Luka 1:49-72

⁴⁹kamana Mwenyé Uwezo kanitendera vinu vikulu pakulu! Takatifu ndi zina rake!

⁵⁰Rehema yake izidi vizazi ka vizazi ka wenye kumopa.

⁵¹Kâtenda uwezo na nkono wake! Kâwatawanya waridãi kati ya mawazo a myoyo yawo.

⁵²Kâwesusa wenye uwezo nviti vyawo, kâwakweza wenye kurinyenyekeya.

⁵³Wenye njala kâwejaza vinu vyema-vyema, matajiri kâwatuwisa makono waka.

⁵⁴Kânsaidiya Iziraeli ntumisi wake julu ya kukumbukira huruma yake,

⁵⁵kamba tamaa yawapere wababu zetu, Iburahima na ujukulu wake mpaka milele.”

⁵⁶Mariyamu akikala na Zabeli kiyasi ca myezi mitatu, ikisa akiludira kwawo.

⁵⁷Sambi, Zabeli wakati wakupongola ufika, neye kampongola mwana nlume.

⁵⁸Majirani na jamaa wasikira kuwa Mwenyezimungu kantendera huruma pakulu Zabeli, wafurahi naye pakulu sana.

⁵⁹Paifikire suku yanane, ewo wakija wakintaya itani toto ire. Wasaka kumwita zina ra wawaye, Zagariya,

⁶⁰fala mamaye akijibu, akamba: “Anta, zina rake Yahaya.”

⁶¹Ewo wakinjibu: “We! Aapo jamaa yako anta mmoja wakwitiwa ero zina‑ro!”

⁶²Newo wakindairi kibubu wawaye mwana ire zina rakisaka etiwe.

⁶³Zagariya akilebela kipande ca kibawo kitoto, akandika javi: “Zina rake Yahaya.” Piya ware wakibaki wakushanga wawenye.

⁶⁴Kwa mpunde noure, kanywa yake ikifunguriwa, lulimi rake rikisowera, akinsifu Mwenyezimungu.

⁶⁵Majirani wakisusuka na vyawawonire vire. Kaya piya za upande wa kumyango ya Yudeya zikisoweriwa habari za evi vinu vikunire‑vi.

⁶⁶Na piya wanu wasikire wakitula mmyoyo mwawo, wakamba: “Noyu mwana‑yu akuja kuwa nani? Kamana nkono wa Mola uwa pamoja neye.”

⁶⁷Zagariya, wawaye toto ire, kamwijala Roho Takatifu, noparepare akanza kubushuru javi:

⁶⁸“Atukuziwe Mola, Nlungu wa Iziraeli, kamana kawawona na kawavusha wanu wake.

⁶⁹Iye katilamusira Nvushi wa uwezo, ujukulu wa ntumisi wake Daudi,

⁷⁰kamba vyaasowere tangu mida julu kanywa za minabii wake matakatifu.

⁷¹Katilamusira eyu Nvushi‑yu ativushe upande wa maaduwi wetu na mmakono mwa piya wenye kutina.

⁷²Javyo, kawolotera huruma wababu zetu, na kukumbukira tamaa yake takatifu,