Luka 16:7-31

⁷“Motong la tool san mulu iman pang ye ngan man itoru nen, ‘Ong in, so pi kop a iyei bun pong nga?’ “Ngan tool tani iyei ne, ‘Akap dingding patunu ke kaningi yo tipadid ilo ye karei nga, ngan kinkatingi ki 100.’ “Motong la tool yo ke be matan kala so i, in iwete panga nen, ‘Kouo rau kiong yo tiwodo bun kiong ye i, inbe kudik wodenge ke kinkatingi ki ngan mulu le isi ye 80 leu.’

⁸“Le nga tool mai ke tool tani yo matan kala so ki dook tiap i, in ilongo betanga ye urata tina yo tool ki tani in iyei nga, le nga ipayiti ye, yesoo tool in iyei urata dook tiap, bong le iyei dada dook mata yo be ya taunu iloni ye i. Le moolmool, di tooltool yo ke tana i nga, ngan lodi galanga dook mata ye dada matana matana yo be tiyei urata ke tana i ye nga, le tillos di tooltool ke Maro yo tiyepe ye nunngana nga.

⁹Awete pang nen, balingi le so kiang ke tana i nga, ngan kalon di tooltool kapala ye, a nen ngan kaye di kagaua dook. Ngan la be nen ngan pang dama ni be balingi le so kiang tina ngan imot nga, ngan Maro ole lon ponana be ikau ang a lo kayepe ye yepongo dook mata yo taukan motingi i.

¹⁰“Ngan kumata sei tool be matan kala so yo mai tiap, in dook nga, ngan ole ke be matan kala so yo maimai, ngan dook mata nen lapau. Bong kumata sei tool be matan kala so yo mai tiap, in dook tiap nga, ngan ole matan kala so yo maimai, ngan dook tiap nen lapau.

¹¹Ngan nen le kumata be kanakana ngan matamim kala balingi le so ke tana i dook tiap nga, ngan ole sei be itara lono yang ngan ikap so moolmool pang be matamim kala i?

¹²Inbe kumata be di tooltool titarang be matamim kala so kidi, le be matamim kala dook tiap le ilene nga, ngan ole sei be ikap so tina yo nen ngan pang mulu i?

¹³“Tool kapraingi sa ke be iyei urata pang di tooltool kuto maimai ru tiap. Kumata be iyei nen nga, ngan ole lono dook mata pang atu le ilongo betanga ki a itoo, inbe lono dook tiap pang san a iwala murini panga. Le ang nga ke be kayei urata pang Maro, inbe kayei urata ke kaungu pat lapau tiap.”

¹⁴Di Paresi ngan di tooltool tina yo matadi pat mata nga. Le nga tilongo betanga tina yo Yesu iwete nen nga, ngan le tikan paseme Yesu ye.

¹⁵Motong la Yesu iwete pang di nen, “Ai, ang nga o lomim tar be dada yo kayei nga, ngan o dook mata ye di tooltool matadi, too? Bong Maro lon galanga ye so yo iken lomim, ngan oo. Ngan so yo di tooltool tikamata ngan dook mata pang di nga, ngan Maro ikamata ngan ben so dook tiap le dook tiap ki taunu.

¹⁶“Muku ngan di tooltool tiwetewete pang ye ger ke Maro inbe ye betanga kidi Maro koonoo yo tiwodo ilo ye rau nga. Ngan tiyei nen le le ise ye lal yo Yowan ke rriungu di tooltool in pombe ye i. Bong ye lal tani yo ke Yowan in nga, ngan tiwetewete bingi dook mata pang di tooltool ye dada yo Maro be matan kala di tooltool ki ye i. Ngan nen le tooltool alunu tilonga, le di lapau tikapye be tilo, a be nen ngan lo tigaua ye di tooltool yo Maro be matan kala di nga.

¹⁷Ngan lang le tana nga, ngan o ke be iken le mos tiap, inbe imot. Bong betanga tina yo iken ye ger ke Maro nga, ngan ole ikenen nen a tala, le o ke be wodenge ki kasin pa ilene tiap yege.”

¹⁸Motong la Yesu iwete mulu nen, “Sei tool be isukraia rimana, inbe la iyooloo garup san nga, ngan ya in iyei dada dook tiap ke bauk. Inbe kumata sei tamoto be iyooloo garup atu yo muku ngan nintooroo isukraii in nga, ngan ya in iyei dada dook tiap ke bauk lapau.”

¹⁹Motong la Yesu iwete mulu nen, “Muku ngan tool ballingana atu in iyepe. Le nga ye ke kanakana nga, ngan ipital wam yo puspusngana dook mata nga, inbe isousou ye sousoungu ki yo kooroonoo dook mata i, inbe ikan kaningi yo dook mata ngan leu.

²⁰Ngan potai pang ye dada ke rumu ke tool ballingana tani, in tool atu yo ballingana tiap in tikauu a titaru a ikenen. Ya in ene la Lasarus i, bong botobotana le botobotana leu.

²¹Ngan ya in pitolo welewele le itar matana ye kaningi moromorana be imaruru du kookoowoo ke kaningi so ke tool ballingana tani in parmana nga, ngan ole ikap a ikan. Inbe di gaunu tipa man tiyoongoo botoboto ki tina a tidamdam.

²²“Tiyepe, le nga tool ballingana tiap tani, in imata. Motong la bangabangana ke Maro si ikauu le lo titaru a iye Apram tiyepe. Inbe tool ballingana tani, in imata lapau a tikelmaii.

²³Ngan le tool ballingana tani in idu iyepe ye malala ke masngana, le tina isolo masngana mai san. Le nga be matana pang ete, ngan ikamata Apram iyepe ni mooloo san, inbe ikamata Lasarus tani in iyepe potai pang ye Apram nga.

²⁴Motong la tool ballingana tani in koonoo nen, ‘Atoo, tamak Apram, au i ayepe ye ei dook tiap lono le asolo masngana mai san, le lom pau inbe kuwete pang Lasarus in a isili baene buruburene atu matana idu ye ran, lo ngan isi si itaru lo ye mek i, a be nen ngan mek isilsil kasin ngan.’

²⁵“Bong ngan Apram iraua betanga ki nen, ‘Natuk, nga ole lom kaua urata dook ngan. Ye kene yo kuyepe matam rerene go nga, ngan balingi le so kiong alunu san le yepongo kiong dook mata kaiye. Inbe Lasarus in barau taukan so le yepongo ki sa dook tiap. Bong nookoot nga ole iyepe ye lo ponana la ni nga, inbe ong in ole sila kuyepe nangan a kusolo masngana mai nen.

²⁶Inbe so san mulu in nen, kataunu kiam amyang i, in Maro itara moolooi somai atu be iyei ben ker paidi. Le di tooltool yo tiyepe ni nga, ngan kumata le lodi be tisiut a timala pang yang nga, ngan o ke be timala tiap. Inbe ang tooltool yo kayepe nin nga, ngan sa ke be isiut ke nin a iman pang yam tiap lapau.’

²⁷“Motong la tool ballingana tani in iyei ne, ‘Atoo, tamak, be nen ngan atorong be kuwanga taraia Lasarus a imulu a idu pang ye rumu yo ke tamak i,

²⁸yesoo, au i di taik limi nango la tiyepe ni ngo. Le lok be Lasarus ya taunu idu a du iwete tootoo pang di be tiyei dada yo dook mata nga, a be nen ngan be timmata nga, ngan di lapau titoo au a se tiyepe ye malala ke masngana i be.’

²⁹“Bong ngan Apram iwete panga nen, ‘Betanga ke Mose inbe kidi Maro koonoo yo tikap pang di nga, ngan la iken ye di ngo, le be nen ngan tilongo betanga tina, inbe titoo.’

³⁰“Motong la tool ballingana tani in iyei ne, ‘Atoo, tamak Apram, o tiap! Bong kumata be tool yo timmata koot nga, ngan atu imadit mulu ye ni ke matenge, inbe ya taunu idu le du iwete betanga nga pang di nga, ngan la be ole tiportak lodi ye dada dook tiap kidi ke noonoo yo tiyei nga.’

³¹“Le nga Apram iyei ne, ‘Kumata be tilongo betanga ke Mose inbe kidi Maro koonoo tiap nga, ngan o ke be tilongo betanga ke tool yo imadit mulu ye ni ke matenge, lo ngan be ikap betanga a la iwete pang di i, in tiap lapau.’ ”