Luk 16:7-31

⁷K’eyif sɔ wəlɔma: ‹A məna-a, cəke cɔ məntɔmpər-ɛ?› Kɔ wəkakɔ oloku: ‹Malɔ busul tasar tin (100).› —‹Awa, məndɛ məlɛk areka, məcic 80.›

⁸Kɔ wəka daka nwɛ oŋkor-koru wəcəmbərɛ-cəmbərɛ kɔn daka wətɔlomp nwɛ ntɛ ɔŋkɔt bel-bel mɔ. Awa, afum a doru ŋaŋcərɛ kəyɔ mes taŋan pətas akɔ ŋayɔnɛ aka pəwaŋkəra mɔ.»

⁹Kɔ Yesu ɔnɔcər: «Ic-lok’un: Nətɛnɛ daka dɔtɔsɔk anapa, itɔ ɔŋsɔŋɛ kɔ dendelip-ɛ, pabaŋ’un nde nəkɔyi doru o doru mɔ.

¹⁰Məna nwɛ aŋlaŋ teta tes tɛfɛt mɔ, antam sɔ kəlaŋ’əm teta tes tɔpɔŋ. Məna nwɛ məntɔlomp teta tes tɛfɛt mɔ, məfɔlomp teta tes tɔpɔŋ.

¹¹Kɔ məntɔlomp kəcəmbər-cəmbər ka daka dɔtɔsɔk ndɛ deyi doru dandɛ mɔ, anɔ endesɔŋ’əm kəcəmbər-cəmbər ka daka dosoku-ɛ?

¹²Kɔ məntɔlomp teta daka da fum-ɛ, anɔ endesɔŋ’əm ndɛ dɔyɔnɛ dam mɔ-ɛ?

¹³Ali wəcar wəkin ɔfɔtam kəbəcɛ abɛ mɛrəŋ. Kɔ pəyi ti-ɛ, enter wəkin pəbɔtər wəka mɛrəŋ; kɔ pəyɔnɛ fɛ ti-ɛ, pəcəŋkəlɛ wəkin ta ɛŋcəŋkəlɛ wəka mɛrəŋ-ɛ. Nəfɔtam kəbəcɛ Kanu kɔ pəsam.»

¹⁴AFarisi, aŋɛ ŋanabɔtər pəsam mɔ, kəne ka moloku mamɛ, kɔ ŋayɛfɛ kəfani Yesu.

¹⁵Kɔ Yesu oloku ŋa: «Nəna, nəŋcəmbərnɛ afum alompu nnɔ awɛŋc’un aŋa ŋayi mɔ, mba Kanu kəŋcər’on bəkəc; bawo ntɛ afum ŋampɛnɛ dareŋc mɔ, itɔ Kanu nkɔn eŋce.

¹⁶Tɛm ta sariyɛ sa Musa kɔ yecicəs yecempi ya adəŋk a Kanu tɛnawon haŋ tɛm ta Saŋ. Kəyɛfɛ oŋ tɛm tatɔkɔ, k’aŋcop kədəŋk moloku mɔtɔt ma dɛbɛ da Kanu, nwɛ o nwɛ kəsɛp k’ɛndɛ kəbɛrɛ ka di.

¹⁷Mba pəfəfərɛnɛ kɔm kɔ antɔf kəsɔlɛ, pətas tofo tɛfɛt ta pecic pin pa sariyɛ kətɛmpɛnɛ.

¹⁸Məna nwɛ məŋce wəran kam mənɛŋcɛ sɔ wəlɔma mɔ, məyi kiciya kəpɔŋ disrɛ. Məna nwɛ məŋnɛŋcɛ wəran nwɛ wos eŋce mɔ, dalakɔ dɔ nəyi disrɛ.»

¹⁹«Wəka daka wəlɔma ɛnayi, pəc-bɛrnɛ yamos yɔtɔt, yeyeŋki kəway; dɔsɔk o dɔsɔk pəyi pətɔt disrɛ, pəc-di yeri yɔtɔt.

²⁰Kəlɔ kɔn kiriŋ, fum wətɔyɔ daka o daka wəlɔma, nwɛ aŋc-we Lasar mɔ, pəyɔ ruŋc, pəfəntərɛ kusuŋka kɔn.

²¹Lasar nwɛ pəfaŋ kəc-wɛtəs yeri nyɛ yɛntɛmpɛnɛ-tɛmpɛnɛ amɛsa dəntɔf ŋa wəka daka nwɛ mɔ, pədi. Mba kɔ cen yender yɛc-nɛntəs ruŋc yɔn.

²²Kɔ Lasar efi, kɔ mɛlɛkɛe mender mɛlɛk kɔ, kɔ meŋkekərɛ kɔ kəkɔ-ŋesəm nde Abraham kəsək. Kɔ wəka daka nwɛ ender pəfi, k’awup kɔ.

²³Nde kəfo nkɛ afi ŋaŋkɔ mɔ, kɔ wəka daka eyekti fɔr; k’ɛnəŋk pəbɔlɛ Abraham kɔ Lasar pəc-ŋesəm kɔ kəsək.

²⁴Kɔ wəka daka nwɛ oŋkulərnɛ: ‹Papa Abraham, məyɔn’em nɔnɔfɔr! Məsom Lasar pəgbət tɛlər tɔn dəromun pəder pəcaŋkəs’im temer; bawo kətɔrɔ k’indɛ nnɔ nɛŋc dandɛ.›

²⁵Kɔ Abraham oloku kɔ: ‹Wan kem, məcɛm-cɛmnɛ a mənasɔtɔ daka dam ntɛ mənayi doru mɔ, kɔ Lasar nkɔn ɔsɔtɔ pəcuy kiyi kɔn doru. Ndɛkəl oŋ, kəŋesəm k’eyi, məna məyi sɔ dəmnɛ pəcuy.

²⁶Kɔ tɛyɛfɛ dənda-ɛ, dobo dɔpɔŋ deyi su dacɔ kɔ nəna ntɛ tɔŋsɔŋɛ nwɛ ɛŋfaŋ kəcepər pəder nnɔ səyi mɔ, ta ɛntam-ɛ.›

²⁷Kɔ wəka daka nwɛ oloku: ‹Ilɛtsɛn’am, Papa, məsom Lasar nde kəlɔ ka papa kem.

²⁸Bawo, iyɔ di awɛŋc aŋa kəcamət, Lasar pəkɔ pəloku ŋa ntɛ teyi nnɔ mɔ, ntɛ tɔŋsɔŋɛ ta ŋa sɔ ŋadeder nnɔ pəcuy pampɛ peyi mɔ.›

²⁹Kɔ Abraham oloku: ‹Ala, awɛŋc’əm aŋa ŋayɔ Musa kɔ adəŋk a Kanu; ŋacəŋkəl ŋa.›

³⁰Kɔ wəka daka nwɛ oloku Abraham: ‹Ala, Papa, kɔ fum ɛyɛfɛ nnɔ afi ŋayi mɔ pəkɔ pəlok-lokər ŋa-ɛ, ŋaŋsəkpər mera ŋacəmɛ pəlompu darəŋ.›

³¹Kɔ Abraham oloku kɔ: ‹Kɔ ŋantɔcəŋkɛl Musa kɔ adəŋk a Kanu, ali fum ɛyɛfɛ nnɔ afi dacɔ, ŋafɔkɔ-cəŋkəl wəkayi.›»