Luk ma Peba 1:49-72

⁴⁹Mop nokɨp dandayam God kea ukoijog gasa nomnɨkainonj. Ɨ Tina nyɨ re yɨnayɨna e.

⁵⁰Ɨ God tena kear amnɨkeneniny yepim re Tin moga kɨma yesourenenyi komkesa yunɨm dɨde warɨm b'usmureni rɨga wa wɨngɨrɨnd.

⁵¹God Tina yɨm ke danda wɨko amnɨkeneniny, sɨ Ton ket b'asourena rɨga erenjaeneniny yepim re towaina garɨnd b'asourena nony menamena amnɨkenenanj.

⁵²God ukoi wɨp iyoi rɨga gou wa amnɨkeneniny towaina pɨpmet ke, ajɨ Ton rɨga pumb wa urowateneniny yepim re towalenggyam gou wa aukenenanj.

⁵³God owoupa rɨga ngor amnɨkeneniny b'ogɨl gasa ke, ajɨ jogjog gasa kɨma rɨga yɨmkak nena etmɨkeneniny.

⁵⁴God kea yɨm akaeneninonj Tina wɨko rɨga Israelɨnd, odede na ɨt re rɨngmena re Ton tɨrɨr yɨt amninonj mera b'uwar. Sɨ onggɨt penaemb Ton ngɨrpu kesa nonyɨnd awameneninonj kear omnenam Abraamɨm pɨlwa dɨde tina komkesa b'usmureni b'ɨgawar wa pɨlwa.”

⁵⁶Sɨ Mariya ama rɨka nowa mobi kɨma na Elisabet kɨma wɨbnonj, ɨ ket ton ɨtendonj ti tungg wa.

⁵⁷Ɨ Elisabetɨm ket wɨn wokatawonj b'ɨga ukendam, ɨ ton ket leo b'ɨga yukendonj.

⁵⁸Sɨ ti wuswus rɨgap dɨde tina kus rɨgap utkundo da kea Yonggyam tin ukoi kear womɨny. Sɨ ket ton tuwonj ti pɨlwa, dɨde yɨpand gɨlgɨl sam yomnɨko ton kɨma.

⁵⁹Ɨ re b'ɨga eitɨm (8) bibɨr awonj ukendi kak ke, ton b'usaya tuwonj Jakariyamna met wa onggɨt b'ɨgam pɨlɨnd God ma obagendi tɨrɨr omni mal wugɨm ɨpka mɨle omnɨkam. Ɨ ton pop ti nyɨ oekam yomno re ti b'uɨmna nyɨ, Jakariya kena.

⁶⁰Ajɨ ti mog ket esmonggainonj da, “Nayɨ, Yoante ti nyɨ ɨbnau.”

⁶¹Ɨ todaka tin womno da, “Moina kus rɨga wa wɨngɨrɨnd makwa ɨta rɨga yete odede nyɨ ke oeki.”

⁶²Ajɨ ti b'u re yɨpya dum dɨde yɨt kesa na yebɨm. Sɨ onggɨt penaemb ton ti b'und yerkito ɨtaikena kɨma da, “Rɨnggɨtyam nyɨ e man singi yomnyɨt tin nyɨ oekam?”

⁶³Ɨ ton ket egekisinonj yɨpa ɨrɨkapu wulpagɨm iyoyɨm, dɨde ket yɨrɨkonj da, “Tina nyɨ re Yoante.” Sɨ onggɨt map komkesa rɨgap kɨd kesa aukɨto.

⁶⁴Ɨ odenja ket tina tugɨm ake weyat b'ogɨl awonda yɨt opurenam. Ɨ ton ket Godɨnd esourena yiyenonj.

⁶⁵Ɨ re komkesa ti wuswusam rɨgap onggɨtyam mɨle yɨr yongo, ton moga na aukɨto. Ɨ dɨde kea komkesa rɨgap kupka dor tunggɨnd Yuda eriya wɨngɨrɨnd yɨt b'ataya yiyeno onggɨtyam mɨle gatab.

⁶⁶Sɨ komkesa utkunda rɨgap kea onggɨtyam mɨle gatab nonyɨk b'amdena wuwenonj towaina garɨnd, dɨde ton ket b'ɨgekena wuwenonj da, “Ɨtemb b'ɨga rɨdede wɨp rɨga e ɨbɨm dem warɨ?” Mop nokɨp ton kea yongwato da Yonggyamɨmna danda yɨm kea omanda ton kɨma yɨbnenenonj.

⁶⁷Ɨ ket God Yoanɨmna b'u Jakariyand Yɨnayɨna Wɨngawɨnga ke yɨndangɨr yomnonj, sɨ ton bage yɨt apureninonj da,

⁶⁸“Yesoulita Yonggyamɨnd, Israel rɨgaina Godɨnd, mop nokɨp Ton kea Tina rɨga eskena eyeneninonj dɨde ket towaina negɨr mɨle erabinonj ten ɨtraram negɨr mɨlem pɨlke.

⁶⁹Ɨ Ton kea yɨrkokar okawam danda pɨta yomnonj meranɨm Tina wɨko rɨga Dawidɨmna b'usmureni rɨga wa wɨngɨrɨnd.

⁷⁰Odede na ɨt re rɨngmena re Ton get ke tɨrɨr omni yɨt akainonj Tina yɨna bageyam waina tugɨmɨnd pɨtapɨta omnenam.

⁷¹Onggɨtyam yɨrkokar okawa dandate men yɨrkokar okawam nɨtrarkeneniny meraina geja rɨga wa pɨlke dɨde komkesa rɨgaina danda yɨm wa pɨlke yepim re singi kesa nomnenanj.

⁷²Sɨ onggɨt penaemb God kear amnɨkeneninonj mera b'uwar, ɨ onggɨt paemb kwa Ton nonyɨnd yowameneny Tina yɨna outɨnti tɨrɨr omnijog yɨt.