Luuka 16:7-31

⁷Elottelanaka khumuuzela otule waphiiri yoori: ‘Khi weeyo oniiliwa kavi ti mbwanaaka?’ Ye khujipu yoori: ‘Kiniiliwa miphimo miiya za tiriku.’ Namalokozela wa anakhaazi otule khumuuza yoori: ‘Teeni yawo eti eriiye vawarakha apha, waatikhe thamaaniini.’

⁸Aphano mbwanaawe khunttottopela namalokozela wa anakhaazi otule woohaamineyi mwaasa wa akhili epile aariinaazo. Miiyo kiniwuuzani yoori, atthu a voolumwenku apha ana akhili za waatta mmenttezi mwaya, zayita atthu apale aneettettaaye nnuuru.

⁹Apho kiniwuuzani yoori: mwirumeyele maali zenu za voolumwenku apha zoohiiyi za shariya yoori mwiiwaapatthe ashirikha, amana ziwiishelani yo oopokhereleni pinkuuni.

¹⁰Otule anaamineyaaye khwa etthu ttiitthiiru onaamineya khwa etthu khuluyeene; otule ahinaamineyaaye khwa etthu ttiitthiiru hatha etthu khuluyeene khanaamineya.

¹¹Nkhama khamwaamineyeeni na maali za voolumwenku zoohiiyi za shariya, paani anttelaaye owaaminini na maali zookhweele?

¹²Nkhama khamwaamineyeeni na vitthu za watthu, paani anttelaaye owinkhani etthu enttelaaye wiiya yeenu?

¹³Khaavo karumeya anwahaaye owaarumeyela a mbwana awiri, mwaasa yoori ontta omwiiphiirisa mmote, antuvelise otu nkina; ama oniiya wa waamineya khwa otu mmote, antarawu otu nkina. Khinwaheya onrumeyela Nnyizinku na Nzurukhu.”

¹⁴Mafwarizeewu apale oopheta nzurukhu na kuvu, n'oosiila mattakhuzi apale khusala antheya Yinsa antarawaka.

¹⁵Aphano Ye khuwooza yoori: “Mweeyo pi apale oojoona wiiya anashariya vakatthi wa atthu, ila Nnyizinku onjuwa rooho zenu. Etile atthu anoonaaye wiiya ya fwayita, omaasho wa Nnyizinku ti yootaraweya.

¹⁶Kano na manapiyu khazilikheleleeni mpakha wakathi wa Yaahaya. Waaza wakathi otthuupo hapari za Ofwalume wa Nnyizinku zinvira zilaleyiwaka, wakhula ntthu onjilipisa yoori eettemo.

¹⁷Ti yookhweya pinku na vathi wiisha zayita olaziwavo alama ttiitthiiru ya nttakhuzi la kano.

¹⁸Wakhula nlume animwaashaaye muukhaawe khunrala muukha nkina ontta oraruwa; na aninralaaye muukha otule wa waashiwa na-ye ontta oraruwa.”

¹⁹Yinsa khurutela olupa theenya yoori: “Aarivo mwinyi mmote wa thaajiri aari owalaaye kuwo zooshapweya na zootafikhana, na wakhula siikhu eetta opuha, owawe yaari wiipikhiwawo etthu-yoojiwa ya nnofu.

²⁰Vanlako wa thaajiri otule aattattikheliwevo masikhini mmote wa waatta makhwatta aari wiitthiwaaye Laazaru.

²¹Aari ohithajiya oja tathela zaari okwaazo vameeza wa thaajiri otule, anapwa khusala ata olapa makhwatta awe.

²²Masikhini otule khufwa, khuthuuliwa pi malayikha khulawa khwiiya vamote na Eburahiima. Na-ye thaajiri otule khufwa khulawa khuzikhiwa.

²³Motthooni okhule eettaka woona shaani, ye khulansa maasho awe khweekesa otulu khumoona Laazaru ari mpavu wa Eburahiima.

²⁴Ye khusala akhuwa araka: ‘Paapa Eburahiima, kooneleni huruma! Mwinrume Laazaru anaanise yaala yawe na maati ate azizimise nlimi laka, maana kintta ohukhumweya vamoottho apha kiriivo.’

²⁵Eburahiima khunjipu yoori: ‘Mwanaka, omfwahamu yoori muuhaayi mwawo waapokheriye vitthu zooshapweya, ila Laazaru muuhaayi mwawe eetta ohoowa. Aphano ye asithirikha, weeyo ontta ohoowa.

²⁶Olikha eto, vakatthi vetthu yatthiiwavo khilintti khuluyeene ehinlokheyaaye ntthu olankha okhuno ataaka okho wala okho ataaka okhuno.’

²⁷Thaajiri khulupa yoori: ‘Paapa Eburahiima, safwatali kinuuvekelani yoori mwinrume Laazaru alawe wa ajamaazaku,

²⁸kinaaye attwiizaku athaanu alawe awooze yoori ahipatthe ota okhuno kiriiwo woohoowiwawo.’

²⁹Eburahiima khunjipu yoori: ‘Attwiizo anaaye kano za Munsa na kithaapu za manapiyu, asiileze etthiipo.’

³⁰Thaajiri khukhanyarela araka: ‘Wala paapa Eburahiima! Amana ntthu asisimuwa muufwa alawa awooza, antta othupwiya.’

³¹Eburahiima khujipu yoori: ‘Ahisiileziru kano za Munsa na za manapiyu, hatha nkhama ntthu eetta osisimuwa muufwa, yo khanteela okhupali.’”