Text copied!
CopyCompare
Chaʼ suʼwe nu nchkwiʼ chaʼ ʼin Jesucristo nu nka xʼnaan - SAN JUAN

SAN JUAN 14

Help us?
Click on verse(s) to share them!
1’Ja tyaꞌan ꞌa kaꞌan chaꞌ tiye wan chaꞌ ꞌñaǎn ―ndukwin Jesús ꞌin neꞌ bra kanꞌ―. Wa msñi wan chaꞌ ꞌin Ndiose, ngwañaꞌan xñi suꞌwe wan chaꞌ ꞌñaǎn bra kanꞌ.
2Kaꞌan ꞌa seꞌen suꞌwe ndiya seꞌen ndiꞌin Ndiose Stiǐn. Tlyu naꞌan ndiya seꞌen tyiꞌin wan nde kwa. Tsaꞌaǎn la kanꞌ chaꞌ kuꞌniǐn xuꞌweěn seꞌen tyiꞌin wan. Ja chkwiǐnꞌ loꞌo wan ngwañaꞌan, si siꞌi chaꞌ nu ñi nchkwiǐnꞌ loꞌo wan ―ndukwin Jesús―.
3Tsaꞌaǎn chaꞌ kuꞌniǐn xuꞌweěn seꞌen tyiꞌin wan, kanꞌ kaǎn lo chalyuu xiyaꞌ, tyaǎn tiꞌiǐn ꞌwan chaꞌ tyiꞌin wan loꞌoǔn.
4Jlyo tiꞌ wan la seꞌen tsaꞌaǎn, jlyo tiꞌ wan sa ñaꞌan kuꞌniǐn chaꞌ tsaꞌaǎn la kanꞌ.
5―Yu kula ―ndukwin Toma―, ja jlyo ꞌa tiꞌ ba la nde yaꞌ tsaa. ¿Ni sa ñaꞌan kuꞌni ba chaꞌ tyija lyo tuwiin kanꞌ ꞌwa a? ―ndukwin yu ꞌin Jesús.
6―Naꞌ lkaǎn nu nduꞌuǔn tuwiin kanꞌ ―ndukwin Jesús bra kanꞌ―, naꞌ nduꞌuǔn nchga chaꞌ nu ñi lka; naꞌ ndaǎn chalyuu suꞌwe ꞌin nten, chalyuu nu ja tsaa tii ꞌa ꞌin neꞌ. Ja ka ꞌin nten chalyuu kala neꞌ nde seꞌen ndiꞌin Ndiose si ja loꞌoǔn ―ndukwin Jesús―.
7Nsuꞌwi lyo wan ꞌñaǎn, kanꞌ chaꞌ loꞌo Stiǐn nsuꞌwi lyo wan ꞌin Ni; ni siya ni, nsuꞌwi lyo wan ꞌin Ni, chaꞌ wa naꞌan wan ꞌin Ndiose xa nu naꞌan wan ꞌñaǎn.
8Mnichaꞌ Lpe ꞌin Jesús bra kanꞌ: ―Yu kula ―ndukwin―, kwaꞌuu ꞌwa ti ka nu lka Stii, sa kanꞌ ti chaꞌ nchka tiꞌ ba.
9―Lpe ―ndukwin Jesús ꞌin yu―, wa tyun ꞌa tsan ndiꞌiǐn loꞌo wan, ¿ta ti ji xuꞌwi lyo wan ꞌñaǎn a? ―ndukwin―. Wa naꞌan wan ꞌñaǎn, kanꞌ chaꞌ loꞌo Stiǐn wa naꞌan wan ꞌin Ni bra kanꞌ. ¿Ni chaꞌ nchka tiiꞌ chaꞌ nu ykwiiꞌ loꞌoǔn: “Kwaꞌuu ꞌwa ti ka nu lka Stii?” ―ndukwin Jesús ꞌin Lpe―.
10¿Ja ya tsaa ñaꞌan tiꞌ wan chaꞌ suꞌwa ndiꞌin chaꞌ ꞌñaǎn loꞌo Stiǐn Ndiose a? Loꞌo nchga bra ndiꞌin Stiǐn Ndiose loꞌoǔn ―ndukwin―. Siꞌi chaꞌ nu ndloǔn keěn tiǎn lka chaꞌ nu nchkwiǐnꞌ loꞌo wan; suꞌwa ndiꞌin chaꞌ ꞌin Stiǐn loꞌoǔn, loꞌo Ndiose lka nu ndlo tñan ꞌñaǎn, sa ñaꞌan nu kuꞌniǐn.
11Xñi wan chaꞌ ꞌñaǎn sikwa, chaꞌ nu niǐn ꞌwan chaꞌ suꞌwa ndiꞌin chaꞌ ꞌñaǎn loꞌo Stiǐn Ndiose. Ni siya ja tsaa ñaꞌan tiꞌ wan ꞌñaǎn ngwañaꞌan ti, suꞌwe si tsaa ñaꞌan tiꞌ wan ꞌñaǎn xa nu ñaꞌan wan chaꞌ tnun nu ngiꞌniǐn ―ndukwin Jesús―.
12Chañi ꞌa chaꞌ nu nchkwiǐnꞌ loꞌo wan ni, chaꞌ ya ñaꞌan ti nten nu xñi chaꞌ ꞌñaǎn, ka kuꞌni neꞌ ti kwiꞌ chaꞌ tnun nu ngiꞌniǐn ykwiǐnꞌ; loꞌo ti tnun la tñan ka kuꞌni neꞌ bra kanꞌ, chaꞌ wa tyaꞌaǎn tiǎn nde seꞌen ndiꞌin Stiǐn Ndiose ―ndukwin Jesús―.
13Kanꞌ chaꞌ ni, nchga chaꞌ nu jñan wan ꞌin Ndiose chabiyaꞌ ꞌñaǎn, kuꞌniǐn chaꞌ kanꞌ ―ndukwin―. Loꞌo kuꞌni nten chalyuu chaꞌ tlyu la ka chaꞌ ꞌin Stiǐn Ndiose xa nu kuꞌni tnun neꞌ ꞌñaǎn, skaǎn tiǎn nu lkaǎn Sñiꞌ Ni.
14Nchga chaꞌ nu jñan wan ꞌin Stiǐn chabiyaꞌ ꞌñaǎn, kuꞌniǐn chaꞌ kanꞌ bra kanꞌ.
15’Tukwa wan nchga chaꞌ nu nchkwiǐnꞌ loꞌo wan, si chañi chaꞌ suꞌwe nsuꞌwi tiye wan ñaꞌan wan ꞌñaǎn ―ndukwin Jesús―.
16Bra nu tyaꞌaǎn nde kwa, bra kanꞌ chkwiǐnꞌ loꞌo Stiǐn Ndiose chaꞌ ta Ni xka nu tayaꞌ ꞌwan; kanꞌ lka Tyiꞌi Ndiose nu lka suun nchga chaꞌ nu ñi. Kanun nu kanꞌ loꞌo wan sa ñaꞌan bra nu tyii chalyuu ―ndukwin―.
17Ja ka kanun Tyiꞌi Ndiose niꞌ kasiya ꞌin nten xaꞌan, chaꞌ ja nchka ñaꞌan neꞌ kanꞌ ꞌin Ni, ja nsuꞌwi lyo neꞌ ti ka nu lka Ndiose. Loꞌo ꞌwan, nsuꞌwi lyo wan ꞌin Ni chunꞌ chaꞌ ndiꞌin Tyiꞌi Ni loꞌo wan, loꞌo ngwañaꞌan wa kanun ti Ni niꞌ kasiya ꞌwan ―ndukwin Jesús ꞌin neꞌ―.
18Ja kulaa yaǎnꞌ ꞌwan, ja kanun wan ykwiꞌ ti wan, sa ñaꞌan si lka wan nten nu ja tukwin ndiya ꞌin ―ndukwin―, ti kaǎn seꞌen ndiꞌin wan xiyaꞌ.

19Wa ndla ti ja ñaꞌan ꞌa nten chalyuu ꞌñaǎn bra kanꞌ; loꞌo ꞌwan ni, ti ñaꞌan wan ꞌñaǎn. Bra kanꞌ ka suꞌwe tiye wan, chaꞌ nu wa tyuꞌuǔn xiyaꞌ.
20Ngwañaꞌan ka biyaꞌ tiꞌ wan chaꞌ suꞌwa chaꞌ ꞌñaǎn loꞌo Stiǐn, loꞌo ti kwiꞌ suꞌwa chaꞌ ꞌwan loꞌoǔn ―ndukwin Jesús―, kwiꞌ ngwañaꞌan, suꞌwa chaꞌ ꞌñaǎn loꞌo wan.
21Nchga nten nu chañi chaꞌ suꞌwe nsuꞌwi tiye neꞌ ñaꞌan neꞌ ꞌñaǎn, ti kwiꞌ neꞌ kanꞌ lka nu kunan suꞌwe nchga chaꞌ nu chkwiǐnꞌ loꞌo neꞌ; tukwa suꞌwe neꞌ chaꞌ kanꞌ ―ndukwin―. Xa nu suꞌwe nsuꞌwi tiye neꞌ ñaꞌan neꞌ ꞌñaǎn, loꞌo Stiǐn, suꞌwe ꞌa nsuꞌwi tiye Ni ñaꞌan Ni ꞌin neꞌ kanꞌ. Loꞌoǔn, suꞌwe ꞌa ka tiyeěn ñaꞌaǎn ꞌin neꞌ kanꞌ, kwaꞌuǔn ꞌin neꞌ kanꞌ nchga chaꞌ sa ñaꞌan nu lkaǎn, ti ykwiǐnꞌ tiǎn bra kanꞌ.
22Loꞌo ykwiꞌ xka Juda kanꞌ bra kanꞌ (siꞌi yu nu naan Juda Iscariote): ―Bra nu ndukwiin chaꞌ bare ti ñaꞌan ba ꞌiin, ja loꞌo xka ta nten, ¿ni sa ñaꞌan ndaꞌan chaꞌ tiyee, Xꞌnaǎn, chaꞌ nu ykwiiꞌ ngwañaꞌan, a? ―ndukwin Juda kanꞌ ꞌin Jesús.
23―Nten nu chañi chaꞌ suꞌwe nsuꞌwi tiye neꞌ ñaꞌan neꞌ ꞌñaǎn, kunan neꞌ nchga chaꞌ nu chkwiǐnꞌ loꞌo neꞌ ―ndukwin Jesús―. Bra kanꞌ ka suꞌwe ꞌa ka tiye Stiǐn Ndiose ñaꞌan Ni ꞌin neꞌ kanꞌ. Ti kwiꞌ naꞌ loꞌo Stiǐn kan ba chaꞌ kanun ba loꞌo neꞌ kanꞌ bra kanꞌ ―ndukwin Jesús―.
24Nten nu ja suꞌwe nsuꞌwi tiye ñaꞌan ꞌñaǎn, ja kunan neꞌ kanꞌ siyaꞌ ti ska chaꞌ nu chkwiǐnꞌ loꞌo neꞌ. Wa ynan wan chaꞌ nu ytsaꞌ Stiǐn ꞌñaǎn chaꞌ kwaꞌuǔn ꞌwan, loꞌo siꞌi chaꞌ nu nguloǔn keěn ti ykwiǐnꞌ tiǎn lka chaꞌ nu nchkwiǐnꞌ loꞌo wan.
25’Wa ytsaǎnꞌ nchga chaꞌ kanꞌ laja nu ti ndiꞌiǐn loꞌo wan.
26Chunꞌ ndiꞌin la ka biyaꞌ la tiꞌ wan nchga chaꞌ kanꞌ; kwaꞌu Tyiꞌi Ndiose chaꞌ kanꞌ ꞌwan ―ndukwin Jesús―. Wa suꞌwa ti Stiǐn Ndiose Tyiꞌi Ni chaꞌ kan lo chalyuu chaꞌ tayaꞌ Ni ꞌwan nchga bra chabiyaꞌ ꞌñaǎn. Kuꞌni Ni chaꞌ tyuꞌwi tiꞌ wan nchga chaꞌ nu wa ykwiǐnꞌ loꞌo wan.
27’Nde lka tñan nu kuꞌniǐn loꞌo wan chaꞌ nu wa tyaꞌaǎn tiǎn. Kuꞌniǐn chaꞌ tiin ti tyiꞌin wan. Ja nchka ꞌin nten chalyuu tyiꞌin tiin ti; ykwiǐnꞌ kuꞌniǐn chaꞌ tiin ti tyiꞌin wan ―ndukwin Jesús―. Ja tyaꞌan ꞌa chaꞌ tiye wan, ja ka kutsen wan bra kanꞌ ―ndukwin―.
28Wa ynan wan bra nu ykwiǐnꞌ loꞌo wan: Tyaꞌaǎn, loꞌo chunꞌ ndiꞌin la chinꞌ kaǎn seꞌen ndiꞌin wan xiyaꞌ. Kanꞌ chaꞌ ka suꞌwe ꞌa ka tiye wan bra nu kunan wan chaꞌ wa tyaꞌaǎn tiǎn seꞌen ndiꞌin Ndiose Stiǐn, si chañi chaꞌ suꞌwe nsuꞌwi tiye wan ñaꞌan wan ꞌñaǎn. Wa tnun la chaꞌ nu ndiya ꞌin Stiǐn Ndiose, chinꞌ la chaꞌ ꞌñaǎn ―ndukwin Jesús―.
29Ngwañaꞌan niǐn ꞌwan xa nu ti ji ka chaꞌ kanꞌ; bra nu wa ndyaꞌaǎn, bra kanꞌ ka tsaa ñaꞌan la tiꞌ wan chaꞌ kanꞌ.
30’Ja ndiya kaꞌan la chaꞌ nu chkwiǐnꞌ loꞌo wan ni ―ndukwin Jesús bra kanꞌ―. Wa kan ti kuneꞌ xaꞌan nu lka ndloo lo chalyuu seꞌen ndiꞌian re, ni siya ja nsuꞌwi chabiyaꞌ ꞌin nu kanꞌ chaꞌ ka ndloo ꞌñaǎn.
31Ndiꞌin chaꞌ ka biyaꞌ tiꞌ nten chalyuu chaꞌ suꞌwe ꞌa nsuꞌwi tiyeěn naꞌaǎn ꞌin Stiǐn Ndiose, kanꞌ chaꞌ ngiꞌniǐn nchga tñan nu ndlo Ni ꞌñaǎn ―ndukwin Jesús―. Tyituun lya wan ni. Tsaa lyaa wan loꞌoǔn.