Luk 1:49-72

⁴⁹Dé némafwi hambuk yakwa God dé. Dé wuniré némafwi joo dé huru. Déka xi yikafre male dé.

⁵⁰Godka rookwa du takwaka God dé saréfa na. Némbuli, hukémbu akwi, God wungi hurukwa du takwaka saréfa natandé.

⁵¹Godna tamba hambuk dé. Déka tambambu séfélak némafwi jémba dé ya. Du deka mawulimbu deka xi harékéndaka dé diré déka tambambu yawulalama yaki.

⁵²Dé wandéka nak nak téfambu rendé néma du di baka du di re. Dé wandéka deka hafu ximbu harékéhafi yakwa du takwa di néma du takwa re.

⁵³Hénooka hiyaakwa du takwaka dé yikafre jondu hwendéka dé deka biya sukweké. Xérénjuwi mama du takwaka wandéka di jondu yike baka yi.

⁵⁴Déka jémba yakwa Israelna du takwaré dé yikafre huru. Hanja God dé Abraham nana mandékanguka akwi dé wa, ‘Guni Israelna du takwa, gunika saréfa naata némbuli, hukémbu akwi, atéfék nukwambu akwi, guniré yikafre hurutawuni.’ Wungi wataka dé wun hundika saréké.

⁵⁶Wun gwar wungi wataka Maria Elisabet wali lé re. Bafu hufuk re lé léka geré wambula yi.

⁵⁷Elisabet nyan hérateléka nukwa xakundéka lé dunya héra.

⁵⁸Héraléka Elisabetna hémna du takwa akwi léka nyémayika akwi xékéta di léka yikafre mawuli yata di mawuli sawuli ya. Mawuli sawuli yata di wa, “Néma Du God yikafre joo dé huru, Elisabetka.” Wungi di wa.

⁵⁹Nukwa angé yétiyéti angé hufuk yindéka di nukwa nak yae di hérangwanda, déka hémna du wun nyanéna séfi sékénjoka. Hérangwanda di déka séfi séka di wun nyanéna xi Sekaraia wanjoka di saréké, déka yafangala.

⁶⁰Sarékéndaka lé déka ayiwa lé wa, “Yingafwe. Déka xi Jon watame.”

⁶¹Wungi waléka di léré wa, “Hanja béna hém wun xi wahambandi.”

⁶²Wungi wataka di déka yafa Sekaraiaré wakwexéké. Sekaraia hundi buléhafi rendéka di déré tambambu yamanyita di angi wakwexéké, “Méta xi wakéme, déré?”

⁶³Wungi wakwexékéndaka dé tambambu yamanyi, déka nyinga hwendate. Hwendaka dé nyingambu angi hayi, “Déka xi Jon dé.” Wungi hayindéka di atéfék saréké waréké.

⁶⁴Sarékéndaka déka hundi bari yikafre yandéka dé Sekaraia wambula hundi bulé. Buléta dé Godna ximbu haréké.

⁶⁵Buléndéka di déka getéfambu rendé du takwa atéfék di némafwimbu roota saré waréké xéka di wun jooka hundi wa saafa yi, Judiana némbumbu rekwa atéfék getéfaré.

⁶⁶Wa saafa yindaka wun hundi xékéndé du takwa di xékélaki, Néma Du God wun nyanka dé hambuk hwe. Wungi xékélakita saréké waréké xékéta di wa, “Hukémbu wun nyan yingi maki retandé?”

⁶⁷Godna Hamwinya dé wun nyanéna yafa Sekaraiana mawulimbu wulaaye té. Téndéka dé Godna hundi angi wa:

⁶⁸Nani Israelna du takwa, nana Néma Du Godna ximbu harékétame. Naniré yikafre hurunjoka dé gaya. Gaye dé Satanéna tambambu naniré hératandé.

⁶⁹Godna jémba yakwa du Devitna hémémbu némafwi hambuk du dé taka. Takandéka dé naniré mama duna tambambu hératandé.

⁷⁰Godna profet wandanéngala dé xaku.

⁷¹Wunde profet di angi wa, “Nana mama du, nanika hélék yakwa du akwi, naniré xiyanandat, God naniré hératandé, deka tambambu.”

⁷²God dé wungi nana mandékanguka saréfa nae. Dé déka yikafre wasékérékéndén hundika sarékéta wandén maki dé huru.