Luk 10:25-34

²⁵Te Juda dabego bomo yai po ola mabo bidi me asama, Jisas usu sai hagede, agai po hanalubo po wagasali. Agai te po wali, “Po ola mabo bidi, eno noma te bugagia gamonabo pesageba painu, magi sę yagawe?”

²⁶Jisasgo po wei ponoyu, te po wali, “Te Godigo po wabo bukude magi po wali elalubawe? Te wali po dabe nago nedama suali, mena page konebo dawe?”

²⁷Te bidigo te po wali, “Te Godigo po wabo bukude te po wabo dao, ‘Nago Genuai Bidi God naga homu sese badi, naga noma sese badi, naga bomo sese badi, naga kolesaga sese badi elama, tigidaligo naga Godibolo homu kęąluao,’ wabo dao. ‘Me ma, naga digi naga homu godolo mu eyu kęąlubogia, te nago te bidi naga abagi hasi me godolo homu eyu me tama nage tiao,’ te po wabo dao,” wali.

²⁸Te Jisasgo po wei ponoyu, agabolo te po wali, “Te usu dao. Nago po dolo obao. Nago tama tiyu da, te naga bidabo noma bidigo ula te gamonabo bulu selama, bidada peyu, bidada paibao,” te po wali.

²⁹Tiali goli, te Juda dabego bomo yai po ola mabo bidi aga hale idali weyu, Jisas agade doloba pai bidi dao homu emai hagede, agai Jisasbolo ma hanaluyu te po wali, “Eno abagi hasi da, te de dawe?” wali.

³⁰Jisasgo te po wali, “Bidi me Jerusalemdu te Jeriko be naniba dulubadi yaide, nai wi sabo bidi dabe te geme sunumide dula selama, te bidi asobadi pageabi elama tulama, te bidi aga ugwa dabe pepedama, elama, tama augwaligo aga doado bage tigidali wi sali. Tama te bidi isabo pąde magawai te aga mesena isai tiwai munalubadi, taga palio.

³¹Tebadi yaide, te pris bidi me deli te tųdu naga pali. Tama agai te elali bidi te tama telalubo sulama, te tų bogo badu bogelama ela soyu pali. Te bidi tau sabeo.

³²Tama nosali te tųdu naga Livai sibi bidi me deli teba sabolali. Te bidi munalubo sulama, te tų bogo badu me ela solama pali.

³³Tiali goli, Samaria bidi me te tųdu naga asiyu, te bidi suali. Te sulama, tama te boi yai bidi dao, te homu elama, tagalobe, moni homu dene yali.

³⁴Te bidi pageba pelama, wel dabe, bomai wę dabe keni idaliyu te elali pesageba gelama, te ugwa bogogo kęnama, te bidi ąobo kibu daiba muani. Tama bidi osogo pibo beba sela pelama, tede agai tonaluali.