Luk 7:8-47

⁸Mi kewögöra: Ni nanak mewöyök galömnaŋgö kukösum bapŋe al niŋgiget maljal. Nöŋgö bapne yarö azi malgetka mi jim kutum eŋgimakzal. Yeŋgöreŋök kungöra ‘Anman’ jim kutubi yaŋön anma. Kungöra ‘Kanöŋ’ jim kutubi yaŋön kama aka welen azini kungöra ‘Nup ki meman,’ jibiga yaŋön mi mema.”

⁹Jisösnöŋ keu mi möta suahö galömgöra welipköba ambazip kambu wuataŋgöba kageri, yeŋgöreŋ liliŋgöba kewö jiyök, “Nöŋön kewö jibi mötme: Israel könagesö sutŋine mewöyök mötnarip ketaŋi mewöŋi mi kungö uruŋe qahö miwikŋaial.”

¹⁰Mewö jiiga suahö galömgö kolekaziurupŋan liliŋgöba mire aŋgota welen azi miwikŋaiba eketka ölöwaka tarök. Mewö.

¹¹Miaŋgö andöŋe Jisösnöŋ taon qetŋi Nain miaŋgöreŋ aniga gwarekurupŋi aka ambazip kambulelembenöŋ wuataŋgöba anget.

¹²Miaŋgöreŋ taon kiripo naŋguŋi dopdowiiga qamöt kun aŋguba kaget. Malö kungö nahönŋa mohok-kunŋan kömuiga taongö ambazip kambu ketaŋan tokoba löm kölbingö kaget.

¹³Kembunöŋ malö mi eka wösöŋi möta jii mörök, “Kude sahötman.”

¹⁴Mewö jiba anda bokis aŋguba kageri, mi jii dörök algetka bokis misiriba kewö jiyök, “Azi gwabö, mönö wahötnöŋ. Nöŋön göhöra mewö jizal.”

¹⁵Mewö jiiga qamöt miaŋön guliba wahöta könahiba keu jiyök. Keu jiiga Jisösnöŋ namŋambuk anmapkö waŋgiyök.

¹⁶Ambazip pakpak yeŋön mi eka qem sömbuŋini möta Anutu möpöseiba jiget, “Kezapqetok azi ketaŋi kunöŋ mönö sutnine asuhuba malja.” Tosatŋan jiget, “Anutunöŋ könagesöŋi mesohol köl neŋgii maljin.”

¹⁷Yaŋgö keu buzupŋi mi sehiba Judia prowins pakpak dop köla gölmeŋi gölmeŋi likeplikep miaŋgöreŋ an teköyök. Mewö.

¹⁸Jon O-melun azinöŋ kösö mire tariga gwarekurupŋan yuai pakpak mi asuhuyöhi, miaŋgö kösohotŋi jiget mörök.

¹⁹Jiget möta gwarekŋi yahöt etkoholi kayohotka Kembugöreŋ anda kewö qesim waŋgimahotköra melaim etkiyök, “Mem ölöwak azi kamapköra mamböringa göŋön mia akzan me azi kun biaŋ kamapköra mambötpin.”

²⁰Melaim etkiiga Jisösgöreŋ aŋgota jiyohot, “Jon O-melun azinöŋ kewö qesim gihibitköra melaim netkiiga kazit, ‘Mem ölöwak azi kamapköra mamböringa göŋön mia akzan me azi kun biaŋ kamapköra mambötpin.’”

²¹Jisösnöŋ nalö miaŋgöreŋök ambazip gwötpuk uzi kawöl izekwaizek (ijeŋwaijeŋ) aka ömeŋinambuk mi mem ölöwak eŋgiyök aka jegömöl ambazip gwötpuk jeŋini metohoi uba eket.

²²Jongö gwarek yahötŋan aŋgota qesim waŋgiyohotka kewö meleŋnök, “Yuai eka mötzahori, miaŋgö kösohotŋi mönö anda Jon kewö jiyohot mötma: Jegömöl yeŋön uba eketka lokon yeŋön köna anda kagetka uzikuku yeŋön solanigetka kezapduhup yeŋön keu mötketka kömuget yeŋön guliba wahötketka etqeqeŋi yeŋgöra Ölöwak Buŋa jim asaribiga mörakze.

²³Mewö asuhui eketka kungö uruŋan qahö bölii andö nuŋgumawi, yaŋön mönö simbawoŋ akza.”

²⁴Mewö jiiga Jongö gwarek yetkön anohotka Jisösnöŋ könahiba Jongö könaŋi ambazip kambu yeŋgöra kewö jim asariyök, “Iŋini gölme qararaŋkölkölŋe miaŋgöreŋ wania ekingöra anget? Luhutnöŋ jehot uwutapköba metali anjaŋbanjaŋ ahakzawi, iŋini azi mewöŋi ekingöra anget me?

²⁵“Me wanat yuaia ekingöra anget? Azi malukuŋi aködamunŋambuk löŋgöta malöhi, mi ekingöra me? Mötket, ambazip malukuŋini kulemŋi ek sihimŋambuk löŋgöta anda kaba siyoŋsayoŋi qahö maljei, mieŋön mönö kiŋ yeŋgö jakömbuak miriŋine malje. Mi gölme qararaŋkölkölŋe qahö.

²⁶“Me wanat yuaia ekingöra anget? Kezapqetok azi kun ekingöra me? Ölŋa, nöŋön kewö jibi mötket: Azi ekeri, yaŋön mönö kezapqetok ambazip tosatŋi eŋgoŋgita tandökŋi kun akza.

²⁷Yaŋgö könaŋi mi mönöwök kewö ohoget ahöza, ‘Mötnöŋ, nöŋön kolekni garata kun melaibiga qeljiŋe anda ambazip uruŋini mindiŋgöba göhö könagi mesariga göŋön mönö yaŋgö andöŋe gölmenöŋ emu geman.’

²⁸Keu mewö ahözapmö, nöŋön kewö jibi mötket: Ambinöhök morö pakpak eŋgömegetka asuhugeri, yeŋgö sutŋine Jonöŋ mönö körek eŋgoŋgita qetbuŋaŋambuk kinja. Kinjapmö, Anutugö bemtohoŋ uruŋe aŋgota Anutugö qetbuŋaŋi miwikŋaimakzei, yeŋgö sutŋine eretŋi kondikŋi yaŋön mönö Jon oŋgitza.”

²⁹Ambazip könagesö pakpak aka yeŋgö sutŋine takis meme yeŋön mohokŋe Jongö Buŋaŋi mötkeri, yeŋön jim köleŋda “Aha! Anutugö köna diŋdiŋi jim asariza,” jiba uruŋini meleŋgetka Jonöŋ o melun mem eŋgiyök.

³⁰Mewö eŋgiyökmö, Farisi aka Köna keugö böhi yeŋön Anutugö areŋi qahö tem köla Buŋaŋi andö qeba silekmalek aketka Jonöŋ o melun qahö mem eŋgiyök.

³¹“Ambazip merak gölmenöŋ maljei, mi mönö wanatpuk dop al eŋgibileŋak? Yeŋgö silikŋini mi denöwö?

³²Yeŋön namande ewö akze. Mieŋön maket sombemnöŋ tata keu gön gila laŋ qeta kewö jimakze, ‘Nini awölop uinga iŋini liŋet gwawet qahö unduget. Nini jiŋgeŋ kölinga iŋini qahö toroqeba sahötket.’

³³Miaŋgö könaŋi kewö: Jon O-melun azinöŋ kaba nene siŋgi mala wain o qahö neiga iŋini yaŋgöra jimakze, ‘Öme kunöŋ uruŋe geiga malja.’

³⁴“Suep gölmegö azi ölŋan kaba nene nem söŋgaip aiga eŋön jimakze, ‘Mötket, yaŋön bau numbu tandök közöjeriba wain o gwötpuk nemba takis tilipqilipŋinambuk aka bölöŋi meme yeŋgö alaŋina malja.’

³⁵Körek pakpak Anutugö mötkutukutu köl gulimakzei, yeŋgö ahakmemeŋinaŋgö ölŋan mönö mötkutukutuŋinan dop köljawi, mi kondelakza.” Mewö.

³⁶Farisi (Köna keugö kapaŋkölköl) azi yeŋgöreŋök kunŋan Jisös mi nanŋi miriŋe kaba nene nemapkö köl öröyök. Köl öröi anda miriŋe öŋgöba nene dumŋe tarök.

³⁷Taon miaŋgöreŋ siŋgisöndok ambi kun malök. Yaŋön Jisös Farisi azigö mire öŋgöba tata nene neyöhi, miaŋgö buzupŋi möta kelök umköhöwakŋambuk mokoi köt kirin kun kokolak qeyöhi, mi memba öŋgöba kayök. Kirin mi nöluk tuat-tuat qetŋi alabastö miaŋön memeŋa.

³⁸Öŋgöba kaba Jisösgö könaŋe geba tata könahiba sahöri imbilŋan tiŋgita geba könaŋe miriyök. Miriiga nöröp jupŋan kereŋ memba kutui öröniiga könaŋi numbuŋan yöhötim nemba kelök umköhöwakŋambuknöŋ miriyök.

³⁹Miriyökmö, Farisi azinöŋ Jisös köl öröyöhi, yaŋön mi eka uruŋan kewö mötmöriyök, “Ambi ki siŋgisöndokŋambuha. Azi kiaŋön kezapqetok azia malbawak ewö, yaŋön mönö ambi könaŋe misirizawaŋgö könaŋi möt kutubawak.”

⁴⁰Jisösnöŋ mi möt kutuba kewö meleŋda jiyök, “Saimon, nöŋön keu kun jimamgö mötzal.” Jiiga jiyök, “Böhi, ölöp jinöŋ mötpi.”

⁴¹Jiiga Jisösnöŋ kewö jii mörök, “Ambazip yahötŋan benknöŋ anda tosa albitkö moneŋ galömŋaŋgö qesiyohot. Kunöŋ silim 500:kö töwaŋi (Kina 2500,-), kunöŋ silim 50:gö töwaŋi (Kina 250,-) miaŋgö dop tosa albitkö qesiyohot. Qesiyohotka miaŋgö dop etkiyök.

⁴²Etkiba könaŋgep tosaŋiri misimahot jiiga moneŋiri qahöwahiga osiyohot. Osiyohotka benk galömŋan tosaŋiri qeköba kutuba mosöt etkiyök. Mosöt etkiiga yetköreŋök daŋön i uruŋan gwötpuk jöpaköm waŋgimakza?”

⁴³Mewö qesiiga Saimonöŋ kewö meleŋnök, “Nöŋgö mötmötnöŋ tosa ketaŋi kutuba mosöt waŋgiyöhi, yaŋön.” Mewö meleŋniga jiyök, “Gi keu törörök kewöta jizan.”

⁴⁴Mewö jiba ambigöreŋ liliŋgöba kewö jii mörök, “Ambi ki eknöŋ. Nöŋön mirige kotpiga göŋön könani saŋgoŋmamgö o kun qahö niŋgizanmö, ambi kiaŋön mönö könani imbilŋan miriba nöröp jupŋan kereŋ memba kutui öröniza.

⁴⁵Göŋön numbuni qahö yöhötim nezanmö, ambi kiaŋön mönö mire kotpiga miaŋgöreŋök kapaŋ köla könani yöhötim nemba malja.

⁴⁶Göŋön nöröpni kelök kude mirizanmö, ambi kiaŋön mönö kelök umköhöwakŋambuknöŋ könane nömiriza.

⁴⁷Miaŋgöra nöŋön kewö jibi mötnöŋ: Anutunöŋ ambi kiaŋgö siŋgisöndokŋi gwötpuk mi mosöta saŋgoŋniga miaŋgöra uruŋan ni gwötpuk jöpaköm niŋgiza. Kunöŋ siŋgisöndok boromdökŋi ahiga Anutunöŋ siŋgisöndokŋi morörökŋi mosöriga yaŋön uruŋan borom kun miyök jöpaköm niŋgimakza.”