Luka 7:8-47

⁸Adalese so hem me injum manuš talo autoritet, hem isi man vojnici teleder mande. I jekhese vaćerava: “Dža!”– i ov džala. A averese vaćerava: “Ava!”– i ov avela. A mle slugase vaćerava: “Ćer adava!”– i ov ćerela.”

⁹A o Isus ked šunđa adava olestar, iznenadinđa pe, irinđa pe nakoro narodo kova džala ine palo leste hem phenđa lenđe: “Vaćerava tumenđe, na arakhljum ni jekhe Jevrejco ano Izrael te ovel le esavki vera.”

¹⁰I ked okola kola inele bičhalde irinde pe čhere, arakhle e sluga saste.

¹¹Na but palo adava, o Isus dželo ki diz savi vičime Nain. Oleja da džele lesere učenici hem pherdo narodo.

¹²A ked alo paše uzalo udar e dizjakoro, reslja e dizutnen sar legarena e mule čhave, kova inele jekhoro pe dajaće koja inele udovica. Pherdo dizutne džana ine e dajaja te parunen e čhave.

¹³I ked dikhlja la o Gospod, pelo lese žal olaće i phenđa laće: “Ma rov!”

¹⁴I alo paše hem dolinđa pe upro nosilja. Tegani okola so akharde terdine, a o Isus phenđa: “Terneja, tuće vaćerava, ušti!”

¹⁵I o mulo beštino hem lelja te vaćeri, i o Isus dinđa le lesere dajaće.

¹⁶Tegani sare darandile hem slavinde e Devle vaćerindoj: “Baro proroko iklilo maškar amende!” hem: “O Devel alo te pomožini ple narodose!”

¹⁷I adava šundilo ko sa o thana e judejakere hem ko sa o pašutne thana.

¹⁸I sa adava e Jovanese vaćerde lesere učenici. Tegani o Jovan vičinđa kora peste nesave dujen ple učenikonendar

¹⁹i bičhalđa len koro Gospod o Isus vaćerindoj: “Tu li injan adava kolese o Devel dinđa plo lafi da valjani te avel ili te adžićera avere?”

²⁰I adala manuša ale koro Isus hem phende: “O Jovan o Krstitelj bičhalđa amen kora tute vaćerindoj: 'Tu li injan adava kolese o Devel dinđa plo lafi da valjani te avel ili te adžićera avere?'”

²¹Baš ko adava sati o Isus sasljarđa buten oto nambormipa, oto pharipa hem oto bišukar duhija, i bute kororenđe dinđa dikhiba.

²²Tegani o Isus phenđa e Jovanesere učenikonenđe: “Džan hem vaćeren e Jovanese so dikhljen hem so šunđen: o korore dikhena, o bange phirena, o gubavci čistinena pe, o kašuke šunena, o mule uštena, okolenđe soi ani potreba vaćeri pe o Šukar lafi.

²³I bahtaloi okova kova nane sablaznime zbog mande.”

²⁴Ked e Jovanesere bičhalde manuša džele, o Isus lelja te vaćeri e narodose e Jovanestar: “So ikliljen ki pustinja te dikhen? I trska sava phudela i barval? Na!

²⁵Ili so ikliljen te dikhen? E manuše ano barvale šeja hurjavde? Na! Okola ano sjajna šeja hem so živinena ano luksuz, eče tane ko palate.

²⁶Ili so ikliljen te dikhen? Proroko? Oja, vaćerava tumenđe, ovi po više oto proroko!

²⁷Ovi okova kolestar o Devel phenđa ano Sveto Lil: 'Ače, bičhalava mle glasniko angla tute, kova ka ćerel će o drom angla tute.'

²⁸Vaćerava tumenđe: maškar okolende kolai bijande nijekh nane po baro e Jovanestar, a o najtikoro e Devlese ano carstvo po baroi olestar.

²⁹I sa o manuša hem o carinici kola šunde adava, pendžarde dai e Devlesoro sikajba čačikano. Oni adala so krstinde pe e Jovanesere krstibnaja.

³⁰A o fariseja hem o učitelja e Mojsijasere zakonestar na mangle te len o plan e Devlesoro pumenđe. Oni adala so na mangle o Jovan te krstini len.

³¹O Isus phenđa: “Kasar akana te uporedinav e manušen soi akana dživde? Kasei slična?

³²Sličnai e manušenđe kola bešena ko drom hem vaćerena jekh averese: 'Bašalđam tumenđe veselo, a na čhelđen! Đilabđam tužno, a na runđen!'

³³Ađahar, alo o Jovan o Krstitelj. Ni na xalja maro ni na pilja mol, a phenena: 'O demoni ano leste!'

³⁴Aljum me, o Čhavo e Manušesoro. Xava hem pijava, a phenena: 'Eče manuš xalano hem mato, amal e carinikonengoro hem e avere grešnikonegoro!'

³⁵Ali i mudrost e Devlesiri mothovđa pe dai čačipe sa lakere čhavorendar.”

³⁶Nesavo fariseji palo anav Simon vičinđa e Isuse te avel te xal koro leste. Ov đerdinđa e farisejese ko čher hem čhivđa pe uzalo astali.

³⁷I eče, adari ali i đuvli kolaće džanđa pe dai grešnica ani diz, adalese so šunđa da o Isus inele uzalo astali e farisejese ko čher, i anđa skupo miris ko alabasterno čaro.

³⁸I terdindoj palo lesere pre, runđa i lelja te sampaćeri lesere pre ple asvencar hem koslja len ple balencar. I tegani čumudinđa lesere pre hem makhlja len e miriseja.

³⁹Ked adava dikhlja o fariseji kova vičinđa le, phenđa ana peste: “Tei čače dai akava manuš proroko, ka džanel ine koi hem savi akaja đuvli koja pipini le, adalese soi grešnica.”

⁴⁰A o Isus phenđa lese: “Simone, isi man nešto te vaćerav će.” A ov phenđa: “Učitelju, vaćer!”

⁴¹“Duj džene inele dužnici nesave manušese kova dela love ko zajam. Jekh alo lese panšel e rimljanengere denarija, a o dujto pinda.

⁴²Adalese so na ine len te irinen, ov oprostinđa o dugo sodujenđe. Adalese, ko olendar više ka mangel le?”

⁴³O Simon phenđa: “Mislinava da okova kase oprostinđa više.” Tegani ov phenđa lese: “Oja, šukar phenđan.”

⁴⁴Irinđa pe nakori đuvli, i phenđa e Simonese: “Dikheja li akala đuvlja? Đerdinđum tuće ko čher, pani mle prenđe na anđan, a oj sampaćerđa mle pre ple asvencar hem koslja len ple balencar.

⁴⁵Na čumundinđan man ni jekhvar, a oj, sar đerdinđum na ačhavđa te čumudini mle pre.

⁴⁶Na makhljan mlo šero e uljeja, a oj makhlja mle pre e miriseja.

⁴⁷Adalese phenava će: “But manglipe mothovđa, adalese soi laće oprostime but greja; a xari manglipe mothoj okova kolesei oprostime xari greja.”