Luk 7:8-47

⁸Ena me te ena genuai nogi elalubo bidigo tonaluyu bidibo dao. Tama eno digi te ena ami bidi dabe te ena dologode augwali bidibo dao. Tama eno me delibolo te po weyu, ‘Nage pao’ obaso da, teda aga pabo dao. Tama eno gasa bidi me dali te po weyu, ‘Nage asa’ wali da, teda aga asobo dao. Tama eno ena sę ebo bidibolo te po weyu, ‘Nago te sę yao’ obaso, teda agai te sę ebo dao,” te Rom ami genuai bidigo te po wai.

⁹Tama te po wali Jisasgo odama, noma sali. Tudiba begelama, aga wali asali we bidibolo te po wali, “Te Israel bage tomode me Godibolo tama tiwai homu ebo bidi eno me suai menio. Megi dagebolo te mu po obe dao,” te po wali.

¹⁰Te ami genuai bidi aga po sela asali abagi dabe te ami genuai bidigo beba ma begasa pelama, te sę ebo bidi bugagia ma bidibo suali.

¹¹Te bidi tau sali, te sogo do Jisas be nani me nogi Nainba pali. Aga wali pali bidi dabe me, umabo we bidi me aga dali pali.

¹²Te be naniba sabaligi pobadi, te isai bidi me deli te pubaligi peyu tolasa soabo sualio. Te isali bidi wilawe wego ogwa deli digi tama pubaligi su sobaso, aga ida me we bidi me hauwa wali asali.

¹³Tama Genuai Bidigo te wilawe we sulama, moni hobede mu eyu, “Gela wagio” wali.

¹⁴Nosali Jisas aga pelama, te isai bidi muani ni gologobe wa diąbadi, te ni gologobe wa tolasa asali bage dolaluali. Tama “Ogwa bidi, hodaluao, eno mu po nagebolo tama obe dao,” Jisasgo te po wali.

¹⁵Tama te isali bidi hodaluama, po wabo gagalobadi, Jisasgo aga idabolo ma mani.

¹⁶Tama te tigidali we bidi moni wi elama, augwaligo Godigo nogi ugwaba sali. Augwaligo te po wai, “Moni Godigo po ola mabo bidi da tomode megi e pedaligulai yabao. God aga we bidi tau sagasu, te asai yabao.”

¹⁷Jisasgo te tiali po tigidali Juda dabego buluba me, te bogo badu elalua pabo buluba me, pela silali.

¹⁸Te Jon aga wali bilibo bidi dabego Jisasgo ebo sę suali po Jonbolo pusa mani.

¹⁹Tama Jon aga wali bilibo bidi si i wali. Tama te bidi sibolo “Genuai Bidibolo hanalugi pao,” wali, “‘Nage Jongo te nosali asaibao wali bidi dawe, ma gasa bidi me asobo dago tonaluaibawe?’” Jongo tama Jisasbolo wao po wali.

²⁰Tama tega si Jisas pageba asiyu, “Te we bidi baptais mani bidi Jongo dadi si nage pageba nage te asaibao wali bidi nage tama dawe, ma gasa bidi me tonaluagawe, po omainu dadi si tagala palalio,” te po wali.

²¹Te sogo naga tama Jisasgo olo gasi me, dwai gasi mu me, te dwai noma bidi elalubo bidi me dwagi yai ma ilali. Tama gedu widai we bidi me gedu ma pedalali.

²²Te po obaso, Jisasgo augwalibolo te wei ponoyu te po wai, “Dage pelama, Jonbolo te tigidali sę dagego odali po me te suali sę me te po tigidali agabolo wagi pao. Dagego e subao, te gedu widai bidi dabe augwali gedu usu ma iliyu, te sągą dwai bidi dabe augwali bugagia ma bilibo dao. Te oiyabe yai bidi dabe augwali tigi wiegi yai pedaliyu, tama olo degai bidigo po ma odobo dao. Te isai bidi dabe augwali ma hodaluyu, tama te magi nai meni yai bidi dabe augwaligo te Godigo wiegi yai gesi po odobo dao.

²³Tama bidi enade homu si isiąma tama ena aga tudiba musiąbo bidi, te bidi aga wiegi yai homu pemene yao,” Jisasgo te po wai.

²⁴Tama tede bidali we bidibolo Jisasgo te po hanalu wali,” Polobadu dage te bidi meni yai buluba pali, te bidi Jon dagego sugi pali, te dagego magi nai sugi paliwe? Ma, dagego te awi dili me deli, te waligo memenege ilibaso sugi paliwe? Menio.

²⁵Te menio. Magide suainu pai dawe? Wiegi yai ugwa gudali bidi dagego sugi paliwe? Te menio. Te tobage ugwa gudalubo bage, te doado bage umabo munalubo dabe, augwali te genuai gavman tuni bidigo wiegi yai be dabede bidibo dao, te bidi meni yai bulude meni.

²⁶Tiali goli dage magi baso pai dawe? Ma, te Godigo po pusubo profet bidi me deli sugi pai dawe? Awe, eno dagebolo obao, e Godigo po pusubo profet bidigo da, agai te gasa te Godigo po pusali profet bidi dabe te tigidali aiyaba elalualio.

²⁷Te Jon agade te gasa profet bidigo Godigo wali po polobadu asęai dao, ‘Suao, te eno po pusabo bidi tagala palobaso, tama aga nage asabo digi polasa paibao. Agai nago tų sisi iligi paibao.’

²⁸Ma wadolu, Jisasgo te po wali, “Eno dagebolo obe dao, e tǫde ame nabo we bidi tigidali Jongo aiyaba elalualio. Tiali goli, te Godigo obo tomode bidibo moni nogi meni yai bidi me agai nogigo te Jon aga moni nogi aiyaba elaluaibao,” Jisasgo te po wali.

²⁹Te bidi Jongo baptais mani we bidi dabe me, te baptais sali te takis sabo bidi dabe me, augwaligo Jisasgo wali po odolama te homu yai, Godigo mu po dolo wali da homu yalio.

³⁰Tiali goli, te Godigo augwali tau sainu yali homu Farisi sibi dabe me, Juda dabego bomo yai po ola mabo bidi dabe me, augwaligo te homu sela sąnama, “Jongo da baptais mabo hagelabo,” te po wai dao.

³¹Ma wadolu, Jisasgo te po wali, “Dage megi bidalubo bage magideba usu nagawe? Dage magi nai tiwai yagawe?

³²Dage da, te maketde gagali ebo wai puluba ąǫ, te elaluba. Te wai puluba mego hai ulugu weyu, ‘Dago ona sulubadi goli, dagego tęąbi ebe. Me ma, dago gela obadi goli, dagego gela wabe.’ Magi baso meni.

³³Te we bidi baptais mabo bidi Jon asama, nai gisilu, bomai wę gisilu yali goli, dagego te agade ‘Aga da, te dwai noma bulalubo bidi dao,’ te po wali.

³⁴Me ma, ena Godigo Bidi Mu asama, nai tuyu, ąį tuyu ebadi goli, dagego enabolo ‘Buluba sela sąwai bidi dabe, takis sabo bidi dabego abagi dao,’ wai dao. Me dagego enade ‘Bomai ąį me nai e tudu gebo dwai bidi dao,’ wai dao.

³⁵Tiali goli, Godigo po wali pabo we bidi dabebolo Godigo kolesaga mu augwalibolo mu ola mabo dao,” Jisasgo te po wali.

³⁶Te Farisi bidi mego Jisas agai beba nai tuagasomainu eyu, i wali. Tama Jisas agai beba pelama, nai tuainu, ni nami daide dulalu tiąluali, Juda dabe augwaligo nai tubo sę ebogia.

³⁷Te be nanide dwai dwai sę idubo we me deli bidai. Te wego Jisas te Farisi bidigo bede bidibo po odama, masigigo nigai genagi deli denami yai wel pągąnalubadi, te beba sisali.

³⁸Jisasgo sągą pagede tudi badu dolaludu, gela weyu, aga gela guago Jisas sągą sawali nadugwali. Tama te we aga bobobage tobolu nisigo Jisasgo sągą sawali holama, sągą sawali si nono nenama, te denami wel aga sągąde pilali.

³⁹Tama Jisas i wali Farisi bidigo aga homude ‘E bidi Godigo po ola mabo bidi tigi sogo da, teda te mena tama bilibo wego ena dią yagasobo we homu egi dao, ma mena tama bidibo we yaliwe wagi dao,’ te Farisi bidigo te homu yali.

⁴⁰Jisasgo te Farisi bidibolo te po wali, “Saimon, nagebolo eno pusabo po me deli elalubao.” “Tisa bidi, enabolo pusao,” Saimongo te po wali.

⁴¹Jisasgo tama gagalali, “Gasa bidigo bidi me sibolo mone negeli mani. Bidi mebolo 100 kina mobadi, mebolo 10 kina mayu yali.

⁴²Tama nosali tega sigo te mone wei ponabo ąǫ isąbaso, agai mone negeli si sela sąwani. Mena bidigo te mone negeli munani bidi dali homu mu kęąluaibawe?”

⁴³Saimongo te po wali, “Eno homugo mone genuai mu sali bidigo te bidi dali homu mu kęąluaibao,” wali. “Nago po dolode walao,” Jisasgo te po wali.

⁴⁴Te sogo naga Jisas te we pageba ugwaba begegi soyu, Saimonbolo te po walio, “E we nago subawe? Ena nago beba asali goli, nago ena bugagia gesesiąwai, eno sągą ąį tela yabo ąį me mawai meni. Tiali goli, e wego gela guago eno sągą sawali ąį tedalama, aga bobobage tobolu nisigo eno sągą holali.

⁴⁵Nago beba ena asobadi, dwagi yai homu elama, nago ena nono nabe. Tiali goli, e wego da, ena asobode gagalama eno sągąde nono nabo togobeo.

⁴⁶Nago wel eno toboluba me mube. Tiali goli, e wego dwagi yai denami welgo eno sągą sawali usu nani.

⁴⁷Eno nagebolo obe dao, agai enade mu tia pabogo agai dwai dwai sę yali mu sela sąwani nama e ola maniąo. Mego ena dali homu dwasianu kęąluba, ta dwai dwai sę yali dwasianu sela sąwani te ola mobao,” Jisasgo te po wali.