Luku 16:7-31

⁷Anante rumo egeno ana ugagota kva eri'za ne'mo antahige'ne, Nama'a kagra nofira hu'nane? Higeno ana ne'mo'a 100ti'a witigure higeno, ugagota eri'za kva nemo'a huno avon tafe erinka 80ti'a witi'gure hunka avona krento hu'ne.

⁸Henka kva ne'mo'a, fenozante ugagota huno kvahu so'e osu'nea kva ne' muse hunte'ne. Na'ankure antahiza me'nea kva vahemo nehiaza hu'negure. Hagi ama knafi vahe'mo'za zamagra'zantera knare hu'za kva nehu'za tavi msare'ma nemniza vahera zamagateneraze.

⁹Amanage hu'na nagra neramasmue, fenoma erinka ama mopafi fatgo osu'zantema netrana zana, netrenka vahera zamazeri knampa huzmante'negeno, ana fenoma vagama resige'za, muse hu'za kavare'za mani vava nozamirega vugahaze.

¹⁰Mago'mo'ma osi'zantema so'e huno kegvahu fatgo hanimo'a, anahu kna huno ra'zana kegvahu fatgo hugahie. Hagi osi'zama kegvahu fatgo osanimo'a, ra'zana kegvahu fatgo osugahie.

¹¹Kagrama ama mopafi fenozama kegvahu fatgo osnankeno'a, iza tamage fenoma kvama kri'zana kamigahie?

¹²Kagrama vahe'zama kva huhaviza hanankeno'a, kagri'zana iza kamigahie.

¹³Mago eri'za ne'mo'a tare ozafarera eri'zana e'origahie, mago'mofona antahi haviza hunenteno, mago'mofona avesi ontegahie. Huge mago'mo'ene mani trago neteno, mago'mofona atregahie. Kagra Anumzante ene zgorera eri'zana eri'ontegahane.

¹⁴Farisi vahe'mo'za ana maka ke nentahi'za, (zgogu zamesi zamesi nehaza nagamo'za) agiza nere'za, hupri hunte'naze.

¹⁵Hu'neanagi Jisasi'a amanage huno zamasmi'ne, vahe'mofo zamavurera tamagra fatgo vahere hutma nehazanagi, Anumzamo'a tmagu'a ke'ne. Na'ankure vahemo'zama kanarezantfa me'ne nehaza'zamo'a, Anumzamofo avufina havizantfa me'ne.

¹⁶Mosese kasegene, kasnampa vahe'mofo kea huama huno Joni knare eme atre'ne, ananteti e'neana Anumzamofo kumamofo musenke huama nehigeno, hakare vahemo'za hanaveti'za ana kumapi vanagura kazigazi hu'za nevaze.

¹⁷Hu'neanagi amane fru huno monane, mopanena fanane hugahianagi, osi avone kasegemo'a vaga oregahie.

¹⁸Iza'o a'ma netreno ru a'ma erinuno'a, anamo'a monko'za hugahie. Hagi mago ne'mo'ma, ve'a atre'nesi'a a' erisanimo'a, monkoza hugahie huno hu'ne.

¹⁹Jisasi'a amanage hu'ne, Mago ne'mo afufenoma'a hakare me'negeno tusi'a zgo atreno, koranke kukena nehuno, asanema nehia ne'za knane knane erino neneno, so'e huno mani'ne.

²⁰Ana nehigeno noma'a kasante mago ne', fenoma'a omane'nea fugo namune ne' antazageno manitere nehiane. Ana ne'mofo agi'a Lasarusi'e.

²¹Lasarusi' maseno mani'neno, feno ne'mo ne'za nenesigeno ankra heramisiama'a erina nesue huno nehuno emani'negeno, kramo'za namuma'areti zamagnefu'nanu hu'ne hane hu'naze.

²²Anante amunte omane nera frige'za, ankero vahe'mo'za eri'za Abrahamu nemnia kumate vu'naze. Vutageno afufeno nera anante frige'za eri'za ome asentageno,

²³hagi tevefi manineno tusiza huno ata negrigeno kenagamuteno Abrahamuke Lasarusikea, afete magopi mani'nakeno zanage'ne.

²⁴Neznageno kezatino, Abrahamuga nfa'nimoka teve nenrege'na natagu nehuanki kasuntagi nantenka, Lasarusi huntegeno timpi azanko agona'a reteno nagefu'nare eme rentenkeno fru hunanteno hu'ne.

²⁵Abrahamu'a amanage huno asmi'ne, Mofavre'moka kagesa antahio. Mopafi mani'nenka knare zampi mani'nankeno Lasarusi'a haviza huno mani'ne. Hu'neanagi menina Lasarusi'a fruzampi emani'negenka kagra kata zampi mani'nane.

²⁶Hanki mago'zana amanahu kna'za me'ne. Tamagri'ene tagri'ene amu'nompina tusi'a tinka me'negeno, hagro hu'neankita tamagra nehanarega tkaheta vu'zanku ene tagritega ezankura tusi'a amuho hurantegahie.

²⁷Anante anage higeno, afufenone ne'mo amanage hu'ne. Nafa'nimoka Abrahamuga muse hugantoanki Lasarusina huntegeno nenfa nontega vino,

²⁸na'ankure nafa'nimofo nompina 5fu'a nafuhe'ina zamatre'na e'noanki, Lasarusina huntegeno hanave'nentake kore ke ome huzmasamisige'za tusi'a ata eri kumapina omeho hu'ne.

²⁹Hu'neanagi Abrahamu'a kenona huno, Moses nanekene kasnampa vahe'mokizmi nanekea me'neanki'za zamagra ana nanekea antahigahaze.

³⁰Ana hianangi afufenoma'ane ne'mo'a anage hu'ne, a'o nfa'nimoke huno higeno, Abrahamu'a anage hu'ne, frinefinti otino ome zamasamisiana zamagu'a rukrehera hugahazo!

³¹Ana hianangi Abrahamu amanage huno asami'ne, I'o. Moses nanekene, kasnampa vahe'mokizmi nanekema nontahisu'za, inankna hu'za fripinti otino ome zamasami'nia kerera zamagu'a rukrehe hugahaze huno hu'ne.