Luka 1:49-72

⁴⁹kwaapfila Imulungu yane Ngupfu kanendela makulu. Taghwa lye Imulungu lyenzeluka.

⁵⁰Kowonela libatsi iwanu wala iwompfuka. libatsi lyake lyokala lweleko mbaka lweleko lungi

⁵¹Tsakatenda ipfinu pfikulu kwa ghumoko ghwake. Kawapwililisa iwanu iweghodile mne imimoyo yawo.

⁵²Kawahulumsa iwandewa kulawa kune ipfighoda pfawo pfa undewa, na kawenula iwali mbughilambughila.

⁵³Kawaghutisa wane inzala kwa pfinu pfinoghile, na kawawinga matajiri ghamoko ghaliyeka.

⁵⁴Kamwapfila imtumwa wake Isiraeli, na ng'esemwile bae kumlangusa libatsi lyake.

⁵⁵Kakumbuka kumwonela libatsi Abrahamu na lukolo lwake ghamatsuwa ghose!”

⁵⁶Mariya kakala na Elizabeti kwa miyetsi midatu, kuya koya ukaye yake.

⁵⁷Matsuwa gha Elisabeti tsaghapfika ukweleka imwana, naye keleka imwana immale.

⁵⁸Iwanu wali habehi yake ne iwandughu tsake hawahulike Imulungu pfamwonele libatsi sideke, wose wadeng'elela naye.

⁵⁹Imwana hapfikile matsuwa manane, watsa kumwingitsa ngoma. Wabama kumwing'a taghwa Sakariya, taghwa lya aba wake.

⁶⁰Kuya mai wake kalonga, “Bae! Taghwa lyake katsokemighwa Yohane!”

⁶¹Walonga, “Pfii mbona kwahela ndughu iyokemighwa taghwa lino mlukolo lwako!”

⁶²Kuya walonga kwa ghamoko na aba wake wamghutsa taghwa lyachi kobama imwanaghe yakemighwe.

⁶³Sakariya kalomba chibao cho kwandikila, kuya kandika, “Taghwa lyake Yohane.” Wose wakangawala!

⁶⁴Bahala Zakariya kadaha ukulonga keli, kandusa ukumtunya Imulungu.

⁶⁵Iwanu wali habehi yake wapfuka, na mbuli tse ipfinu pfino tsenela kwose kune ipfidunda pfe isi ya Yudeya.

⁶⁶Chila imunu yahulike imbuli ino kalangula, keghutsa, “Pfii imwana yuno atsakuwa mwana wachi?” Kwaapfila ingupfu ye Imtwatsa yakwoneka ghendo ikala naye.

⁶⁷Sakariya aba wake Yohane kamemesighwa na Ghumuhe ghwe Imulungu, naye katabili imbuli kulawa kwe Imulungu.

⁶⁸“Lekani tumtunye Imtwatsa, Imulungu wa Isiraeli! Kwaapfila kawatsila iwanu wake na kuwakombola.

⁶⁹Katwing'a twetwe Mkombotsi yane ngupfu, mtsukulu wa imtumwa wake Daudi.

⁷⁰Ka pfalongile kulawa ghumwande kubitila manabii wake wahenzeluka.

⁷¹kutukombola kulawa kwe iwehile wetu, na kulawa kune ingupfu ya wose iwotwihila.

⁷²Tsakalonga katsowonela libatsi iwabala wetu na katsokumbuka lilaghano lyake lyenzeluke.