Luka 7:8-47

⁸Paana eau tanuaga esau ena heaheari: egu iala heahearidi hinage se awatanuagaegu, esau ea heriba i lau, abo i lau; esau ea heriba i laoma, hinage abo i laoma; egu heaheari ea heriba, ea ’ne, ‘Teina ta u abi,’ abo i abi.”

⁹Teina riba ta Iesu i ataiedi, tau wa i nooei, i torobui, tatao wa ia se hemuriwatai i heribadi, i ene, “Ea heribamiu ta, nige sunuma lailai esau ea lobai doha ina, Isaraela aridi eai nige’e.”

¹⁰Isi se hetamaridi wa se uio numa eai, tau asiebo wa se lobai i lolo’o.

¹¹Mara‐ie‐tom i lage eanua esau esana ede Naina; ena heaheatayao gamagaridi ia maena se lau, eo moutuana hinage.

¹²Eanua tonana guduna se hanahanaui, sinare esau se bahei murimuri eai ia sinana natueseesegana, sine wa hinage ie wabu; eanua tataodi gamagaridi ia se hesaguei.

¹³Guiau sine wa i ita, ia i nuatoatoai, i heriba, i ene, “Tabu u dou.”

¹⁴Iesu i laoma sinare aba‐baheina i abiitalaei: taubahena se tarutoro. Ia abo i ene, “Hewari e, ea heribam ta, u toro.”

¹⁵Taumate wa abo i bawabigabiga, ia abo arinana ie tore, i ribariba. Iesu abo i mosei sinana arinai.

¹⁶Isi gamagaridi se matausi, Eaubada se hedebasaei, si ene, “Peroveta lailai ita boeada eai ie tubu,” eo si ene “Eaubada ena tataoyao i aitaumanaidi.”

¹⁷Arinai abo wasana lailai i lau Iudea oeadi gamagaridi eai, eo i lau eanua gamagamagaridi i hetaiiridi.

¹⁸Ioane ena heaheatayao teina ginauri gamagaridi ta ia se heriba.

¹⁹Ioane ena heaheata labui i eogaidi, abo i hetamaridi Iesu arinai, i ene, “Ia se ribaei bena i laoma wa ia ede oa? e hari tau abo ai nuatuwatai?”

²⁰Taudi labui wa se lagema ia arinai, si ene, “Ioane Bapatiso i hetamarimai arim eai, i ene, ‘Ia se ribaei bena i laoma wa ia ede oa, e hari tau abo ai nuatuwatai?’”

²¹Nei asubenana ne gamagaridi se aiiwala, eo se asiebo, eo earua baaea se luidi, i hemauridi; eo taumatagibugibu gamagaridi matadi i helaladi.

²²Iesu arinadi i heuioidi, i ene, “Taiede au lau, ginauri au itadi eo au ataiedi Ioane au heriba, ia ede taumatagibugibu matadi se lala, taulaulaudae se lautoditodi, lepera se uruosi, taubeadoodoo se ataiei, taumatemate se toro, tatao gogogesagesa aridi eai evanelia se lauguguiaei.

²³Taba tau esa eo esa nige i nuabaaea arigu eai, nuana abo i woiwoina.”

²⁴Ioane ena riba taulaena se lauo, abo Iesu Ioane ribana tatao aridi eai i ribahetubu, i ene, “Aue lau barabara eai wa saha bena au ita? Didiari mana i iuhiheeoeo wa?

²⁵Aue lau nei eai saha bena au ita? Tau esau ana lulu bigabigana ie lui? Isi lulu paspasadi tauluidi, eo aiai lolodi tauaidi se bawa wasawasa edi numa eai.

²⁶Aue lau nei eai saha bena au ita? Peroveta wa? E, ea heribamiu ta, ea ’ne, ia peroveta gamagamagari i saetawatawaidi.

²⁷Ia ede ia, se uriyao, si ene, ‘Egu tauwasa ea hetamarimugaiem, em eda abo i sepanonohai.’

²⁸Ea heribamiu ta, ea ’ne, tatao sisine se labasidi wa aridi eai Ioane Bapatiso mo peroveta saesaena; taiede Eaubada ena basileia eai tau gagiri aririna ia Ioane i saetawatawai.”

²⁹Tatao gamagaridi ia se ataiei, eo takisi tautano tataodi hinage, Eaubada se awamamohoiei, paana isi Ioane ena bapatiso eai se hebapatisoidi wa.

³⁰Parisea tataodi eo laugagaeo tauheatana tataodi isi nuaboeadi eai Eaubada ena riba se tauotaotaei, paana Ioane ena bapatiso nige se abi.

³¹I ene, “Teina isi ta tataodi saha arinai ta heaheasoniedi? Isi doha abo aisana mo?

³²Isi doha ede merumeru se bawagogo abauneune eai, se haihaieogaidi, si ene, ‘Huelele aie iuhiawa arimiu eai na nige aue saga: aie dou nuanuadubuemiu, na nige au doudou.’

³³Na Ioane Bapatiso i laoma aiai nige i aidi eo waina nige ie nom: omi au ene, ‘Diabolo esau ia boeana eai.’

³⁴Tau Natuna i laoma aiai i aidi, eo waina ie nom, omi au ene, ‘Tauaiaisom, eo waina taunomnomsom, takisi tataodi eo tatao baabaaeadi edi heriam!’

³⁵Sonoga nanatunayao gamagaridi aridi eai, sonoga wa abo se hemamohoiei.”

³⁶Parisea tauna esau i henua bena Iesu maena se aiaiesega. Ia i awasae Parisea tauna ena numa eai, i bawabigabiga se aiai.

³⁷Eanua sinena esau, sine baaeana, wasana i ataiei Iesu Parisea tauna ena numa eai i bawabigabiga i aiai, nado, alabata ilena eai, ie abi leama.

³⁸Ia murina eai aena eai i totoro i doudou, ia aena matasulu eai i deuridi, eo uru maiawadi eai i saudi, ia aena i alagoiedi, eo nado wa arinai i heeausidi.

³⁹Parisea tauna, Iesu i eogai wa, wau wa ie ita, nuaboeana eai i nuatui, i ene. “Tau ta ena ia peroveta, sine ta i abilau ia arinai abo i nuatulobaiyao: paana ia sine baaeana.”

⁴⁰Iesu i heuio ia arinai, i ene, “Simona e, egu riba begana bena ea heribam.” Ia i ene, “Tanuagagu e, u riba.”

⁴¹“Tatao labui tau esau ena gogo se abidi sora nige se hemaisadi: esau ana haga denari handere haligigi, esau denari tatao‐labui‐si‐mate‐saudoudoi.

⁴²Isi nige edi moni, ia taudi labui adi hagahaga i soegabaedi. U ene edoha, aitea tau wa ia abo i gadosisiaririei?”

⁴³Simona ia arinana i heuio, i ene, “Nuana ia wa ana haga ie lai wa, na i soegabaei.” I ribalau ia arinai, i ene, “U nuatui i dudurai.”

⁴⁴Ia abo i sinibui sine wa arinai, eo i ribalau Simona arinai, i ene, “Sine ta u ita? Ea awasaema em numa eai, goila nige u oiyama aegu ana deudeuri: na ia mo matasulu eai aegu i deuridi, eo uru maiawadi eai i saudi.

⁴⁵Oa nige u alagoiegu: teina sine ta egu huia awasaema wa ie tubu aegu i alagoiedi, nige i lautom.

⁴⁶Urugu eausi eai nige u heeausi: teina sine ta aegu nado eai i heeausidi.

⁴⁷Arinai ea heribam ta, ea ’ne, ena baaea, se gamagari hinage, se ribagigiridio; paana i gadosisiariri: ia baaea gagiridi mo se ribagigiridi, ena gadosisi hinage gagirina mo.”