Iluk 10:25-34

²⁵Deiw mak ding mak, Sunbin-Got em kukuyemin sawa weng em kak kunum mak teleko, Yesus elo dakalalomele: “Kukuyemin kunum kutaka! Ne nono kesomi, diwkuw diwkuw sunsun finik so bin kuloki a?”, dangeko, dakalase kale.

²⁶Dakalalei, Yesus e yan weng bokolewomele: “Ku Sunbin-Got em kukuyemeko, bose fut be atemeko, teing bokokabelew sako? Be nimtew angse ya?”, dangse kale.

²⁷Dangei, kunum be bokolewomele: “Sunbin-Got em kukuyemkabe sawa weng e kanekote: Ku kukalem Sunbin-Got Kamok Fian elo ibolow mutuk fian dukalewbolewka! Kukalem finik so, kukalem ibolow so, kukalem ibolow fukunin so, kukalem kitil so, alik alik be bongguko, Sunbin-Got em dim kuw fewtoko, bolewka! Kaneko beli, kukalem ibolow mutuk fian e kukalem dim bikembe beemdiw kom mewso biliw kawtiw mali ikati ibolow mutuk fian kukuyem kemolewka! angeko, be te.”, dangse kale.

²⁸Dangei, Yesus e elo bokolewomele: “Feinka! Nelo fein weng bokonemew te! Kukalem weng kale gelewbew tewe, diwkuw diwkuw sunsun finik so bin kulokolew te!”, dangse kale.

²⁹Dangei, kunum be ibolow fukunomele: “Yesus e nelo kal kunum ba atew kenembe kai!”, angse kasike, e elo iti bokolewomele: “Be ken kate, mali mewso biliw kawtiw bi kante a?”, dangse kale.

³⁰Dangei, Yesus e fakam weng mak bokolewomele: “Mak kunum mak e Selusalem abiw mutuk fian koleweko, Seliko abiw mutuk fian elo unse te. Unbe ding dim bakate, yakut kunum mali mak kunum beelo net aulewko, an feiw koleweko, akalem mesesem mesesem eisneng alik alik be dakalas kululeweko, elo kawin dim kabalak butut keleweko, koleweko, unsiliw te.

³¹Uniwi, seyo!, Sunbin-Got em am yol em kunum ayem afak kunum mak deiwkim gui teleko, kuanomin kis kebe kunum beelo atemeko, — kate bakilew unse te.

³²Unei, Sunbin-Got em am yol kel aluwkabe Elibai kunum mongom em muluwel dow mak akati teleko, kuanomin kis kunum beelo atemeko, — akati bakilew unse te.

³³Unei, ibik ete, iti mak kunum mak talse te. E Isalael kawtiw num maka kebiliw Samalia aneng fian em kunum ete te. E teleko, kuanomin kis kebe kunum beelo atemeko, kinkin ibolow fian kelewko,

³⁴em mit mewso unse te. Uneko, kunum beem abung dim be wain ok so wel kamge so aboleweko, abung be gelewse te. Geleweko, kunum beelo akalem donki dim kel tein koleweko, deiwkim am mak elo debele unse te. Debele uneko, deiwkim am tem mak elo teleko, wanin so ok so duleweko, kilele dokolewse te.