Luk 1:49-72

⁴⁹Nɨpe pɨdöŋ magöŋhalö mɨdöp u, nɨpe nan kƚö yabɨƚ yɨp göp. Yad nɨŋbin nɨpe añɨ nöp Bɨ Uɫ mɨdöp.

⁵⁰Nɨbi bɨ manö nɨpe nɨŋöm, ana udöm, hain gɨnaböl gau, kalɨp mög nɨŋöm ud aij gɨnab. Kale ñɨ pai rɨköm, rɨk damöm, rɨk lɨnaböl gau, kalɨp u rö nöp mög nɨŋöm ud aij gɨnab.

⁵¹Nɨpe Bɨ ñɨmagö mɨlö kub yabɨƚ; nɨpe nan kƚö kƚö iru nöp göp. Nɨbi bɨ, hon ke nɨbi kub bɨ kub mɨdpun, a gɨpal gau, God kalɨp yu gɨ yuöp.

⁵²Anɨb u, kiŋ bɨ kub ram mɨnöŋ kub abad mɨdlö hib kub mɨdmɨdöp gau, God gö ke ke arlö, nɨbi bɨ hib mɨdagmɨdöp gau, God kalɨp udöm ud adö adö göp.

⁵³Nɨbi bɨ kɨyö löp gau, God kalɨp nan nɨme lö ñɨŋlö mudun göp. Pen nɨbi bɨ nan iru mɨdöp gau kalɨp yɨharɨŋ hag yuö arbal.

⁵⁴God nɨpe apɨs bac iƚaŋ hon gau kalɨp manö haga u hauƚ gagöm, hanɨp Isrel nɨbi bɨ pör mög nɨŋöm abad mɨd aij göp.

⁵⁵Bac Ebraham abe, bac hon rɨmnap abe ñɨ pai kale rɨköm rɨklö arnab gau, God kalɨp abad mɨdeinabin, a göm, haga rö nöp hanɨp göp,” a ga.

⁵⁶Maria manö anɨbu hagöm, nubi Ilisabed aip rakɨn mɨhau nɨgaŋ mɨdöm, hainö ado gɨ ram nɨpe ara.

⁵⁷Mɨd damöm, Ilisabed ñɨ ap yag daua.

⁵⁸God nɨp mög nɨŋöm abad mɨdö, nɨpe mɨƚep yabɨƚ löm ñɨ yag daua anɨbu, nɨbi bɨ nɨñɨn nubi nɨmam nuö bɨ nɨpe gau nɨŋöm, nɨpe aip mɨñ mɨñ yabɨƚ gɨla.

⁵⁹Ñɨ u yag dapöm, ñɨn unbö mudun jɨŋ mɨdöm, raleb jɨŋ mañu waŋ hañ nɨpe rɨb gɨ dö gɨnɨg göm magum gɨla. Magum göm, kale ñɨ u hib ñɨnɨg göm hagla, “Ñɨ anɨbi, nap Sekaraia hib u la ij gep,” a gɨla.

⁶⁰Hageila, nɨme haga, “Wasö, hib nɨpe Jon a gɨnabul,” a ga.

⁶¹Anɨg hagö, nɨbi bɨ nɨpe gau hagla, “Hon unbö anɨg gagun. Bac baid buö ne gau hib ap Jon mɨdagöp,” a gɨla.

⁶²Anɨg hagöm, nap Sekaraia nɨp ñɨmagö u nöp yamöm hag nɨŋla, “Ñɨ hib nɨhön ñɨnabön?” ö gɨla.

⁶³Hag nɨŋlö, nap ñɨmagö u nöp yamöm haga, “Yɨp köp kalɨ kƚiñ rɨkep ap dauim,” a ga. Hagö daueila, adö anɨbu manö kalɨ kƚiñ rɨköm, “Hib nɨpe Jon,” a ga. Anɨg göl hib kalɨ kƚiñ rɨkö, kale nɨŋöm magöŋhalö aiö yabɨƚ gɨla.

⁶⁴Pen magö anɨbu nöp Sekaraia aɫab marö ga u pɨɫa gö nɨŋöl gɨ, nöd manö hagmɨdöp rö hagöl gɨ, God hib nɨpe hagö adö ara.

⁶⁵Nɨbi bɨ söl au han mɨdeila gau, ga anɨbu nɨŋöm pɨñɨŋ göm, manö anɨbu yag dam ram mɨnöŋ Judia ilö gau magöŋhalö yabɨƚ nɨbi bɨ gau kalɨp hag ñɨla.

⁶⁶Hageila, nɨbi bɨ manö anɨbu nɨŋla gau, kale magöŋhalö gasɨ iru nɨŋöm hagla, “God gö, ñɨ anɨbu anɨg göl yag dauöp u me, hainö bɨ aigale bɨ rö mɨdeinab?” ö gɨla. God pɨdöŋ ñɨ anɨbu pɨg mɨdeia u nɨŋla u me, anɨg hagla.

⁶⁷Ana Uɫ nɨpe ñɨŋaŋ nap Sekaraia aŋ nɨpe daŋ apöm ajmaŋ raua nɨŋöm God hib nɨpe u dap ranöl gɨ haga,

⁶⁸“Hon Isrel nɨbi bɨ, God Bɨ Kub hon hib nɨpe dap ranun hagno adö arnɨm. Nɨpe ke ram mɨnöŋ iƚ i apöm, nɨbi bɨ nɨpe rau adog udöp.

⁶⁹God Bɨ Kub nɨpe gö, Depid rɨkö, rɨklö, rɨk amɨl apɨl gɨlö, ñɨŋaŋ ap yag dauö hanɨp ud kamɨŋ yunab.

⁷⁰Hadame nöp, manö yad nɨbi bɨ gau hagnɨg gabin, a göm, God nɨpe bɨ rɨmnap wög anɨbu hag la. God manö hagep bɨ uɫ nɨpe gau kale God manö haga u nɨŋöm, nɨbi bɨ gau kalɨp hag ñɨla.

⁷¹Bɨ al ñɨŋeb hon gau apöm, hanɨp al pak lɨnɨg gaböl pen nɨpe apöm hanɨp ud kamɨŋ yunab; bɨ hanɨp mulu lugö nɨŋbal gau hanɨp gɨ naij gɨnɨg gaböl u pen nɨpe hanɨp abad mɨdö kamɨŋ arnabun.

⁷²God hadame nöp bac iƚaŋ hon mög nɨŋöm ud aij gɨnabin, a göm, manö kƚö nɨŋö rɨmnap hag la. God nɨpe manö bac hon Ebraham nɨp hag la u hauƚ gagöp; manö uɫ anɨbu haga rö nöp göp.