifidi, na hama luwaga ya kampwaidi be tau famuli watanina ya feledi sa soiyedi dodoga mahudoꞌidi lisidi yai.