LUKA 16:7-31

⁷Ndipo adabvundza pomwe mwinango kuti: 'Kodi imwembo, munaye mangawa ya tani?' Ndipo iye adatawira kuti: 'Ndinaye mangawa masakha dzana ya cimanga.' Pamwepo adamuwuzambo pomwe kuti: 'Ndoko ukanembe makumi masere.'

⁸Ndipo mbuya ule adamutenda msunga cuma wakusaya kulungamayo na thangwe ra kucenjera. Nakuti dzindza la wanthu wa mudziko lidacenjera kwene-kwene, kuposa wanthu wa ceza ca Mulungu.”

⁹Tsono ine ndi'nkuwuzani kuti: “Imwepo yanyani uxamwali na cuma ca pantsi pano kuti cikadzamala, mudzatambiridwe bwino m'manyumba zakusaya kumala.

¹⁰Nakuti munthu ule omwe ngwakukhulupirika na bzinthu bzing'ono-ng'ono, ndipo iye ngwakukhulupirikambo na bzizinji. Na ule omwe ngwakusaya kulungama na bzinthu bzing'onong'ono, ndipo iye ngwakusaya kukhulupirikamambo na bzizinji.

¹¹Penu mun'kukhulupirika lini na cuma ca dziko la pantsi, kodi mbani an'dzakukhulupiranimbo na cuma ca cakudzulu?

¹²Penu mun'kukhulupirika lini na bzinthu bza andzanu, kodi mbani an'dzakupasanimbo bzinthu bzanu letu?

¹³Nakuti palibe munthu omwe angaphatira basa ambuya awiri. Thangwe an'dzawengana na m'bodzi acibverana na mwinango. Ayai an'dzayenda kuna m'bodzi acilova kuna mwinangoyo. Na tenepo lekani kuphatira basa Mulungu na kobiri.

¹⁴Pomwe afalizeu adabva bzimwebzo adamuseka Jezu thangwe iwo akhafuna kobiri kwene-kwene.

¹⁵Ndipo iye adawauza kuti: “Imwepo mumbabziyesa kuti ndimwe wanthu wakulungama. Tsono Mulungu ndiye an'dziwa mitima yanui. Cinthu ciri centse comwe wanthu ambayesa kuti cina basa kwene-kwene, kuna Mulungu ciribe na basalo.

¹⁶Ndipo mtemo wa Mozeji na mapfundzisidwe ya Apolofeta bzidakhala mpaka panthawe ya Juwau M'batizi. Kucokera pamwepo Umambo bwa Mulungu buli kupalizidwa. Na tenepo wanthu wentse ali kucita mphambvu kuti apite.

¹⁷Ndipo bzingadapusa kuti munthu amalise pantsi na kudzulu, kuposa kucosa fala libodzi lokha mu Mtemo.

¹⁸Munthu omwe ani lamba mkazace acikalowola mwinango, iye ali kucita upombo. Ndipo na ule omwe anilowolambo mkazi wakulambidwayo iye ali kucita upombo.

¹⁹Pakhana munthu m'bodzi wakudala kwene-kwene. Ndipo iye akhabvala bzakuwumira, acidya bzinthu bzakufewa.

²⁰Na tenepo pacipata pace padadzagonambo ntsauke ibodzi dzina layene Lazalo iyo ikhaduwala mphezi.

²¹Na tenepo iye akhabwera kuti adzadye tumbvululu tomwe tukhasala-sala patsantsali la kudyera la nyakudalayo. Ndipo mbwayambo zikhabwera kudzamunyanguta mafinya.

²²Tsono ntsauke ire idadzafa ndipo anjo wa Mulungu adaitenga aciyenda nayo kuna Abramu. Ndipo nyakudala ule adadzafambo pomwe acikapendesedwa.

²³Pomwe iye akhali kumoto, acimbabonera ndipo adanyang'anisa aciwona kutali Abramu na Lazalo omwe akhnaye pafupi.

²⁴Ndipo iye adakuwa aciti: “Baba Abramu ndibverenimbo ntsisi! Tumani Lazalo kuti akatibzike cala cace m'madzi kuti adzandijejeresembo lirime thangwe kuno ndiri kubonera na moto.

²⁵Ndipo Abramu adatawira kuti: “Mwanangu, kumbuka kuti iwepo ukhakhala bwino pomwe ukhana moyo. Tsono Lazalo akhabonera. Tsapano lino iye ali kukhala bwino kuno, ndipo iwepo uli kubonerambo tsapano.

²⁶Ndipo pakati pathu imwepo na ife pana cidindi cakuzika kwene-kwene. Na tenepo wale omwe an'funa kubwera kumweko an'kwanisa lini. Ndipombo wale omwe an'funa kubwera kuno an'kwanisambo lini.”

²⁷Ndipo iye adatawirambo kuti: “Ndiri kukumbirani Baba kuti mum'tume Lazaloyo ayende kunyumba kwa babangu.

²⁸Thangwe ndina abale wangu axanu. Ndipo iye akawacenjeze kuti iwo asaye kubwerambo kumbuto ya kubonera ino.”

²⁹Na tenepo Abramu adamutawira kuti: “Iwo ana Mozeji na Apolofeta ndipo iwo mbaabvere kumweko.”

³⁰Ndipo iyembo adati: “Ne- ne-ne, Baba Abramu! Angadayenda munthu wakufa kukawawuza pinango iwo angadakhumbula.”

³¹Tsono Abramu adamuwuza kuti: “Iwo akasaya kubvera Mozeji na Apolofeta napo anyakufa akamuka andzawabvera lini pomwe basi.”