San Lucas 10:25-34

²⁵Iyavei no Tũpa porocuaita rese oporombohe vahe oso Jesús upe secoãha ãgua, mbahe rese oporandu: —Porombohesar, ¿mara ahera vo vichico teco apɨrẽhɨ vahe rereco ãgua? —ehi chupe.

²⁶Ahe omboyevɨ: —¿Mara ehi vo Moisés porocuaita icuachiaprɨ pɨpe? ¿Mara ehi vo ereyeroquɨse ipɨpe? —ehi oporombohe vahe upe.

²⁷Evocoiyase oporombohe vahe omboyevɨ: —“Eresaɨsura nde Yar Tũpa opacatu nde pɨhá pɨpe, opacatu nde recocuer pɨpe, opacatu nde pĩratasa pɨpe, opacatu nde yapɨsacasa pɨpe avei; iyavei eresaɨsura ava nde cotɨndar nde yeaɨsu nungar” ehi Moisés porocuaita —ehi chupe.

²⁸—Supi eté —ehi—. Eremboyevɨ tuprɨ ndeyeupe porandusa cheu. Eremboavɨyese evocoi, ahese ererecora tecovesa apɨrẽhɨ vahe —ehi co mbɨa upe.

²⁹Co mbɨa rumo oyeepɨ pota. Sese aipo ehi chupe: —¿Ava vo aipo che cotɨndar secoi? —ehi.

³⁰Evocoiyase omboyevɨ chupe: —Oime mbɨa Jerusalén sui oso vahe Jericó ve. Ahe perɨ rupi yuvɨnose ava ndipɨhai vahe yuvɨreco chupe. Ahe vɨrocuapa imbahe yuvɨreco ichui, iturucuar opacatu reseve; iyavei yuvɨrocua-rocua yuvɨreco sese. Ipare oyuca seni seya perɨ rupi yuvɨraso.

³¹Ahese judío pahi ou ahe perɨ rupi. Evocoi mbɨa repiase rumo, co cotɨ rupi oñacuasaño oso.

³²Ẽgüe ehi tuprɨ avei ambuae mbɨa pahi pɨ̃tɨvɨisar levita, osepiase, oñacuasa tuprɨño avei oso no.

³³Ipare rumo mbɨa sepia potapɨrẽhɨ Samaria ɨguar oso ahe perɨ rupi avei. Ahe osepiase, oiparaɨsuereco.

³⁴Evocoiyase ahe mbɨa oyemboya oso sese oiposano yapichasa mbahe quɨra pɨpe, uva rɨcuer sai vahe pɨpe, oicuhacua avei turucuar pɨpe chupe. Ipare osupi güeimba harɨve oaprɨve, vɨraso ava quesave. Aheve ihañeco sese.