Luka 1:49-72

⁴⁹Bei, Kitulugu Godeeye amapoo goo toowa abo olo moodooso. Yo tei.

⁵⁰Edebeeyo Godee mapoo mesilone doga, Godeeye sooloo deli goo oso dimapoo kookaiyo osee malaiso.

⁵¹Osoloso yayo kitulugu oso goo toowa abo olo moodoogaso. Osoloso yayo odoo dieso nediliyo tekepo doloso si howeli odoo ee peegoo hasisobuguso.

⁵²Osoloso yayo wiligi odoo tebisa diayo wiligi dalame kitulugu too hu ee peegoo tabuguso. Esino odoo dieso pepooko doloso debeli odoo ee pidilone, diba dokodoo poudooso.

⁵³Osoloso yayo nei mauwe odoo ee bi tekepo oso pidiso. Esino bi bei odoo ee mosoowe peegoo hasisobuguso.

⁵⁴Osoloso yayo ibada amawe dio sabolo to kitulugu magoo ee dodolone o to mapoo mesimo silesibili Isalael odoo pidiso. Esiga yayo sooloo deli goo oso Eibalaham sabolo osoloso amawe dimapoo kookaiyo moloso osee malaiso,” diso.

⁵⁶Meliye Elisabet dio badebei a bakadio hedebe di poogoloso see o mi mapoo wedi diso.

⁵⁷Elisabet damamee ti beeame omapoo, yayo giso holo soomagooso.

⁵⁸Godeeye Elisabet mapoo goo tekepo moodoo maga o soosoo sabolo, osoloso yima koola mapoo debeli odoo sabolo oso goo hagee duloso, goomoga hodobo Elisabet bolo poudooso.

⁵⁹Osoloso giso holo soomagoloso abaga dino beeame 8 mapoo diayo holope o kolo koolame mooloogoodooso. Osoloso diayo holope o hu amamo hu Sekalaya hedilame goomogaso.

⁶⁰Esino owee Elisabeteeye egeesee takaso, “Haye, o hu Yonee hedilei,” diso.

⁶¹Esino diayo yimapoo egeesee takaso, “Yonee egee namawe dio eyo hunee,” diso.

⁶²Osoloso diayo see holope eyo ama mapoo o hu odoo ogu hedileiyo doloso deeso edidi takaso.

⁶³Eseme Sekalayaye holope eyo hu magalame odoo susuga mapoo dasogo sabolo homo kolo sabolo yimapoo tenee doloso deeso edidi takaso. Eseme yayo holope eyo hu egeesee magooso, o hu Yonee. Eseme odoo susuga oso goo hagee ogoloso dio diso.

⁶⁴Eseme epedee omapoo Sekalaya to kelega poogoloso badebei see to kolone Godeeyo hu dokodoo poudoomo sileeso.

⁶⁵Osoloso mi omapoo debeli odoo oso goo hagee ogoloso ebigaso. Osoloso Yudiya esia mapoo debeli odoo susuga oso goo hagee duloso to kesameleeso.

⁶⁶Osoloso goo hagee duli odoo oso goolone egeesee woosaso, “Holope hagee odoo kasi masi badobomobelee,” diso. Bei, diba egeiso, Godeeye kitulugu oso yibolo molome.

⁶⁷Yoneeyo ama Sekalayaye Dio Tei oso kitulugu toloso badolone malalo hoogoo peledabalai Godeeyo to ee yayo malalo egeesee takaso,

⁶⁸“Isalael odoo dia wiligi odoo Godeeyo hu dokodoo poude! Bei, yayo sibileso o odoo see eyo gilimadalame neiso tooso.

⁶⁹Osoloso Godeeyo tou teli odoo Deibidiyo bala ee ma kuloduga gie badeli pidili odoo kitulugu toowa imapoo olo teneeso.

⁷⁰Daga hoogoo Godeeye goo hagee o howo woola todoloso dobolone Godee maga to toloso kokodo takomo sili odoo oso imapoo olo takaso.

⁷¹Esiga imapoo ha teli odoo osoloso imapoo hegili odoo oso kitulugu ee ma kuloduga Godeeye iba peegoo gilimado dileiso.

⁷²Osoloso Godeeye ibada amawe dio sooloo dolone pidileiso diso. Osoloso yayo Eibalaham dio to kitulugu magoo ee osee goolee malaiso diso.