LUUKA 16:7-31

⁷Dhali yan’ko’d a’di ki o jaŋ kamu/ gwo mo ki: Dhali ekata si’da/ ndin ma mure/ /e m’ba/ mo? Dhali a’di ki o a’di gwo mo ki: Pos bunyan jin baru ki iss ’kwanimpa mmudhe’d mo. Dhali a’di ki o a’di gwo mo ki: Budhi awarkam pini jin ’kwara /e to mo dhali ’kwari ki iss ’kwanimpa idoŋon mo.

⁸Dhali tap̱a ki maŋa mandhu to jin diki ta aḵar/e mo goma gany piti mo, haali/ iya/ gi ’kwaniny’cesh gwansan mo tani uni yuḵayuḵ mo eya nyaḵum yil buniŋ gana/ mo mmobol iya/ gi moŋkush e mo be.

⁹Dhali aha/ ṯora um gwo mo ki, miiya mugu gom is bum mo ki to jin ta pa ki pa mo kun ’koki ta kuŋ ḵar/e mo, wakan ki a’di midi ush me’d mo tani uni mini ’taki bu’th um mo e mo gi moŋ’koki/e ki sule/ ya ye ’ba/ mo.

¹⁰A’di jin ta isiŋ gana/ mo gom ari toŋ gwa’dga/ mo tani a’di ta isiŋ gana/ mo si’da/ gom to jin ca’d mo. Dhali a’di jin thisi to kun gwa’dan mii mo tani ta a’di jin thisi to kun can mii si’da/ mo be.

¹¹Waḵki/ um ’koki ta isiŋ gana/ mo gom to jin ta pa ki pa mo kun ’koki ta kuŋ ḵar/e mo tani aja a’di jin midi c̱i um to jin ta pa ki paŋ gana/ mo mmodhu mo?

¹²Dhali waḵki/ um ’koki ta ku isiŋ gana/ mo gom to ma ciŋ kamu/ mo tani aja a’di jin midi c̱i um a’di jin midi ta jim bum gana/ mo?

¹³C̱iŋkinaŋ kamu/ yisa di’da jin midi mish to mii gom tap̱a isu/ mo. Hili a’di midi mii shi/ jan ṯal ’deŋ kamu/ i e mo dhali en jamu/ mo walla a’di midi bu’th jan ’de/ ka bor mo dhali waḵ jaŋ kamu/ mo. Um moli mii Arumgimis to mo dhali mii to gi ta pa ki pa mo.

¹⁴Dhali ’Kwani P̱arisiyiin uni gun ta iman/ena guurush mo ki uni ciḵkina ris to gwansani ’baar mo tani dhali uni ’theḵki a’di shushi mis mo be.

¹⁵Hili a’di o uni gwo mo ki: Um ta uni gun dhu is bum ka ḵar/e mo mbwambori ’kwani mo. Hili Arumgimis mishki’da dum bum mo. Haali/ a’di jin eḵki’d e bwaman ’kwani mo tani a’di ta tonthus ki thus mo e jis/e ma Arumgimis mo be.

¹⁶Gwoŋḵan jin c̱inu mo dhali imanc̱i gwo ma Arumgimis kadhamo/ mo uni ’kokin mo ntaga Yohaan mo. ’Peni mo yan mo tani gwom ’boro’d gi Bampa/ ma Arumgimis a’di c̱ikunu mo dhali aris ’kwani ’baar mo ka ’deṯe/ ’deṯe/ cic̱kini a’di ki mombujur mo be.

¹⁷A’di ’disha mii mo gom momis mo dhali mony’cesh mmop̱i mo mmobol ari businya/ gi gwoŋḵan jin c̱inu mo ki a’di minu kar ki momp̱uu mo be.

¹⁸Aris ’kwani ’baar mo ka ’deṯe/ ’deṯe/ kun dhal up̱ buni ’pen mo dhali mash kun tiya mo tani uni miiki miinyc̱al mo be, dhali a’di jin mashki’da ’bom jin dhalu ’pen mo ’pena kaṯẖim piti mo tani a’di miiki miinyc̱al mo be.

¹⁹Wathiŋ kamu/ diki’d jin ta pa ki pa mo, a’di jin hi’thki burrinye/ jin ta’da buhe/ ka buhe/ mo dhali burrinye/ jin na’bulana’bul mo dhali jin shwa to ki shwam paŋ gana/ isa yempa/ mo.

²⁰Dhali e ’twaŋkala goŋ piti mo tani wathi/ jin hatha’ko’d ’thikunu mo, a’di jin yuḵu gway ka Li/aasar mo a’di jin tasha jama/ isi ’baar mo.

²¹Dhali a’di dina gwo mbwa mo ki a’di minu thip̱ mo ki to kun biṯkin ’pena tharabeesa gi wathi/ jin ta pa ki pa mo. Hila ’ka p̱u’dkin mo dhali ’te’d jamam piti mo be.

²²Wathi/ ha’th’ko’d yan a’di wuki’d mo dhali a’di ḵalkina iman’doyu gwo mo eya bor ma Ibrahiim mo. Dhali wathi/ jin ta pa ki pa si’da/ tani a’di wuki’d mo dhali kankunu mo be.

²³Dhali eya Haawiya mo tani a’di ’koshkunu is ka nyor mo dhali a’di ’de’kki em piti ki mis mo dhali a’di ki p̱ara Ibrahiim e mo ’pena dhana/ mo dhala Li/aasar eya bor piti mo be.

²⁴Dhali a’di ki yuḵa yuḵ mo ki: Ababa Ibrahiima, miiyi mii ap̱o/ aha/ mo ma dhali hasha Li/aasar mo mmothul aliman me’d piti e yi’de/ mo dhali mmo’thup̱a le’d pem mo haali/ aha/ ’pe’dkina she/ mo eya le’dan o’d yansan mo be.

²⁵Hila Ibrahiim thoḵ a’di gwo mo ki: Ya/uma, kayi gwo e mo ma. Ki /e din ki e mo tani, /e buthi tom ’boron pini mo dhala Li/aasar a’di buthi to kun shiyin wakan mo. Dhali hili, shwane/ a’di malaskunu imahan mo dhali /e din e mo jin ’pe’du she/ mo be.

²⁶Dhali eya ris mii yan ka maḵamp̱o/ mo tani dhan jisa caaga/ di’di bwaman am mo dhali um mo jin thosonkunu mo, ki uni gwansan kun mini ’taki ’ciṯẖ ’peni mahan e /e mo mini mol mii mo, dhali jan ’deŋ kamu/ midi mol ’ciṯẖ ’peni mun ntagi am mo be.

²⁷Dhali a’di ki o gwo mo ki: Waḵki/ wakan mo tani aha/ doṯkina /e mo ababa, mmohash a’di mo e gu’b ma babam pem mo be

²⁸haali/ aha/ tana gi ikam pemi mudhe’d mo, wakan ki a’di midi rum uni ki gwo mo, hili isi ciki/ ki uni si’da/ mini ’koki iiyu/ mo e mo/isa nyor yansan mo be.

²⁹Hili a/ibrahiim thoḵ a’di gwo mo ki: Uni tan ga Musa mo dhali imanc̱i gwo ma Arumgimis kadhamo/ mo. Dhalki uni ciḵ uni gwo mo ma.

³⁰Dhali a’di ki thoḵ gwo mo ki: Yisa, ababa Ibrahiim. Hili waḵki/ jan ’deŋ kamu/ midi ya i uni ’peni mowu mo tani uni mini rica du is mo be.

³¹A’di ki o a’di gwo mo ki: Waḵki/ uni ’koki ha gwo ma Musa e mo dhali gwo gi imanc̱i gwo ma Arumgimis kadhamo/ e mo tani wakan si’da/ uni mini ’koki c̱i bwam buni ka gam ’kup̱ mo waḵki/ jan ’deŋ kamu/ midi ’taki cu mis ’peni mowu mo be.