Luk 10:25-34

²⁵Ano, ndramak ari tanan ta leheya kandriyen tiri Juwis ales ere loke none Jises. Eme iy anya, “Ndramak ta leheya, jo kamekes sasah handru, ya kohak kudu le buku doh?”

²⁶Eme Jises tiye i tan, “Torowenei udu bolo tarou malen mene, ou ndratou, tiye i buku sah handru?”

²⁷Ano ndramak nane dah anya, “Tiye badeh, i buku doh: ‘Ou aseken Laban tam Kindrei na ndrinem mari, ma na koham handru mari, ma na boto-on tam mari, ma hawe na budon tam mari.’ Ma ano ja, ‘Ou aseken iri lau ari ari badu hawem, i le buku, ou aseken ou le.’”

²⁸Eme Jises anya, “Ou badeh, tiye amwenen labai, ya i buku none ou amekes iri lakou mari doh, idah kameh, koham udu le buku doh.”

²⁹Arile, ndramak ta leheya kandriyen tiri Juwis doh badeh, anya kaleheya iy le, anya iy ndra ari ai. Eme iy ndremenya Jises anya, “Are oro le handru badu hawek? Ya eme jo kaseken oro.”

³⁰Ano Jises tiye i hamon i tan, i buku doh: “Ndramak ari badeh, anya kedek kudu Jerusalem kili Jeriko. Eme iy edek ili badeh, iri lalou ado san tawi iy, ma bene-ei lakou tan marakon. Eme iri adai iy andra-i labai imek i kei ra-ei, ma iri ruwani iy udu api. Ya iri atobwak au. Ya iy ndramak nane doh amadin udu ka-u san mirihik anya kimek.

³¹Ano, pris ari badeh, edek san nane eme. Iy edek eme badeh, anyolom ndramak nane, arile iy abelek i san bilisiu iu ai.

³²Ano ja, ndramak ari badu boho kamen ta Libai edek san doh, eme ja. Eme iy anyolom ndramak dah, ale, arile iy abelek i san bilisiu iu ai.

³³Arile, udu ja, ndramak ari badu kon Samariya edek eme amwenen ta ndrahune ndramak dah udu aliy, iy atou ndramak doh. Eme iy tikisi ndramak doh, labai.

³⁴Eme iy ili hawen badeh, solowei ndrelekei hawe waen i badan, ano sawei na kari kolau. Eme iy bwese-ei ndramak dah, i bwele-e donki tan, ma tiyani iy ili asiu ra-em ta ndrahu iri lau. Eme iy atondrok iy.