San Lucas 7:8-47

⁸Esepia, che avei niha areco che cuaita. Iyavei areco sundao che voya. Eso peve, ahese ñepei upe, ahe evocoiyase oso voi eté; ambuae upe: Erio, ahese, ou voiño ité cheu. Ipare, Ereyapora co mbahe, ahese che rembiguai upe, ahe evocoiyase che reroyaño voi’ ehi ore mborɨpar” ehi Jesús upe yuvɨreco.

⁹Aipo oyeupe hese Jesús, “¡Too!” ehi. Ipare aipo ehi vupindareta upe: —Supi eté ndasepiai vahe ité co mbɨa che reroya tuprɨ vahe nungar judío eta pãhuve —ehi.

¹⁰Yuvɨroyevɨpase sundao rerecuar mborɨpar sẽtave yuvɨreco, aheve osepia evocoi semimboacua yuvɨreco ocuera tuprɨse.

¹¹Ipare voi Jesús oso tecua Naín ve, iyavei semimbohe yuvɨrasoño ité supi ava rehɨi reseve avei no.

¹²Vɨrovɨse tecua oso, osepia tehõgüer ava vɨrocuase yuvɨreco ñotɨ ãgua. Ahe cuña imer mano vahecuer membrɨ ñepei vahe ité viña. Tecua pɨpendar setá iteanga ava yuvɨraso supi.

¹³Cuña repiase rumo, oiparaɨsuereco. Ipare aipo ehi chupe: —Ereyaseho eme —ehi.

¹⁴Evocoiyase oyemboya oso, opoco tehõgüer rɨru rese. Sese ovosɨi vahe evocoiyase vɨropɨtaño yuvɨreco chupe. Ipare aipo ehi tehõgüer upe: —Mbɨa chĩhivahe, che aipo ahe ndeu: ¡Eñarapuha! —ehi.

¹⁵Evocoiyase omano vahecuer oñarapuha oĩ iyavei oñehe no. Ichui Jesús omondo ichɨ upe.

¹⁶Opacatu tuprɨ ité ava oyembosɨquɨye sepiase yuvɨreco: —Cũritei oyemboyecua Tũpa ñehe mombehusar seco ɨvate vahe yande pãhuve cute —ehi yuvɨreco. Iyavei, —Tũpa niha ou güecua pɨ̃tɨvɨi ãgua oico —ehi avei yuvɨreco.

¹⁷Ipare co Jesús rerãcua yandusa opacatu Judea rupi, yɨvɨrindar rupi avei no.

¹⁸Juan avei oyandu opacatu co mbahe oico. Esepia niha, supindareta omombehupa co mbahe yuvɨreco chupe.

¹⁹Evocoiyase omondo ñuvɨrío vupindar Jesús upe mbahe rese porandu ãgua ‘¿nde ité vo Tũpa Rembiporavo aipo sãrombrɨ ereico, anise oime tie ambuae orosãro vaherã?’ oyapave.

²⁰Evocoiyase oyepota yuvɨraso Jesús upe aipo ehi yuvɨreco chupe: —Juan Oporoãpiramo vahe ore mbou ndeu co mbahe rese porandu ãgua: ¿Nde ité vo Tũpa Rembiporavo ereico imombehuprɨ ereyu vaherã, anise ambuae pĩha orosãrora oroico? —ehi yuvɨreco chupe.

²¹Ahe arɨ pɨpeve voi Jesús ombogüera setá ava imbaherasɨsa sui oico, ava caruguar rerecosar sui avei no. Iyavei ava ndasesapɨsoi vahe setá ombogüera.

²²Ahese ramo aipo ehi chupe cute: —Peso, pemombehupa Juan upe mbahe pe rembiepia iyavei pesendu vahe: “Ndasesapɨsoi vahe osareco tuprɨ cũritei yuvɨreco, ipãri-pãri vahe oguata tuprɨ, iyavei lepra rerecosar ocuerapa tuprɨ, ndayapɨsai vahe avei yapɨsapa, omano vahe opa ocuerayevɨ yuvɨreco iyavei ava iparaɨsu vahe upe imombehusa pɨ̃sɨrosa resendar ñehesa” peyera chupe.

²³¡Ovɨharetera acoi ava oyeroyaño vahe che rese! —ehi Juan rupindar upe.

²⁴Juan rupindar yuvɨraso pare, Jesús omboɨpɨ imombehu ava upe Juan recocuer: “¿Pesepiase Juan recocuer ava porẽhɨsave, capihiata ɨvɨtu ombova-mbova vahe nungar pĩha?

²⁵Anise, ¿pesepia tie iturucuar porañete ai vahe iyemboeteise? Ẽgüe ehi vahe rumo secoi mborerecuar guasu guapɨsave yepi.

²⁶¿‘Mara ehi secocuer’ peye vo chupe? ¿Tũpa ñehe mombehusar ité pĩha? Ahe ité, iyavei evocoi niha ɨvate catu vahe Tũpa ñehe mombehusar sui.

²⁷Ahe chupe ité Tũpa icuachiaprɨ aracahendar pɨpe aipo ehi: ‘Amondora che ñehe mombehusar nde renondeve nde raperã moingatu ãgua’ ehi.

²⁸Aracahe suive ndipoi eté ɨvate catu vahe Juan sui. Yepe ahe ɨvate catu vahe viña, Tũpa mborerecuasave rumo ava seco mbegüemi catu vahe ɨvate catu ichui.

²⁹“Co iñehe renduse opacatu ava, opacatu guarepochi rerocuasar yuvɨrecoi vahe avei oñeapiramo uca vahecuer Juan upe yuvɨreco: ‘Supi eté Tũpa avɨye vahe ité’ ehi eté yuvɨreco cute.

³⁰Fariseo eta rumo iyavei Moisés porocuaita rese oporombohe vahe ahe noñeapiramo uca potai vahe Juan upe yuvɨreco, ahe vɨroɨ̃roño Tũpa remimbotar oyeupendar yuvɨreco.

³¹“¿Mbahe rese pĩha amboyoyara ava recocuer cũriteindar? ¿Mara ehi pĩha secocuer?

³²Ahe inungar chĩhivahe iguayɨ tẽi vahe ocar rupi. Ipare oñehe pucu-pucu omborɨpar upe yuvɨreco aipo ehi: ‘Oromoñehe tẽi mimbɨ pẽu, ndapepɨvoi eté rumo; iyavei orosapucai tẽi sapucaisa vɨharẽhɨsa resendar pẽu, ndapeyasehoi avei’ ehi.

³³Esepia, ou Juan Oporoãpiramo vahe oico. Ahe ndohui vahe pan iyavei ndoɨhui vahe uva rɨcuer. Pe evocoiyase, ‘Co mbɨa caruguar vɨreco vahe’ peye tuprɨ tẽi chupe no.

³⁴Coiye che ayu, Ava Rɨquehɨr, acaru iyavei aɨhu tuprɨ avei. Ipare, ‘Co mbɨa icaru guasu ai vahe secoi, iɨhu guasu ai vahe avei no’ peye cheu; ‘Ava angaipa viyar mborɨpar tẽi iyavei ava guarepochi rerocuasar mborɨpar tẽi’ peye avei cheu.

³⁵Ava Tũpa mbahecuasa vɨreco vahe rumo icuasara sembiapo rese” ehi.

³⁶Fariseo Simón serer vahe oñehe Jesús upe: “Terecarumi che pɨri” ehi. Jesús evocoiyase oso sẽtave oguapɨ oĩ mesave.

³⁷Ahese cuña angaipa viyar evocoi tecua pendar secoi vahe oyandu ichose Simón rẽtave icaru ãgua. Sese vɨroyepota aheve mbahe sɨ̃acua vahe sɨru pɨpe seraso sepɨrusu vahe chupe.

³⁸Aheve oyasehó ite oñenopɨha Jesús pɨve iyavei güesaɨ pɨpe opa tuprɨ omoaquɨ ipɨ. Ipare opaño omombiru oha aprɨ pɨpe ichui, iyavei oipɨrupɨte, oipɨyere avei mbahe sɨ̃acua vahe ipɨ rese.

³⁹Sepiase fariseo, ipɨhañemoñeta tẽi: “Co mbɨa Tũpa ñehe mombehusar itese, oicuaño itera co cuña opoco vahe oyese ndipɨhai vahe viña” ehi tẽi fariseo chupe.

⁴⁰Evocoiyase aipo ehi fariseo upe: —Simón, amombehu potami mbahe ndeu —ehi. —Avɨye Porombohesar, emombehu ru cheu —ehi.

⁴¹Evocoiyase Jesús aipo ehi chupe: —Ñuvɨrío mbɨa oime vɨrocua guarepochi mbɨa guarepochi mondosar sui yuvɨreco. Ñepei vɨrocua guarepochi quiniento tuprɨ mboravɨquɨ repɨrã ichui. Ambuae evocoiyase cincuenta rupive vɨrocua.

⁴²Ipare ndoicatu irise ité imboyevɨ ãgua yuvɨreco chupe, evocoi mbɨa guarepochi mondosar iñeroño chupe yuvɨreco —ehi—. Esãha, emombehu cheu, ¿uma evocoiyase osaɨsu catura mbɨa guarepochi mondosar? —ehi fariseo upe.

⁴³—Cheu ndoyavɨi guarepochi vɨrocua catu vahe ichui —ehi Simón. —Taa, supi eté aipo ere —ehi Simón upe.

⁴⁴Evocoiyase omahe cuña rese aipo ehi Simón upe: —¡Emahe co cuña rese! Aiquese acoi nde rẽta pɨpe, nde nderembouimi eté ɨ che pɨsei ãgua cheu; co cuña rumo güesaɨ pɨpe oyosei che pɨ. Ipare omombiru oha aprɨ pɨpe ae no.

⁴⁵Iyavei nde ndache rovarupɨtei eve; co cuña rumo, acoi nde rẽta pɨpe che reique ramomiseve che pɨrupɨte voi eté.

⁴⁶“Nde nderemondoi mbahe sɨ̃acua vahe che ãca rese; co cuña rumo opa tuprɨ voi oipichi mbahe sɨ̃acua vahe che pɨ rese.

⁴⁷Sese co cuña opa oipɨsɨ ñerosa oangaipa guasu rese. Esepia, che raɨsú iteanga. Acoi ava upe nañerosa tuprɨi vahe rumo, ahe ndoporoaɨsu tuprɨi avei” ehi.