LLUK 1:49-72

⁴⁹Tondulu Pulieli-ni na ulu-tonduluma tinjirimeliinga nandu aku-siku ningí. Tondulu Puliele yu yi kake tiliele.

⁵⁰Yu-kene mundu-mong teku ung piliiku liilimele yambuma yu-ni kondu kolupa molemú. Enini penga-penga kepe kalku liingíma kepe kondu kolupa molupa mindi pumba.

⁵¹Yu-ni yunu ulu-tonduluma tirim. Yambu kara puku eninga numanuna enini kape niku molemele yambuma yu-ni topa makurupa bulu-bale silimú.

⁵²Yambuma nuim molku koleama nokuku molemelema yu-ni topa mania mundupa, yambuma eninga bima eni-enini toku mania mundulimelema yu-ni eninga bima paka tonjulemú.

⁵³Engle-ni kolemele yambuma yu-ni ‘Olu tipili.’ nimba langi kaíma sipa, yambu kamakoma mélema kepe naa sipa “We pai.” nimba makorolemú.

⁵⁴Yu-ni oliunga kumbi-lepa anda-kolepalimandu “Tembu.” nimba, nimba panjurum ungele apera naa sipa piliipa molupa kene, ⸤anda-kolepa⸥ Eprayam kene, Eprayam yu-ni yandupa-yandupa kalupa liirim yambuma kene, eninindu “Tembu.” nimba, nimba panjurum akili mele tembandu oliu Pulu Yili yunga kendemande Isrel-yambu molemulu akuma yu-ni kondu kolupa liipa tapunjumba tepa molemú.” nirim.

⁵⁶Maria yu Illisapet kene wasie molangli kaliimbu yupuku omba purum kanu-kene penga Maria yu yunga lku-koleandu kelepa purum.

⁵⁷Illisapet kangambula membá enale wendu urum kene yu-ni kang te mirim.

⁵⁸Yunga lku-keri-kupu yambuma kene yunga pulu lirim yambuma kene Auliele-ni yu kondu lakupa kulurum mele piliiku kene enini yu-kene wasie numanu siku muluring.

⁵⁹Ena angere yupuku-guli kangale memba nosupa mulurum kene ena engkaki-sipaliinga yambuma sukundu-sukundu oku máku toku kene yunga kangi te kopsiku poku teku wendu liiku munduku kene, yunga bili yunga lapanga bili manda leku “‘Sekaraya’ niamili.” niring

⁶⁰akiliinga-pe kangalenga anumu-ni “Mólu.” nimba kene “Yunga bili ‘Jon’ nimulú.” nirim.

⁶¹Enini yundu niku mele: “Elsengla pulu lelemú yambu tenga bili aku-sipa naa molemú.” niring.

⁶²Kanu-kene yambuma-ni niku mele: “lápale-ni nambulka nimba piliikemunje, yunga bili lepa nae nimbánje, walsipu piliamili.” niku lapandu kili-ni manda leku niring kene

⁶³yu-ni pundu topa kili-ni manda lepa kene “Buk te sai.” nimba kene, yu-ni bukna bi topa kene nimba mele: “Yunga bili Jon.” nirim. Akili kanuku kene yambuma-ni aima numanu pulele piliiring.

⁶⁴Kanu-kene walsekale Sekaraya yunga kerina kelepa ung nimba kene Pulu Yili kape nirim.

⁶⁵Aku-sipa tirim-na kanuku kene yunga lku-keri-kupu yambuma-ni aima mini-wale munduring. Kolea Judia distrik sukundu ma-pangimanga kolea lirimumanga pali temani akili mindi tolsiliiku puring.

⁶⁶Ulu akili piliiring kene yambuma-ni pali numanu liiku munduku kene niku mele: “Ulu akili we naa telemú. Auliele kang ili-kene molumbáliinga ulu akili tekem lem.” niku piliiku kene “Kang ili penga nambi-sipa molumbanje?” niring.

⁶⁷Mini Kake Tiliele Jon-lapa Sekaraya-nga numanuna omba molupa kapula tirim kene Pulu Yili-ni penga wendu ombá mele “Nikunu si.” nimba yundu nimba sirim ung te piliipa kene, Sekaraya yu-ni yambuma nimba sipa nimba mele:

⁶⁸“Auliele, Isrel-yambumanga Pulu Yili, yu kape nimbu bi paka tunjamili. Yu omba yunga yambuma tepa liipa buni te-ni enini ambulurumeliinga mindili noku muluring buni kanuna wendu líímeliinga piliipu kene yu kape nimbu bi paka tunjamili.

⁶⁹Pulu Yili-ni yunga kendemande ⸤yi nuim king⸥ Depit-ni kalupa liirim yambumanga yi tondulu pili te oliu ‘Tepa liipa mindili nombu molupu kis-silimulu kupulanum-na wendu liipa, kapula molupu konjumulú kupulanum-na liipa munjupili.’ nimba símu.

⁷⁰(Yu-ni “Ninjai!” nimba ung nimba sirimuma piliiku yandu niku siring yima-ni penga tembalendu kórunga-ui niku mele:)

⁷¹“Yu-ni oliu tepa liipa oliunga ele-túma topa makurunjupa, oliu kanuku kis piliiku mindili silimele yambuma ‘Aku-siku naa teangi. Wendu oku kapula molangi.’ nimba aku-siku telemele kupulanum-na wendu liimba.” niring mele ekupu aku temba tekem.

⁷²Oliunga anda-kolepalima kondu kolupa, oliunga kumbi-lepa anda-kolepa Eprayam-kene “Tembu.” nimba, nimba panjipa mi lirim mele “apera naa sipu, nirindu mele teambu.” nimba kene aku temba tekem.