Aruku 1:49-72

⁴⁹Piya, Koti tabera aogi punatami, esegi yagara miye, iye. Piya, agewapa aota puma waintiye, iye.

⁵⁰Aeka abemi kinapa igepa agu kao'ena puwaitamagina, ago paipe ibabe abemi kinapa igepa aogi puwaitaye, iye.

⁵¹Aeba esegiyenawampa nkagowapa aboramagina, i maete iye kina igepa igarubantiye, iye.

⁵²Aeba kiya kinapa maema merunkaba puwaitaogini tumi wantawe, iye. Piya, tumima mintanta kina ababuma mesuba puwaitantiye, iye.

⁵³Aeba kusi kina ige piyamaenaba asaema imintana, pi tabe kutantaga kinapa igasogini, imu kampa wainta kina'ena puma mintantawe, iye.

⁵⁴Piya, tayabamagi Abara'amupe aga'nugipe utawaitantiye. Pabi nkawameta piya purataika, kamana'wapa uwa waita ikiye, iye. Pi kamana'waka napimagina, Isureyo kina, Koti kayokaya kina'wa, agu kao'enaga uma tabaibuntiye, Mariya piya untiye.

⁵⁶Piya ugaite, Mariya aeba Erisabetige kakaga u migaitegina, kuma'wati a'wae puma wantiye.

⁵⁷Pigoya, Erisabeti yakari pikena yaga aboraogana masinto yakari potantiye.

⁵⁸Piya, Erisabeti nkaotumpibe wa'ewatasa kina'mibe abite, Wa'egawama aogima ao'maeyogini ampa agate, igeba a'ya'ma i'mu potantawe.

⁵⁹Pigoya, Yoniba ka sonta migasogini, paisa mono kamanapi waintome kamana wasiyu'ma au kasantawe. Au kasagasimagini, agewapa abawampa aukantana Sekarayawe omikena puntini,

⁶⁰abigauguna anowampa: Kampaye. Agewapa Yoniwe omiyo, untiye.

⁶¹Piya yogini: We, kae kaokina'mi piya igiba piyamaba kampa waintiya, aya pukune, ugategini,

⁶²a'wae pumagini abawampaka iyatasa posenta pumagini: Agewapa kewe omusune, untawe.

⁶³Piya yuguna, Sekaraya esaka ibigaogini me nkamuguna: Agewapa Yoniwema, kaentiye. Piyama kaeyogini, wasanamiba agate pami pumagini: I-e, a-e, untawe.

⁶⁴Piya puguna, Sekarayaba pi ntaga kamana iro'ma untana, Kotigaba tabera a'mupa puntiye.

⁶⁵Piya pogini, wa'ewatasa kina'miba pintanaga agate iyekuru puntawe. Piya pumagini, Yutiya amu waintome mpari nasima mare-u me-u puta nasintawe.

⁶⁶Piya umagini, abume kina'mi: Aya yagarantobaya mikiyema, napimagini: Wa'egawama nkesegiyenawampa aepipa waintiye, uma: Ayabaya pukiye, untawe.

⁶⁷Piya yuguna, abawampa Sekaraya Aota Awamusa'ama pumaeyogana, maya untiye:

⁶⁸Isureyo kina, tae Wa'egare Kotika ta'mu potaune, iye. Ataenabisa aokina'wa ampa taba puma aogi purataye, iye.

⁶⁹Piya, kayokaya yagara'wa Tebiti nkayabamapisa ka esegi yagara asitakana aogi puratakiye, iye.

⁷⁰Pai poropete kina'wa uwaitaogini, waiyaba mikena kamana umarantapa, iba aboraye, iye.

⁷¹Pigoya, kama kinatempi nkiyapisa tababumagina, aeba abima ata purata kina'mi nkiyapisa iyoba tatakiye, iye.

⁷²Piya, tayabamagi kao'ena puwaitama iyo'maekuwe, Koti piya untiye, iye. Pika maema ka aga'naena puratama, agu kao'ena ibaba purataye, iye.