Lucas 1:49-72

⁴⁹Munayyog Tayta Diosninsi alimi ricamash. Paynöga manami pipis cansu.

⁵⁰Pay munashganno cawagcunataga imaypis cuyapanmi.

⁵¹Pipis mana rurashgancunatami payga ruran. Yachag-tucogcunataga manacagmanmi churan.

⁵²Mandag cashganpita nación mandagcunatapis gargun. Mana runa-tucogcunatami isanga ali cawayänanpä yanapan.

⁵³Muchuycho cagcunatami micuyta puestupan. Mana cuyapäcog rïcucunatanami isanga yanapannasu.

⁵⁴Abrahamta promitishganta cumplirmi paypita miragcunata imaypis yanapan. Saymi Israel runacunata mana gongaylapa cuyapan.” Sayno nirmi Tayta Diosninsita María alabargan.

⁵⁶Elisabet cagcho quimsa quilano tarcurnami wayinpana María cuticorgan.

⁵⁷Elisabetpa quilan tincusquiptinnami olgu wamrata gueshyacorgan.

⁵⁸Wawayog cananpä Tayta Diosninsi payta yanapashganpitami castancuna y reguinacuyashgancunapis cushicuyargan.

⁵⁹Saymi puwag (8) junagyog wamran caycaptin Zacariaspa wayinman paycuna aywayargan wamranpa cuerpunta señalayänanpä. Saychömi taytanpa jutilanta jutisiyta munayargan.

⁶⁰Saymi maman nergan: “¡Manami sayno jutin canmansu, sinöga Juan casun jutenga!”

⁶¹Elisabet sayno niptinmi waquin runacuna niyargan: “Castayquicuna say jutiyog mana caycaptenga ¿imanirtä munanqui Juan jutin cananta?”

⁶²Sauraga ima jutita churayänanpäpis sëñalapa Zacariasta tapuyargan.

⁶³Tapuyaptinmi pay manacorgan tacshala tablata saycho guelgananpä. Nircurna saycho guelgargan: “Juanmi jutin canga” nir. Zacariaspis surinpa jutin Juan cananta munaptinmi saycho cag runacuna äyacash ricacuyargan.

⁶⁴Sauraga jinan hörami shimin pashtarcuptin Zacarías Tayta Diosninsita alabargan.

⁶⁵Saycunata ricaycur lapan reguinacuyashgan cushicuyargan. Say päsashganpitami pï-maypis parlayargan intëru say marcacunacho.

⁶⁶Sayta wiyagcuna yarpachacuyargan: “¡Cay wamra winarcur ima munayyogrä cayconga!” Runacuna parlayashgannölami say wamrata Tayta Diosninsi yanapargan.

⁶⁷Saymi Santu Espíritu tantyasiptin Zacarías nergan:

⁶⁸“Israel runacunata yanapag Tayta Diosninsi alabash cayculäsun. Payga salvamänansipänami caycan.

⁶⁹Pay munashganno cawag Davidpa castancunapitami munayyog salvador yurengapä.

⁷⁰Sayno cananpämi unaypita-pasa musyasimargansi wilacog profëtancunawan.

⁷¹Saynöpis musyasimargansi contransicunapita jorgamänansipä cashganta.

⁷²Abrahamta y paypita miragcunatapis promitishgancunataga manami gongashgasu.