Luke 10:25-34

²⁵Anpalan-a, nil paman wamp nungant Jesus.ant, nil pam inana, wik thayan God.antaman thaaꞌ-aath-aath thanang pam wanch anangana. Nil keꞌ Jesus.an paathiy nunang wik want-wanttakan thawow, nil puth thawant Jesus.antan, “Ayyang, Moom-ang, ngay ngeen yumpānga yipam ngay ngulakaman wun-wunāng God.antangan a?”

²⁶Nil puth Jesus.an thawanta, “Nint lat ngench thayanan kan meeꞌmiy ey? want-wanttakan waaꞌan ey? nint wanttak ngaantam-ngeeyangan e?”

²⁷Nil paman thaw Jesus.antan, “Yaa, lat ngench thayanangan wik inangan waaꞌana, ‘Niiy ngangk minangam anman iiy-iiyān God.antana, koochanam iiy-iiyān, man-kuchaman yaꞌa, aꞌ wik nungantam anangan ngangkangam piꞌ-piꞌān, wik maꞌmangkam anangan ngeey-ngeeyāna.’ Aꞌ putha latangan inan thamp waaꞌana, ‘Niiy paththam kaangk wunān pam wanch puk wiy al-alantana. Keꞌ niiyan min-minaman piꞌ-piꞌwuniy niiyantakaman-a, yaa, niiyiya yimanangan pam wanch wiy al-alantan ngangk minangam iiy-iiyān thant.’”

²⁸Aꞌ Jesus.an thawant, “Eeꞌa, kan-kanama, nint min yimanangan iiy-iiyinweya aak inganiy-a, an nintaniya kan-kanam God.antang wun-wunān ngulakamana.”

²⁹Nil pam alangan ngaantam-ngeey nungantakaman nil keꞌ pam min yimanang, nil puth thaw Jesus.antan, “Ngan pam wanch weeꞌ-weeꞌanta min iiy-iiyān thant e?”

³⁰Aꞌ nil Jesus.angan wik kath inan waaꞌ, “Pam thonama aak Jerusalem anpalan woyan wak-wak um kungk aak Jerico.aka. Aꞌ than pam wayanang al-alangan woyan ompamang uwin nunang, aꞌ yuk way min nungantam anangana maꞌam piiy-piiyin nunang aꞌ piik-piikin nunang, warꞌam mulathin nunang, aꞌ angman puth too wantin nunang, chaapar ukanang wun-wun.

³¹Amanaman-a, nil pam thonangan woyan anman waka, puth nilaniya pam priest. Nil pam priest alangan thath nunang chaapar thaman wun-wun, puth thintham keꞌam iiy nungant, yaꞌa, woyan thonangan ngul wak.

³²Anpalan-a, pam thonangan ngul woyan anman waka, puth nilaniya aawuch ngench thayanangan work iiy-iiyan. Nil iiy nungant, pam alantan, thintham thathan, puth yaꞌ, too want nunang, aꞌ puyamam ngul iiy, woyan thonangan ngul waka.

³³“Yaam keꞌanam-a, pam thonangan ngul woyan anman wak. Nil pam inana thaaꞌnganth thonangana, aak anpal wamp Samaria.ama. Aꞌ angman wamp nungant nil pamana wun-wuna, chaapar thamangana, aꞌ ngangk mamana.

³⁴Aꞌ nilana iiyant ngula, wine aꞌ oilan wench thaaꞌ nungantamangan wunp aꞌ bandage ongkang kathan ngula. Anpalana, paman maayan, aꞌ donkey nungantamang wunpan, aꞌ kalanwey aawuchak keꞌ motel yimanang aakanakan, puth nilam paanthathan angmana, min-minam piꞌ-piꞌana.