Luk 1:49-72

⁴⁹Bili yuwalk warray ŋayi ŋarrany ŋunhi God-Waŋarryuny guŋga'yurr, ga djämany ŋayi ŋarrakal ŋunhi yindin mirithirra ŋayaŋu-ganyim'thunamirra romdja. Ŋayiny ŋunhi God-Waŋarr Ŋutu' Ḏäl, ga yäkuny ŋayi ŋunhi ḏarrtjalknha yan, dhuyun dhika, gänaŋ'thunna ga ŋula yolkalnydja yäkuŋur.

⁵⁰Ga bulu ŋayi ŋuli ga ŋunhi mel-wuyun ŋurikiwurruŋ yolŋuw walalaŋ, ŋunhi walal ŋuli ga ŋurruŋuyam ŋanya, ga buku-ŋal'yun, barrarirr manapan nhanŋu. Yo, maŋutji-wuyundja ŋayi dhu ga ŋunhi walalaŋguwuynha yan ŋurikiwurruŋdhin, ga walalaŋgalaŋaw mala-bunhawuywun.

⁵¹Ŋayiny ŋunhi God-Waŋarrnydja ganydjarr-ḏumurr warray, ga limurrunhany ŋayi ŋunhi guŋga'yurr ŋuriŋiyi bili yan nhanukiyingal ŋayi ganydjarryuny, ga ŋaŋ'ŋaŋ'thurr ŋayi waṉḏinyamaraŋal ŋunhiwurruny yolŋuny walalany, ŋunhi walal ŋuli ga lakaranhamirr bitjanmirr, yanbi walal ganydjarr-ḏilkurra.

⁵²Wiripuwurrnydja yolŋu walal ŋuli ga ŋunhi ŋurruḏawalaŋun lakaranhamirr, yanbi walal be buŋgawan mala ganydjarr-ḏilkurra, yurr ŋayipiny walalany ŋunhi God-Waŋarryuny nyumukuṉiny'kuŋal warray, nyilŋ'maraŋala walalany. Ga garrwarkuŋalnydja ŋayi ŋunhiwurrunhan yolŋunhany walalany, ŋurruwuykmirrinhan, goŋ-gänaŋunhan mala yolŋuny walalany.

⁵³Ga ŋunhiwurrnydja yolŋu walal ŋunhi walal gan nhinan ŋula nhämiriw, goŋ-waŋarany, ga ŋayiny walalany gan ŋunhi God-Waŋarryuny gurruparnydja nhanŋuwuynha ŋayi manymaktja malany, ga yan bili ga bäy walal gana'yin ŋayaŋu-bakthurr. Yurr ŋunhiwurrunhany yolŋuny walalany ḻukunydja'mirrinhany, ŋayi ŋuli ganha ŋaŋ'ŋaŋ'thuna, walal ŋuli marrtjinyany yänan bala goŋ-waŋaran, dhäparŋ'nha dhika.

⁵⁴Yo. Guŋga'yurrnydja ŋayi gan limurrunhawuynha yan, ŋunhi nhanŋuwuy yan djämamirriny Yitjuralnha malany. Mel-wuyurrnydja ŋayi gan ŋunhi limurruŋ mirithin yan,

⁵⁵bili ŋayi gan guyaŋan ŋunhiyi wäwun'-nhirrpanawuy, ŋunhi ŋayi wäwunguŋal be ŋäthil limurruŋgalaŋuwal mala-ŋurrkanhayŋuwal Yipurayimgal. Bitjarr ŋayi ŋunhi wäwun'tja nhirrpar gam', Ŋarran nhuŋu dhu ga ŋunhi maŋutji-wuyundja, Yipurayim, ga nhokalaŋuw gäthu'mirriŋuwnydja walalaŋ, ga nhokalaŋuw marratja'mirriŋuwnydja walalaŋ, bitjanna bili yan. Yo, ŋayathaŋalnydja ŋayi gan ŋunhi baṯ-bitjarra ŋunhiyi wäwun'tja nhanukiyinguŋ ŋayi; ga dhiyaŋuny bala ŋunhiyi litjalaŋgalaŋumirrnydja wäwun'mirr maḻŋ'thurra dhu, dhiyala limurruŋgalnha, guŋga'yunawuynydja God-Waŋarrwuŋun.” Ga bitjarra ŋayi gan ŋunhi Meriynydja yäku-lakaraŋal ŋanya God-Waŋarrnhany manikaywurrnydja, wokthurrnydja manapar nhanŋu.

⁵⁶Bala ŋayi gan Meriny nhinanan ŋunhilin banydjin yan Litjipitkala wäŋaŋurnydja, ga yan bili ga ḻurrkun' ŋaḻindi djuḻkthurr. Ga dhäŋur beŋuryiny bala ŋayi roŋiyinan nhanukiyingala ŋayi wäŋalil.

⁵⁷Balanyamirriyyiny ŋayi ŋunhi Litjipittja yothumirriyinan, bala ŋayi gan marrtjinany yuṯuŋgurr-ŋonuŋnha, ga yan bili ga yothuw nhanukalaŋaw walu galkithin dhawal-guyaŋanharaw. Bala nhanukuŋ ŋunhi dhawal-guyaŋanany ḏirramun yothuny.

⁵⁸Ga walalnydja ŋunhi nhanukiyingalnydja gurruṯumirriy walal ga bulu nhakun wiripuwurruy yolŋuy walal ŋunhi walalaŋ marrtjin wäŋa mala dhärra'-dharran galkiwatj, ŋäkula walal ŋunhi Litjipitkalaŋuwuynydja dhäwu ŋunhi ŋayi God-Waŋarr mel-wuyurr nhanŋu, bala nhanukuŋ ŋunhi yothuny dhawal-guyaŋanan ḏirramun yothuny. Ga mirithinan walal ŋunhi dhika goŋmirriyinany Litjipitkuny ŋoy-djulŋithinan manapar.

⁵⁹Ga goŋ-waŋgany ga märrma' bäythinyawuy munha djuḻkthurr, bala walal marrtjin ḻuŋ'maranhaminan ḏarrtjalkkunharawnha nhanŋu ŋurikiyin yothuwnha. Ga yäku-nhirrpanany walal balaŋ ŋanya ŋunhi Djakaraya muka, bäpa'mirriŋuwal yan yäku.

⁶⁰Bala ŋayiny ŋäṉḏi'mirriŋuny nhanŋu Litjipittja waŋan bitjarra, “Yaka! Dhuwal ŋayi yäku Djon.”

⁶¹Ga walalnydja nhanŋu buku-bakmaraŋal bitjarr warray, “Wäy, wanhaŋuwuynha dhuwaliny yäku maḻŋ'thurr? Bäyŋun gi dhuwal balanyayiny yäku dhärri dhiyalnydja nhanukiyingalnydja gurruṯumirriwal walalaŋgal.”

⁶²Ga walalnydja ŋuriŋi yolŋuynydja walal dhä-birrka'yurr ŋanya Djakarayanhany goŋdhun yan bitjarra, “Nhä nheny dhu ŋanya yäku-nhirrpan?”

⁶³Bala ŋayi Djakarayaynydja ŋäŋ'thurra walalany guṉḏawnha bilkpilkkun, bala ŋayi ŋunhi wukirriny bitjarra gam', “Dhuwal ŋayi dhu ga yäkuny dhärra Djon.” Ga walalnydja ŋunhi yolŋuny walal mirithinan yan märr-maŋmaŋdhurrnydja.

⁶⁴Ga dhunupan yan ŋayiny ŋunhi Djakarayany waŋanan, dhärukmirriyinan, bala yan märr-yiŋgathinany God-Waŋarrwuny mirithinan yan dhika.

⁶⁵Ga ŋunhiwurrnydja yolŋu walal ŋunhi walalaŋ gan wäŋa dhärran galki maṉḏaŋgal Litjipitkal ga dhuway'mirriŋuwal nhanukalaŋuwal, walalnydja ŋunhi mirithinan yan ganyim'thurrnydja, märr-maŋmaŋdhurra manapar. Ga ŋulawitjarryiny wäŋakurr bukukurrnydja nhakun buku-ḻiw'maraŋalnydja Djudiyawurrnydja makarrkurr, yolŋuny walal marrtjin dhäwu-gänhaminan lakaranhaminan ŋunhiŋuwuyyiny ŋunhi gan nhä malany maḻŋ'thurr maṉḏaŋ Djakarayaw ga Litjipitku.

⁶⁶Ga ŋuriŋiwurruynydja ŋunhi walal gan bilin nhakun ŋäkula dhäwuny', walalnydja gan ŋunhi guyaŋanan, bala gan ŋäŋ'thunminan walalanhawuynha walal waŋga'-waŋganynha yan bitjanminan, “Way! Nhalayak ŋayi dhu dhuwal yulŋuny, ŋunhi ŋayi boŋguŋ ŋunha yothuny yindithiny ŋuthul? Nhän boŋguŋ ŋayi gi balanyamirriyyiny waluy djäma?” Ŋunhi walal gan bitjarryiny waŋanhamin, bili walal ŋunhi nhäŋala ŋamathaŋala God-Waŋarrwun ganydjarr ŋuliwitjarryin yothuwalaŋuwurra.

⁶⁷Ga ŋayiny ŋunhi Djakarayany, bäpa'mirriŋuny nhanŋu ŋurikiyiny yothuw Djonguny, ŋayaŋuny nhanŋu ŋunhi dhaŋaŋdhinan Dhuyu-Birrimbirryun, bala ŋayi waŋanany dhunupan yan dhäruktja God-Waŋarrwuŋun gurrupanawuynydja. Bitjarra ŋayi gan ŋunhi Djakarayay lakaraŋalnydja gam',

⁶⁸“Go limurr wokthunna Garraywun, ŋuriki Garraywu ŋunhi ŋayi Waŋarr Yitjuralwu malaw! Go limurr buku-ŋal'yunna nhanŋu, bili ŋayi yarrupthurrnydja räliny limurruŋ muka, bala ŋayi gan roŋanmaraŋala limurrunhany dhipala ŋunhi baḻanydjarratjarralila romlilnydja.

⁶⁹Garrayyuny limurruny ŋunhi gurrupar Walŋakunhamirriny warray, ga Ŋutu' Ḏälnha, ŋunhi ŋayiny yarraṯaŋur beŋur yan Daybitkal, ŋurikalyi yolŋuwal ŋunhi Godkalaŋuwal djämamirriwal.

⁷⁰Ŋäthilnydja baman'tja be God-Waŋarryu wäwunguŋal limurruny ŋurikiwurruŋgalaŋuwurryi ŋunhi nhanukiyingalaŋuwal ŋayi ŋayaŋu-ḏarrtjalkmirriwal djawarrkmirriwal walalaŋgal.

⁷¹Bitjarr ŋayi ŋunhi God-Waŋarryu wäwunguŋalnydja gam', ŋayi dhu dhawaṯmaraman limurrunhany ŋurikiwurruŋgalnydja goŋŋur ŋunhi walalnydja miriŋu limurruŋ; ŋurikiwurruŋgalyiny ŋunhi walal ŋuli ga ŋaramurryirr limurruŋ. Yo, Garrayyuny dhu ŋunhi limurrunhany walŋakuman.

⁷²Ŋayiny ŋunhi limurruŋguny wuyurr bitjarr yan bili nhakun ŋayi wäwunguŋal baman' ŋäthil limurruŋ mala-ŋurrkanhayŋuny, ga bäyŋun ŋayi dhu ŋunhi limurruny momany ŋurikiwuyyiny ŋunhi ŋayi djäma nhanŋuwuy ŋayi dharrpal gumurrkunhaminyawuy rom limurruŋgal.