Luka 7:8-47

⁸Vi me sem manuš tele vlast thaj siman tale mande vojnikurja. Thaj kana phenav jećhešće: “Dža!”, vo džaltar. Thaj kana phenav averešće “Av!”, vo avel. Thaj kana phenav mungre robošće: “Ćer godova!”, vo ćerel.

⁹A kana godova ašundas o Isus, začudisajlo e kapetanošće thaj boldape ko them savo džalas pale leste thaj phendas: “Phenav tumenđe: Ke nijek Izraelco či arakhlem gaći paćipe sago ke akava kapetano!”

¹⁰A kana okola kaj sas bičhalde katar o kapetano boldinepe ćhere, arakhline e robo kaj si sasto.

¹¹Pale godova o Isus teljarda ando gav savo akhardolas Nain. Džanas pale leste e učenikurija thaj o but o them.

¹²Kana avilo paše ke gavesko vudar, dik, upravo inkalenas e mule te prahon les, e čhave jedinco pe dejaće, savi sas udovica. Lava sas o but o them andar o gav.

¹³Kana dikhlala o Gospod, sažalisajlo pe late thaj phendas laće: “Na rov!”

¹⁴Pale godova avilo ko mohto, čhuta pire vas pe leste, thaj o kola kaj inđarenas o mohto ačhiline. A vo phendas: “Čhaveja, tuće phenav: Ušti!”

¹⁵O mulo vazdape, bešlo thaj počnisarda te ćerel svato. A o Isus dijales lešće dejaće.

¹⁶A savora zadivisajle thaj počnisardine te hvalin e Devle alavenca: “Baro proroko avilo maškar amende!”, thaj: “O Del avilo ando pomoć pire themešće!”

¹⁷Thaj godova glaso pale leste buljilo pe saste Judejske krajurja thaj pe sasti okolina.

¹⁸E Jovanošće učenikurija javisardine Jovanošće sa so o Isus ćerdas. A vo akhardas pe dujen učenikonen

¹⁹thaj bičhaldalen ko Gospod te phučenle: “Da li san tu okova saves obećisardas o Del kaj trubul te avel, ili te ažućaras averes?”

²⁰Kana akala duj manuša aresline leste, phendine: “O Jovano savo bolel bičhalda amen tute te phučas tut: 'Da li san tu okova saves obećisardas o Del kaj trubul te avel, ili te ažućaras avres?'”

²¹O Isus baš ande godova časo sastarelas e buten katar lenđe muke, razne nasvalimata thaj katar e bilačhe duhurja, thaj e bute korenđe boldas o vido.

²²A o Isus phendas lenđe: “Džan thaj phenen e Jovanošće so upravo dikhline thaj so ašundine: e kore dićhen, e banđe phiren, e gubave šilavenpe, e kašuće ašunen, e mule ušten, a e čorenđe propovedilpe e Bahtali nevimata.

²³Blago okolešće savo či uvredilpe zbog mande.”

²⁴A kana đeletar e učenikurija e Jovanošće, o Isus počnisarda te phenel e but e themešće palo Jovano: “So inkljistine ande pustinja te dićhen? E trska, savja ljuljil e bavlal? Na!

²⁵So dakle inkljistine te dićhen? Manuše savo lija pe peste barvale drze? Na! E manuša save inđaren pe peste šukar drze thaj trajil ando raskoš si ande carošće dvorurja.

²⁶So dakle inkljistine te dićhen? E proroko? Ej, me phenav tumenđe, vo si vi majbut katar o proroko.

²⁷Kaj vo si okova pale savo o Del phendas ando Sveto lil: 'Ake me bičhalav mungre glasniko angle ćiro muj savo lačharela ćiro drom angle tute.'

²⁸Kaj phenav tumenđe: Nijek bijando katar e manušnji naj majbaro katar o Jovano, a o majcikno ando carstvo e Devlesko si majbaro lestar.

²⁹Kana sa o them, thaj vi e carenikurja, save sas bolde e Jovanošće boldimasa, ašundine e Isuse sar ćerel svato, priznajisardine kaj si e Devlesko sikavipe ispravno.

³⁰Naprotiv e farizeja thaj e sikavne e Mojsiješće zakonestar či kamenas te bolelen o Jovano. Von odbisardine so o Del planirisarda pale lende.

³¹O Isus phendas: “Kasa te usporedisarav e manušen akale naraštaješće? Kašće si slične?

³²Lenca si sago čhavrenca save či džanen sokamen bešen po sokako thaj jek avrešće čhon muj: 'Svirosardam tumenđe a tumen či ćheldine! Đilabadam tumenđe tužaljke a tumen či rujine!'

³³Gajda avilo o Jovano savo bolelas. Niti halas mangro niti pijelas mol, aj tumen phenen: 'O beng si ande leste!'

³⁴Avilem me, o Čhavo e Manušesko. Vi hav vi pijav, a tumen phenen: “Dik, o manuš halapljivo thaj matarno, drugari e carinikonengo thaj e bezehalengo.”

³⁵Savora save prihvatin e Develešći mudrost sikaven kaj si voj čači.”

³⁶Varesavo farisejo zamolisarda e Isuse te hal leste. O Isus dija ande farizejesko ćher thaj lijas than pale sinija.

³⁷Kana ake avili varesošći manušnji savi sas bezehali ando gav. Ašunda kaj si o Isus pale sinija ande farizejesko ćher, avili thaj andas e alabasterosko čaroro ande savo sas kuč mirisno ulje.

³⁸Ačhili pale lešće pungre. Počnisarda te rovel thaj e jasvenca te thovel lešće pungre, a pire balenca te khoselen. Čumidelas len thaj maćhelas e mirisne uljeja.

³⁹Kana godova dikhlas o farizej savo akharda les ande piro ćher, gndisardas ande peste: “Kana akava avilosas proroko, džanglasas ko si thaj sošći si akaja manušnji, savi dirile, kaj si bezehali.”

⁴⁰O Isus phendas lešće: “Simone, siman vareso te phenav tuće.” A vo phendas: “Phen, sikavneja.”

⁴¹O Isus nastavisardas: “Sas varesavo manuš savo delas averenđe udžile love. Gajda sas duj džene save sas lešće udžile. Jek sas lešće udžile pandž šela denarja, a aver pandžvardeš.

⁴²Sar naštik te boldine e love save sas lešće udžile, vo jartosardas liduj dženenđe. Savo lendar majbut volilale?”

⁴³O Simun phendas: “Gndiv kaj okova savešće si majbut jartome.” A o Isus phendas lešće: “Lačhe phenes.”

⁴⁴Gajda boldape ke manušnji thaj phendas e Simunešće: “Dićhes akala manušnja? Dijem ande ćiro ćher, a tu ni paj či dijanman te thovav mungre pungre, a voj pire jasvenca thoda mungre pungre thaj pire balenca khoslalen.

⁴⁵Tu či ni čumidan man, a voj, sar dija andre, či ačhili te čumidel mungre pungre.

⁴⁶Uljeja mungro šoro či makhlan, a voj e mirisne kuč uljeja mungre pungre makhlas.

⁴⁷Zato, phenav tuće: 'Voj sikadas but ljubav kaj si laće jartome e but e bezeha, a maj cara ljubav sikadas okova savo si maj cara svesno kaj si lešće jartome lešće bezeha.'”