Luk 7:8-47

⁸Bawo ina wəkawɛ yati abɛ’em ŋɔ iyi dəntɔf, k’ina sɔ iyɔ asɔdar alɔma aŋɛ ŋay’im dəntɔf mɔ. Nwɛ iŋkulɛ fɔ məkɔ mɔ, wəkayi ɔŋkɔ, k’iloku wəkɔ fɔ məder-ɛ, wəkayi ender. K’iloku wəcar kem fɔ məyɔ ntɛ-ɛ, ɔŋyɔ ti.»

⁹Ntɛ Yesu ene moloku mamɔkɔ mɔ, kɔ teta wəsɔdar nwɛ teŋciyanɛ kɔ. K’ɛŋkafəlɛ, k’ɛntɛfərnɛ afum akɔ ŋanacəmɛ kɔ darəŋ mɔ, k’oloku: «Ic-lok’un, ali nde Yisrayel inanəŋk fɛ kəlaŋ pəmɔ kaŋkɛ!»

¹⁰Kɔ asom a wəsɔdar nwɛ, ŋalukus ndɔrɔn. Kɔ ŋabəp wəcar nwɛ ɛnatɔ-tamnɛ mɔ, pətamnɛ keŋ.

¹¹Ntɛ telip mɔ, k’ɔŋkɔ dare ndɛ aŋc-we Nayin mɔ. Atəkəs ɔn kɔ afum alarəm ŋanasol kɔ nkɔn kəkɔ.

¹²Ntɛ ŋalɔtərnɛ kəbɛrɛ ka dare mɔ, kɔ ŋambəpɛnɛ kɔ afum ŋaŋc-kekərɛ fum wəfi dəkəwup, mba fum nwɛ sona gboŋ sɔ kɛrɛ ɛnakom kɔ; wos pəfi sɔ. Afum alarəm a dare dadɔkɔ ŋaŋc-kekərɛ wəfi wəkakɔ dəkəwup.

¹³Kɔ Yesu ɛnəŋk wəran nwɛ, k’ɔyɔnɛ kɔ nɔnɔfɔr, k’oloku kɔ: «Ta məbok!»

¹⁴Kɔ Yesu ɔŋcɔŋnɛ k’oŋgbuŋɛnɛ kaŋkəra ka wəfi. Aŋɛ ŋanatɔmpər kɔ mɔ ŋaŋcəmɛ. Kɔ Yesu oloku: «Wətɛmp, ina olok’əm: Məyɛfɛ!»

¹⁵Kɔ wəfi ɛyɛfɛ k’ɛndɛ, k’oŋcop kəlok-loku. Kɔ Yesu oluksɛ wəfi nwɛ kɛrɛ.

¹⁶Kɔ fəp fənesɛ; kɔ ŋayɛfɛ kəcam debeki da Kanu, ŋac-loku: «Wədəŋk wəka Kanu wəpɔŋ ɛyɛfɛ su dacɔ! Kɔ Kanu kənder kəmar afum ɔn!»

¹⁷Kɔ tɔyɔ ta Yesu tatɔkɔ tɛsam atɔf ŋa Yude fəp, kəbəp ka sədare səkɔ səŋkɛl Yude mɔ.

¹⁸Kɔ acɛpsɛ a Saŋ darəŋ ŋaŋkɔ ŋaloku kɔ mes mamɔkɔ fəp. Kɔ Saŋ ewe acɛpsɛ ɔn darəŋ dacɔ afum mɛrəŋ,

¹⁹k’osom ŋa kəkɔ-yif Wəbɛ Yesu kɔ pəyɔnɛ nkɔn ɔyɔnɛ nwɛ eyi kəder mɔ ba, ka pəmar pakar wəlɔma?

²⁰Ntɛ ŋambəp kɔ mɔ, kɔ afum aŋɛ ŋaloku kɔ: «Saŋ wəgbət afum dəromun osom su kədeyif’əm: ‹Məna ɔyɔnɛ, nwɛ eyi kəder mɔ ba, ka pəmar səkar wəlɔma?›»

²¹Afum akakɔ anasom mɔ ŋaŋkɔ ŋabəp Yesu pəc-taməs docu da atɔtamnɛ alarəm, lanyiru, aŋɛ yɔŋk yɛlɛc yɛŋcəmɛ darəŋ mɔ, k’ɔsɔŋɛ atɔnəŋk alarəm kənəŋk.

²²Kɔ Yesu oloku ŋa: «Nəkɔ nəloku Saŋ tɔkɔ nənəŋk kɔ tɔkɔ nəne mɔ: Atɔnəŋk ŋanəŋk, atorər ŋaŋkɔt, k’asɔkəs aka sen, atɔne ŋane, afi ŋatimɛ, andəŋk toloku tɔtɔt nnɔ atɔyɔ daka ŋayi mɔ.

²³Pəbɔt nwɛ tetem tɔntɔdesɔŋɛ kəloŋɛ mɔ!»

²⁴Ntɛ asom a Saŋ aŋɛ ŋaŋkɔ mɔ, kɔ Yesu ɛyɛfɛ kəloku afum teta Saŋ pəc-yif: «Ake nənakɔ kəmɔmən nde dətɛgbɛrɛ-ɛ? Awo nŋɛ afef ŋeyikəc mɔ ba?

²⁵Mba ake nənakɔ oŋ kəmɔmən di-ɛ, fum wəbɛrnɛ duma dɔtɔt? Mba abɛrnɛ suma sətɔt, ŋayi pətɔt disrɛ ŋandɛ wɔlɔ wa abɛ disrɛ.

²⁶Ake nənakɔ oŋ kəmɔmən-ɛ, wədəŋk wəka Kanu-ɛ? Ɛy, ic-lok’un, Saŋ entesɛ pətas wədəŋk wəka Kanu.

²⁷Nkɔn ɔyɔnɛ nwɛ yecicəs yecempi yoloku tetɔn mɔ: ‹Isak wəsom pəy’im kiriŋ pəkɔ-cɛpəs dɔpɔ dam fɔr yam kiriŋ.›»

²⁸Kɔ Yesu oloku: «Ic-lok’un, aŋɛ aran ŋaŋkom mɔ fəp, ali wəkin eyi fɛ nwɛ eŋcepər Saŋ mɔ. Mba nwɛ ɛfɛtɛ nde dɛbɛ da Kanu mɔ, ɔyɔnɛ nwɛ eŋcepər Saŋ mɔ.

²⁹Afum aŋɛ ŋanane kɔ kəlok-loku mɔ fəp, kəbəp awerəs dut, kɔ ŋawosɛ dolompu da Kanu; ti disrɛ kɔ ŋawosɛ a Saŋ pəgbət ŋa dəromun;

³⁰mba aFarisi kɔ atəksɛ a sariyɛ ŋanawosɛ fɛ ntɛ Kanu kənafaŋɛ ŋa mɔ, kɔ ŋafati a Saŋ pəgbət ŋa dəromun.

³¹Anɔ indetubcɛnɛ afum a dɛtɛmp dandɛ-ɛ? Anɔ ɔ ŋawurɛnɛ-ɛ?

³²Aŋɛ ŋɔ ŋawurɛnɛ: Ŋawurɛnɛ awut aŋɛ ŋandɛ kəfo nkɛ afum fəp ŋambəpsɛnɛ mɔ, a ŋac-wenɛnɛ kəkɔ-loku: ‹Səfulanɛ nu aluk, kɔ nəntɔpisɛ! Kɔ səleŋsɛ nu meleŋ ma defi, kɔ nəntɔbok.›

³³Bawo ntɛ Saŋ wəgbət afum dəromun ɛnader mɔ, ɔŋc-sɔm fɛ kəcom, oŋc-mun fɛ member, kɔ nəloku: ‹Wəka ŋɔŋk ŋɛlɛc ɔfɔ!›

³⁴Kɔ Wan ka fum ender, pəc-sɔm kəcom pəc-mun member kɔ nəloku: ‹Wəcɛlək kɔ wəcis ɔfɔ, wanapa ka abaŋəs dut k’aciya!›

³⁵Mba awut a kəcərɛ pətɔt ŋawosɛ dolompu da ki.»

³⁶Kɔ wəFarisi wəlɔma ewe Yesu kəkɔ-di yeri kɔ nkɔn. Kɔ Yesu ɛmbɛrɛ nde kəlɔ ka wəFarisi wəkakɔ, k’ɔŋkɔ pəndɛ amɛsa kiriŋ.

³⁷Wəran wəciya wəlɔma ɛnayi dare dadɔkɔ, ntɛ ene a Yesu ɔŋkɔ nde kəlɔ ka wəFarisi nwɛ mɔ, k’ɛlɛk tɔkɔ-bɔ pɔtɔt pɛlarɛ labundɛ,

³⁸kɔ wəran nwɛ ɔŋkɔ pəcəmɛ Yesu kumunt darəŋ pəsumpər kɔ wɛcək. K’ɛyɛfɛ kəbok pəc-caŋkəsɛ mɛŋcər mɔn wɛcək wa Yesu, k’ɛfɛŋətɛ wɛcək wa Yesu cəfon cɔn, pəc-cup wi, pəc-loŋsər wi labundɛ.

³⁹Ntɛ wəFarisi nwɛ ɛnawe Yesu nde ndɔrɔn, ɛnəŋk tatɔkɔ mɔ, k’olokunɛ dɛbəkəc: «Fum wəkawɛ ɔŋyɔnɛ wədəŋk wəka Kanu-ɛ, k’ɛŋcərɛ wəran nwɛ oŋgbuŋɛnɛ kɔ mɔ, fum nwɛ ɔyɔnɛ mɔ—Wəran wəciya.»

⁴⁰Kɔ Yesu ɛlɛk moloku, k’oloku: «Simɔŋ, iyɔ toloku tɔlɔma tolok’əm.» Kɔ Simɔŋ oloku kɔ: «Məlok’im ti, Wətəksɛ.»

⁴¹«Wəbɔs-bɔsər wəlɔma afum mɛrəŋ ŋanatɔmpərɛ debe: Wəkin nwɛ pətɔmpərɛ kɔ gbeti mɛŋcəmbəl masar kəcamət (500); kɔ wəka mɛrəŋ pətɔmpərɛ kɔ mɛŋcəmbəl 50.

⁴²Mba ntɛ wəbɔs-bɔsər nwɛ ɛnəŋk fɔ alɛkər ɔn səbe ŋayɔ fɛ gbeti boluksɛ kɔ mɔ, k’ɛŋaŋnɛnɛ mɛrəŋ maŋan fəp. Akakɔ mɛrəŋ anɔ endenaŋkanɛ kəbɔtər kɔ pətas wəkɔ-ɛ?»

⁴³Kɔ Simɔŋ oloku kɔ: «Pəwurɛn’em, a wəkɔ ɛnatɔmpərɛ kɔ gbeti bɛlarəm mɔ.» Kɔ Yesu oloku kɔ: «Gbɛs, məloku kaŋce!»

⁴⁴Kɔ Yesu ɛŋkafəlɛ k’ɛntɛfərnɛ wəran nwɛ, k’oloku Simɔŋ: «Mənəŋk wəran nwɛ? Imbɛrɛna nnɔ kəlɔ kam mba məsɔŋna f’em domun ibikɛnɛ wɛcək; mba nkɔn ɛŋcaŋkəsɛ wɛcək wem mɛŋcər mɔn, k’ɛfɛŋətɛ wi cəfon cɔn.

⁴⁵Məŋcupna f’em, mba nkɔn kəyɛfɛ ntɛ imbɛrɛna nnɔ mɔ, a k’oŋcop kəcupəs’im wɛcək mɔ, haŋ ndɛkəl itɔ eyi kəyɔ.

⁴⁶Məsopna f’em moro dəromp, mba wəran wəkawɛ osop’im labundɛ dəwɛcək.

⁴⁷Itɔ ɔsɔŋɛ ntɛ intam kəlok’əm fɔ, kiciya kəlarəm nkɛ eŋciya mɔ, aŋaŋnɛnɛ kɔ ki, bawo nkɔn ɔmbɔtər pənaŋkanɛ. Məna nwɛ aŋaŋnɛnɛ pipic mɔ, pipic pɔ məmbɔtər.»